2 CORINTIOS 10

1Ngat'are Cristo xi inda kjiya inimare 'ba xi tjinre kjuanda an Pablo 'bets'a_nuu̱, ninga xuta tsuna̱ nga nimakjua 'baxjia̱ yojona̱ nga tejñajin_nuu̱ 'ba nga ne makakua̱n xia̱n tumeñu nga kjin tejña_nuu̱. 2'Bets'a_nuu̱ kionga kjuikun_nuu̱ nga bi ño'on xi sa'en nga 'ñu kjuako_nuu̱. Ngat'a tjijngu kakua̱n nga 'ñu kjuakua̱ yak'a xi 'ba mare nga 'batsa'en tenik'etjusii̱n mé= xi mejénre yojoni̱ jotsa'en xuta ngasun'ndio. 3Kjuakixi= nga xuta ngasun'nde kuái̱n, tunga bi 'batsa'en bixkjai̱n ji̱n jotsa'en kjan xuta ngasun'ndio. 4Ngat'a xi nichjee̱n nga mixkjai̱n bi xi tjin ngasun'ndio. Tusa nichjee̱n kjua'ñure Na'enchana, kjua'ñu xi mare tsikixuya nga'ñure chanayiu. 'Ba 'batsa'en misennee̱ en xi nchja xuta xi nchjasti ngat'ani̱. 5'Ba ña'an_ri̱ ngayéje kjuank'a kakun xi 'bechja'ndere xuta nga skue Na'enchana, 'ba 'be'ñii̱ ngayéje kjuafa'etsjenre xuta xi tjin ngasun'ndio tuxi sik'etjusunni enre Cristo. 6'Ba nga je xiare nga jun nda 'betjusunnu, kuetsubanda=nii̱ nga kua'e_ri̱ kjuana'en xuta xi bi 'betjusunre tume kjuañu. 7Chutsejen'o xi tjin ngixkún. Tsa tjin xi bere kakun nga tse'e Cristo kuán, 'ba nde ngatatsikja'etsjen nga 'ba nde tse'e Cristo kuái̱n joni kui. 8Ngu bi masubana̱ ninga tsa 'batsa'en matsejen nga nk'a 'baxjia̱ yojona̱ ngat'are kjua'ñu xi kitsjani̱ Na'enna Jesús. Tjinni̱ kjua'ñuni tuxi si'annii̱ nga ku̱ankjin ngisanu xi tse'e Na'enchana, 'ba bi tuxi xajañu. 9Bi mejénna̱ nga 'batsa'en sikja'etsjion nga an mejénna̱ minyakun_nuu̱ nga tsikasen_nuu̱ xujun. 10Ngat'a tjin xi tsu: 'Ñu ts'en 'ba 'ñu nchja xujunre, tunga kionga i tijñajinna bi 'ñu kun kji'i. 'Ba en xi nchja tu jaan mare xuta. 11Tunga xuta xi 'ba tsu, nda ngatatsikja'etsjen jo tsu xujun xi ni'indii̱ ji̱n nga kjin tetsubai̱. Ngu 'ba=nde kui xi si'ee̱n nga kio tetsubajin_ri̱. 12Bi makakui̱n nga ningusunkuai̱ yojoni̱ ninga bi 'bechubakue̱ yojoni̱ xuta xi tu kui suba nda tsik'endu yojore. Xuta chikun= xi 'batsa'en suba nda tsik'endu yojore, ngat'a ko yachubare ndekui tsichubani yojore, 'ba ndekui tsichubakoni xinkjin. 13Ji̱n, bi sikja'axtiune_ri̱ chu̱ba̱ nga nda sik'endii̱ yojoni̱. Tu 'ba= kji'i sa jo kji'i chu̱ba̱ xi je 'ejñani̱ Na'enchana ngat'are xa xi mejénre nga si'ee̱n. 'Ba 'batsa'en ka'nda jun echukat'ari̱. 14Kui kjua bi tebitjaxtiuneni_ri̱ chu̱ba̱ nga'nde xi ji̱n 'bakoni̱ joni si'ee̱n tsakaiñu tsa bira echuchunri̱. Ngat'a ji̱n= xi tjun echuchunri̱ 'nda ña tetsubo nga nikja'axtiuyari̱ en ndare Cristo. 15Bi ji̱n nda tenik'endii̱ yojoni̱ ngat'are xa xi inyatsa'en xuta xi kja'ere, tuxi bi kuitjaxtiuneni_ri̱ chu̱ba̱ni̱. Tusa chuyee̱ nga ngisa nda ku̱akjain ngisanu, 'ba 'batsa'en ku̱an si'ee̱n ngajinnu jngu xa xi ngisa je ngisa, tunga tu ngaya chubare xani̱. 16'Ba 'batsa'en ku̱an sikja'axtiuyee̱ en ndare Cristo ngajinre xuta xi ngisa kjin tjindu nga ko mare jun, tunga bi kio kuitjes'enjii̱n nga'nde ña inyatsa'exa xuta xi kja'ere. Ngat'a bi mejénni̱ nga nda sik'endii̱ yojoni̱ ngat'are xa xi je kitsa'en kja'e xuta. 17Tsa tjin xi mejénre nda sik'endu yojore, nda ngatatsik'endu yojore tu ngat'are Na'enna Jesús sa. 18Ngat'a bi kui xi tu kui tajngu nda tsik'ejña yojore xi nda chjubetjo. Tu kui sani xi Na'enna Jesús nda kuinchja ngat'are xi nda chjubetjo.

will be added

X\