2 CORINTIOS 1

1An, Pablo, tetsikasen_nuu̱ xujunbi, xi jngu apóstore Jesucristo kuáa̱n jotsa'en kuamejénre Na'enchana. An ko nts'ia Timoteo tenikasenri̱ xujunbi jun xi makjainnu ngat'a tse'e Na'enchana xi tetsubo naxinanda Corinto ko ngatsi'u xuta tsjere Na'enchana xi tetsubasun nangi Acaya. 2Ngatjas'enu kjuanda ko kjuaxiu xi tsjana Na'enchana ko Na'enna Jesucristo. 3Ngatanichjire Na'enchana xi Naire ko Na'enre Na'enna Jesucristo, Na'enchana xi fa'animara 'ba xi tsjana kjuaje kakun. 4Kui tsjana kjuaje kakun ngajinre ngayéje kjua xi temitjaxtia, tuxi ko ña ku̱an kua'eni_ra kjuaje kakun xuta xi tume kjua tifa'axtiu. Kjuaje kakun xi Na'enchana tsjana, ndekui xi kua'e ngani_ra xuta xi yak'a. 5Ngat'a jotsa'en 'ñu tisakut'ana kjuanimare Cristo, 'ba=nde tsa'en 'ñu tisakuna kjuaje kakun ngat'are Cristo. 6Tsa temitjaxtii̱ kjuanima, kio= tjindibanire nga tisakunu kjuaje kakun 'ba nga k'uangiu. 'Ba tsa tisakuni̱ kjuaje kakun, kio= tjindibanire nga tisakunu kjuaje kakun xi kuasekonu nga xukjuakonu ndekui kjuanima xi temitjaxtii̱. 7Bi jó ján fai̱ kakui̱n ngat'are mé= xi chuyee̱ ngat'a tsojon. Ngat'a 'ya=ni jotsa'en tisakut'anu kjuanimani̱, 'ba=nde tsa'en sa̱kut'anu kjuaje kakunni̱. 8Nts'ia̱, mejénni̱ nga xio ngat'are kjuana'en xi tsitjaxtii̱ nga'nde xi tijñajin nangi Asia. Ngat'a kjuana'enbiu jo=ni jngu ch'a xi je mején kitsukineni̱ ka'nda bi nde kichukjuakonini̱. Ka'nda kjinikja'etsjen=nii̱ nga bi nde kuetsubachunni̱. 9'Ba kuánni̱ joni tsa kueyee̱ tsakaiñu. Tunga 'ba kuán tuxi bi ngat'a tsajain xunni_ri̱, tusa ngat'are Na'enchana xi tsikja'aya nganire mik'en. 10'Ba Kui ts'axjejinni̱. 'Ba k'uaxjejin nganini̱ ngajin kjuabeya joni kibiu. 'Ba be=re takui̱n nga tojo k'uaxjejin ngisani̱. 11'Ba jun ma misekonii̱ nga xuko Na'enchana ngat'ani̱. Tsa nkjin mani xi inyafako Na'enchana ngat'ani̱, 'ba=nde nkjin mani xi sjare kjuanda Na'enchana ngat'are kjuanda xi sakuni̱. 12Kibi= xi kjuatsjani̱. Kjuafa'etsjenni̱ tsuyakixini̱ nga tsje 'ba nga kixi temekue̱ yojoni̱ ngajinre xuta ngasun'ndio 'ba ngisa nda ngisa ngajinnu, jotsa'en tibaku ndiyani̱ Na'enchana. Ngat'a bi kjuafa'etsjenre xuta xi tibaku ndiyani̱, tusa kjuandare Na'enchana. 13Xujun xi nikasee̱n ni'indut'a=nii̱ tu kui sa tsajmi xi manu 'bexkiyo 'ba mankjinnu. 'Ba kuyaa̱ nga jngu nixtjin ku̱ankjin yejenu, 14ninga nganda'e mankjinchinu nga nixtjin nga kjua'e ngani Na'enna Jesús sa̱kunu kjuatsja ngat'ani̱ jotsa'en 'ba nde sakuni̱ kjuatsja ngat'anu ngayeje. 15Ngat'a be=re takuaa̱n kibiu, kui kjua kuamejénnina̱ nga tjun kjuikun_nuu̱ tsakaiñu, tuxi s'e̱ninu jó ka'a kjuatsja. 16Kitsikja'etsjia̱n nga tjun kjua'aa̱ ngajinnu nga kjuia̱ nangi Macedonia 'ba kjua'a ngañaa̱ nga kjuendiba ngañaa̱ nangibiu. 'Ba 'batsa'en ku̱an kuisekonuu̱ nga kuenikasennga ndiyanu nga kjuia̱ nangi Judea. 17'Bamani, nga 'batsa'en 'enda, ¿a bi nda kitsikja'etsjia̱n? ¿Asa 'benda=ña̱ mé= xi sa'aa̱n jotsa'en xuta ngasun'ndio, nga ndekuini chubabiu xia̱n “jun” 'ba ko “junjun”? 18Na'enchana xi be= nga chukori̱ bi ndekuini chubabiu mixii̱n “jun” ko “junjun.” 19Ngat'a ngajinnu an ko Silvano 'ba ko Timoteo kjinikja'axtiuyee̱ enre Na'enchana ngat'are Jesucristo xi Ki'ndire, 'ba Kui xi bi ndekuini chubabiu tsu “jun” 'ba ko “junjun.” Tusa “jun” xi tse'e Na'enchana. 20Ngat'a ngayéje xi Na'enchana tsuyatitjun nga sa'en, kui xi “jun” ma ngajinre Cristo. Kui= kjuañu ngat'are Cristo “'ba ngatjama” mixunña 'ba 'batsa'en sakure kjuaje Na'enchana. 21Na'enchana xi tsa'en nga jun ko ji̱n kixi kuinyajian ngajinre Cristo 'ba kui= xi kitsja xana. 22'Ba je 'et'ana jngu chu̱ba̱ xi baku nga Kui tse'era 'ba kitsjana Isennixtjintsjere nga k'uejñajin inimana, tuxi xiaña nga sakuna mé= xi jaskan sjana. 23Tunga Na'enchana kuetsuyakixi nga kjuakixi= xi xin_nuu̱ nga kjuanda tsojon nga kje fijía̱n naxinanda Corinto jotsa'en kitsikja'etsjia̱n tsakaiñu. 24Bi tsa mejénni̱ k'ueneri̱ mé= xi tjinnere nga ku̱akjainnu, ngat'a je= kixi tenyo ngat'are xi makjainnu. Tusa temisekua xingia nga tu jngu xa xi teña'an, 'ba 'batsa'en s'e̱nu kjuatsja.

will be added

X\