1 Ti'on kjuanda nga ngatakakonu kjuaskana̱. Ngatjas'enu kjuatsejnda. 2 Ngat'are Na'enchana ndibani nga 'ñu tsikuenda_nuu̱. Ngat'a jun jo=ni jngu ki'ndi chjun xi an kitsjaa̱ nga kuixanko jngu xuta, xi Cristo. 'Ba mejénna̱ singantsja_nuu̱ joni jngu ki'ndi chjun xungu. 3 Tunga mafo=na̱ tsa 'ba ku̱ato'on jo kuata'en Eva, kionga chanayiu 'ejñure ko kjuamañare, tsa 'batsa'en kjuetsunjin kjuafa'etsjennu nga bi nde ko ngayéje inimanu 'ba ko kjuatsje kuangitjenngiñu Cristo. 4 Ngat'a chjubetjoñu xuta xi fechukunnu nga sikja'axtiuyanu ngat'are jngu Jesús xi kja'ere, xi bi ji̱n kjinikja'axtiuyee̱ ngajinnu. 'Ba tetsubanda=ñu nga chjubio kja'e isennixtjin nga ko mare xi je kisakunu ngat'are Na'enchana. 'Ba tetsubanda=ñu nga chjubio kja'e en nda ngat'are Cristo nga ko mare xi je kuakjainnu. 5 Tunga bi ngisa chuba ma_ra̱ yojona̱ ngixkun nchja chinga apóstobiu xi ya'e tsure yojore. 6 Ninga tsa bi nda mana̱ nukjua ngixkun xuta, tunga tjin=na̱ kjuankjin kakun. 'Ba kibiu tukjia'añu 'ba ngat'are tumeñu kikakutsejennii̱ ngajinnu. 7 Bi 'bia̱, ¿a ch'o kitsa'aa̱n nga ngisa ngi'nde kikua̱ yojona̱ 'ba ngisa nk'a kitsik'ejña_nuu̱ jun nga nimé kiskjebechji_nuu̱ nga yakuyanu en ndare Na'enchana? 8 Ja'a_ra̱ tonre xuta xi fi kja'e ningu nga kitsja'ndia̱ nga kui 'echjina̱, meni 'batsa'en kuán kitsa'exat'ani_nuu̱. 9 'Ba nga tsakatejñajin_nuu̱, tu'yájín xi kitsik'ena'aa̱n ngat'are mé= xi kichajana̱. Ngu, kionga tjin xi kuachjena̱, nts'ia xi ja'eni nangi Macedonia kui kitsjana̱. Bi kitsja_nuu̱ kjuasti nga tsi'a_nuu̱ xi kuachjena̱, 'ba tojo 'ba= sa'aa̱n jo kitsa'aa̱n. 10 'Be=ña̱ nga kjuakixire Cristo tijñajin inimana̱. Kui kjua ni'yá ku̱an k'uechja'ndenina̱ jo kji'i nangi Acaya nga nk'a tetsik'ejñaa̱ yojona̱ ngat'are mé= xi tetsa'aa̱n. 11 ¿Ánñu 'batsa'en nchjaña̱? ¿A bi= tse tsimején_nuu̱? Na'enchana be= nga tsimején_nuu̱. 12 'Ba xi tetsa'aa̱n, tojo 'ba= sa'aa̱n meni bi sja'ndeni_ra̱ xuta xi inyamangisjai ndiya nga ku̱an nk'a sik'endu yojore ngat'a xare ngusun= ko xi tsajain. 13 Xutabiu, bi kjuakixi nga apóstoles kuán kui. 'Bonacha=re xuta ngat'are xa xi tsa'en 'ba tsik'antjaiya yojore nga joni apóstore Cristo tsa'en matsejen. 14 'Ba kibiu bi tsajmi xatse, ngat'a ndekuini chanayiu tsik'antjaiya yojore nga joni jngu ankje xi Na'enchana tsikasen tsa'en matsejen. 15 Kui kjua bi makunnina nga xuta xi tsa'exat'are 'ba nde tsik'antjaiya yojore joni xuta xi tsa'en mé= xi nda tsa'en matsejen. Tunga kjua'e= nixtjin nga sa̱kure chjire ngat'are mé= xi inyatsa'en. 16 Ngu xin ngani_nuu̱: bi 'batsa'en nikja'etsjion nga xuta ska kuáa̱n. Tunga tsa 'batsa'en nikja'etsjion, ta'e'ndenuu̱ nga kjuako_nuu̱ joni tsa jngu xuta ska kuáa̱n, tuxi ku̱an je k'uaxjechiña̱ yojona̱ ngayeje. 17 Nga 'batsa'en je 'baxjaa̱ yojona̱, bi tenchjaa̱ jotsa'en mejénre Na'enchana, tusa jotsa'en nchja jngu xuta xi skare. 