1 TIMOTEO 5

1Bi chjutikue xuta chinga, tusa chukoye ko kjuaxuta joni tsa na'enri kuán. Nda tikue nchja nistiu joni tsa nts'é, 2'ba xi yanchjin chinga joni tsa nari, 'ba xi sa'e nisti yanchjin joni tsa ndichjai nga ko inimari xi tsje tjin. 3Tatesin_ri yanchjin k'an xi tu'yá tjinkjinre. 4Tunga tsa jngu chjun k'an tjinre ki'ndi asa ki'ndindai, ngat'are kui ki'ndibiu, xi ngisa tjun tijña ngat'are kui, kui= nga kuatesinre xuta xi tjin ndaba. 'Ba 'batsa'en sja nganire xi kisakure ngat'are xichare. Ngu kui=biu xi matsjare Na'enchana. 5Tunga jngu chjun xi kjuakixi nga chjun k'an kuán, xi tu'yá tjinkjinre, kui xi kunre nga Na'enchana kuaseko. Nga nixtjin nga nistjen fakontsjai kui nga 'bets'are mé= xi machjenre. 6Tunga chjun k'an xi tsjare yojore kjuatsja xi tjin, kui= xi joni tsa je k'en, nisi tijñakun ngisa. 7'Bitsa'en tatexuma_ri xutabiu, tuxi tu'yá kuanejeni ngat'are mé= xi sa'en. 8Ngat'a xi bi tsikuenda xinkjin, ngisa= fani xi tjinduyako ndaba, kui xi 'bejñat'axin xi makjainna 'ba ngisa= 'ñu ch'okun ngisa nga ko mare xi bi makjainre ngat'a tse'e Na'enchana. 9'Ba yanchjin k'an xi s'e̱t'a xujun xi tsu nga ku̱akuenda, tu kui sani ngatjas'et'a xi ts'axtiu yachute ko te nu tjinre 'ba xi tu jngusa xi'in kis'ere, 10xi 'yare nga nda kitsa'en, 'ba nga nda kitsicha ki'ndire, 'ba nga kitsjare nga'nde xuta xi fechukun ndaba, 'ba nga ngisa ngi'nde kiko yojore nga yatesinre xuta tsjere Na'enchana, 'ba nga tsakaseko xuta xi inyafa'a kjuanima, 'ba tsik'ejñandantsjai nga sa'en xi nda. 11Tunga bi 'bet'ai xujun yanchjin k'an xi sa'e ki'ndi. Ngat'a kionga mejénre sa'en xi kuetsu yojore, k'uejñat'axin=ngani kjuafa'etsjenre ngat'are Cristo 'ba ku̱amejénre nga kuixan ngani. 12'Ba 'batsa'en s'e̱neje, ngat'a tsangane= mé= xi kitsu ngatitjunre. 13'Ba nde tse'é ma 'ba xki ni'ya 'betsuma. 'Ba bi tsa tu tse'é ma, 'ba nde ne 'beñajan en ngayeje, 'ba tu tsungijin yeje yojore, 'ba nchja en xi bi tjinni nga kuinchja. 14Kui kjua, xinña̱ nga ngisa nda tjin nga yanchjin k'an xi sa'e ki'ndi kuixan ngani, 'ba nga ngatjas'ere ki'ndi 'ba nga ngatatsikuenda ndaba, tuxi bi sja'ndeni nga ch'o kuetsure xi stikena. 15Ngat'a tjin= yak'a xi je tsikinyat'axin ngat'are Cristo 'ba kit'are chanayi. 16Tsa jngu xuta xi makjainre ngat'a tse'e Na'enchana tjin jngu xinkjin xi chjun k'an, ngatabaseko ngat'are mé= xi machjenre, tuxi bi sik'ena'enni nts'ia. 'Ba 'batsa'en ku̱an kuaseko nts'ia yanchjin k'an xi tu'yá tjinkjinre. 17'Ba ngat'are xuta chinga xi nda batexumare ngajinre xi fi ningu, kui= xi 'ñu nda ngatja'yakun, 'ba ngisa fa nda xi tsikja'axtiuya 'ba bakuya enre Na'enchana. 18Ngat'a 'batsa'en kua'indut'a enre Na'enchana: “Bi 'bechja'nde_ri nga kuakjen tjiundijo yejerañu nga tibasenne trigo nga tibitjia.” 'Ba 'ba nde tsu ngayeje: “Xi tsa'exa bakin=re nga ku̱achjire.” 19Bi nisin_ri ngat'are xi kuaneje jngu xuta chinga ngajinre xi fi ningu, tsa tsajainre tsa jó asa ján xi ko tuxkun fa tsabeni mé xi kuán. 20Tunga ngat'are xi tojo inyakjeje ngisa, chjutikue ngixkun ngatsi'i xi makjainre ngat'are Na'enna, tuxi 'ba nde sakjunni kui ngayeje. 21Te'benera̱ ngixkun Na'enchana, Na'enna Jesucristo 'ba ko ankje xi je kitukja'ajin nga tik'etjusin mé= xi texinra̱. Bi kabi ñe'en, tusa ngusun= tikotsi'i. 22Tu'yá tu chuba fane_ri ndsai nga kua'exa_ri ngajinre xi makjainre ngat'are Na'enna. Titjun nda tikja'etsjen, meni nga bi k'uakot'ari jere xuta xi yak'a. Tsje teni. 23Bi tu suba nanda 'yi. Tusa t'iuchi ko binu, tuxi ku̱andani ngats'ai 'ba ko chi'in xi 'ñu kjit'a tesatet'ai. 24Tjin je xi tsa'en xuta xi 'yare kionga kje ña'anre kjua 'ba tjin xi jaskan 'yare. 25'Ba nde 'batsa'en 'yanire mé= xi nda tsa'en xuta ngayeje, 'ba xi bi tjindutsejen nganda'e bi ku̱an s'e̱ndu'montsjai.

will be added

X\