18 Ngu mé nkjin xi je 'baxje yojore ngat'are mé= xi tsa'en nga'e ngasun'ndio, 'ba nde tsa'en jechi 'baxjaa̱ yojona̱ ngayeje. 19 Ngat'a xuta nkjin kakun ma_ru yojonu, kui= kjua nda kakonu xuta xi skare. 20 Ngu ka'nda kakonu xuta xi tsa'ennu chu'ndare, xi fa'anu tsajmi xi tsojon, xi 'bejñunu, xi 'ñu betonnu, 'ba xi mo'ojin nkjon. 21 Ngisa indakjua tsiketsubai̱ ngajinnu nga ko mare xutabiu. Nisi masubana̱ nga 'ba xia̱n. Tsa tjin xi ma kakun nga je 'baxje yojore, 'ba=nde makakua̱n nga je 'baxjaa̱ yojona̱ ngayeje, ninga tsa tu enska xi tenchjaa̱. 22 ¿A xuta Hebreo kui? 'Ba=nde kui kuáa̱n an. ¿A nchja xi tse'e Israel kui? 'Ba=nde kui kuáa̱n an ngayeje. ¿A ntjere Abraham kui? 'Ba=nde kuia̱ ngayeje. 23 ¿A xuta xi tsa'exat'are Cristo= kuán? An xi ngisa 'ñu tsa'exat'are, ninga 'batsa'en tenchjaa̱ jotsa'en nchja xuta xi skare. Ngisa 'ñu kitsa'exa ngisaa̱ nga ko mare kui xutabiu, 'ba ngisa nkjin ndiya je kichanis'enna̱ nduya nga ko mare kui, 'ba ngisa= nkjin ndiya kis'ena̱, 'ba nkjin ndiya mején kjinik'enna̱. 24 Je kua'ón ndiya xuta judío yajana̱ katjio'on ñujun na'ñu nga jngu ndiya. 25 'Ba ján ndiya yajana̱ ya, 'ba jngu ndiya ye'ena̱ ndiojo. Ján ndiya tu 'batsa'en tsak'ajmesaa̱n ngasun ndachikun nga kitiungijndiukona̱ barku xi an tejñayaa̱. Jngu nistjen ko jngu nixtjin kitsjensaa̱n ndachikun. 26 Tu tsu'bantsjai=ña̱ nituña nga'ndeñu. Tjekun tsakatejñaa̱ ngat'are ngajin ndaje, tjekun tsakatejñaa̱ ngat'are chacheje, tjekun tsakatejñaa̱ ngat'are xuta xi tu jngu judío kuái̱n 'ba ngat'are xi bi judío. 'Ba tjekun tsakatejñaa̱ ngat'are ngajin naxinando, nga'nde t'axin, 'ba ngajin ndachikun 'ba ko ngajinre xuta xi tsure yojore nga ngat'are Na'enna tsa'exa. 27 'Ba xa xi 'ñu iye je kitsa'aa̱n 'ba nga 'ñu je jejndana̱. Nkjin ndiya je bi tsakjajñafia̱, ja'axtia̱ kjindia ko xinda, 'ba nkjin ndiya je tsakatejña kjindia̱. Je ja'aa̱ kjuanima ngat'are nch'an 'ba ngat'are nga bi kis'ena̱ najñu ngayeje. 28 'Ba bi tu kibiu xi temata'aa̱n, tjin= ngisa xi kja'ere xi na'en 'bejñana̱. Nyujun, nyujun mafona̱ ngat'are xuta xi makjainre ngat'a tse'e Na'enna xi an tsikuendaa̱. 29 Tsa tjin xi inda s'ere, tsejen mana̱ kjua'indare ngayeje. Tsa 'yá= xi tsa'en nga skjeje xuta xi kja'ere, masti=na̱. 30 Tsa machjen nga je k'uaxjaa̱ yojona̱, ngu je k'uaxjaa̱ yojona̱ ngat'are mé= xi baku nga inda tjinna̱. 31 Na'enchana, xi Na'enre Na'enna Jesucristo (ngatjanichjintsjaire) be= nga kjuakixi xi texia̱n. 32 Nga tsakatejñaa̱ naxinanda Damasco, xuta xi tijña gobernador xi kitsja xare rey xi Aretas 'mi, 'exa nga kjuinikuenda nga'nde ña bitjas'enjinña naxinando tuxi kjuindubanina̱. 33 Tunga tjin xi ngaya jngu nisinya ts'ajenyanina̱ ña tixa xjo xi tjindaire naxinando, 'ba 'batsa'en kuán tsangaña̱ ngaya ntsja nchjabiu.
