1 TIMOTEO 1

1An, Pablo, tetsikasia̱n xujunbi, xi jngu apóstore Jesucristo kuáa̱n jotsa'en 'exa Na'enchana xi tsik'angina ko Jesucristo xi kjuachuyana. 2Tetsikasenra̱ xujunbi, Timoteo, xi joni ki'ndina̱ fa kuáin tu ngat'are kjuamakjainna. Ngatjas'eri kjuanda ko kjuanima kakun ko kjuaxiu xi tsjana Na'enchana ko Na'enna Cristo Jesús. 3Jotsa'en 'enera̱ nga kijia̱ nangi Macedonia, teni naxinanda Éfeso kixintsera̱, tuxi k'uechja'ndeni_ri yak'a xuta xi tjin kionga bi ngatakuya en xi bi ngusun ko xi yakuya. 4Ninga bi ngatatesinre en chingare xuta ko xujun xi bi fet'a ña ndiba ja'en 'ba ña kua'indut'a jótsa'en 'etuts'innire ntje chingare. Ngat'a kio= ndibanire nga 'bet'asire xinkjin xuta. 'Ba kibiu bi basekore nga ku̱akjainre ngat'are Na'enchana meni nga ku̱an sik'etjusunni jotsa'en mejénre kui. 5Ngat'are nga 'batsa'en te'benera̱, kui= nga xuta ngatjas'ere kjuanimejen xi ndibanire inima tsje, kjuafa'etsjen xi tsje, 'ba ko kjuamakjain xi kjuakixi. 6Ngu tjin= xi je kit'axinre kibiu. Kichajin en si xi tumé chjire. 7Chamaestru xi tse'e kjuatexumare Na'enchana mejénre sa'en yojore, ninga bi mankjinre xi nchja ninga mé= xi koni kjuakixi tsu tsakaiñu. 8'Yaña nga nda= kjuatexumare Na'enchana tsa sichjian jotsa'en tjinnere nga ku̱achjen. 9'Yaña ngayeje nga bi kitsja kjuatexumare Na'enchana ngat'are xuta xi tsa'en xi nda. Tusa kitsja ngat'are xi mangane kjuatexuma 'ba xi bi nt'e en, xi bi bekun Na'enchana 'ba xi tsa'en je, xi bi tsa'en xi tsje tjin 'ba xi bi bekun xi tsje, xi tsik'en na'enre ko nare 'ba ko kja'e xuta, 10xi tsa'en kjuachajngi, xi xanda, xi bateña chu'nda, xi nchja en ndesu, xi tsichjen ja'enre Na'enna nga tsu nga kjuakixi= tsakaiñu, 'ba xi tsa'en tumeñu xi mangane kjuakixi xi kisakuyaa̱. 11Xi kjuakixi, kui xi bakuyana en nda xi 'ñu je 'ba xi tse'e Na'enchana xi bakinre nga kjuinichjire. Xi 'exana̱ nga kui'aa̱ nijmi. 12Tsja_ra̱ kjuanda Na'enna Jesucristo, xi kitsja nga'ñuna̱, ngat'a kiskunna̱ 'ba kitsjana̱ xabi, 13ninga ch'otsa'en kinchjaa̱ ngat'a tse'e nganda'eñu. Kitsjengikia̱ 'ba kixin_ra̱ en xi ch'o tsu. Tunga ja'anima_ra̱ ngat'a bi 'bia̱ mé= xi tetsa'aa̱n 'ba kje makjainjínna̱ ngat'are kui. 14¡Á tuku kji'ini kjuandare Na'enna ngat'ana̱! Kitsitsejin inimana̱ ko kjuamakjain 'ba ko kjuanimejen xi ndibani Cristo Jesús. 15Kjuakixi= enbi 'ba tjinne=re nga ku̱akjainre ngatsi'i xuta. Cristo Jesús ja'e ngasun'ndio tuxi sik'angini xuta xi tjinre je. 'Ba an xi ngisa ch'o ngisaa̱ ngajinre xutabiu. 16Tunga kui= kjua ja'anima_ra̱ Na'enchana, tuxi Jesucristo kuán kitsa'ennina̱ jngu kusun xi bakutsejen jó= kji'i tse kjuatsejndare ninga ka'nda xuta xi ngisa ch'o ngisa. 'Ba 'batsa'en xuta xi yak'a skueni nga ku̱an ku̱akjainre ngat'are Jesucristo ngayeje 'ba 'batsa'en sa̱kunire kjuabenichun xi bi fet'a. 17'Bamani, ¡ngatja'yakun Na'enchana xi rey xi batexumantsjai, xi bi 'me, xi bi matsejen, xi jngututu Na'enna mani! ¡Ngatja'yakun 'ba ngatjas'ere kjuaje ka'nda ngantsjai nixtjin! 'Ba ngatjama. 18Ji Timoteo, xi joni ki'ndina̱ fa, te'benera̱ xabi nga tixkjant'ai xi nda, jo nga kitsu nchja chinga profeta ngat'a tsiji. 19'Ba kixi tisen ngat'are xi makjainna 'ba tsje ngat'e kjuafa'etsjenri. Ngat'a tjin yak'a xi je 'ejñat'axin kibiu 'ba 'batsa'en kitsichajin yojore. Bi nde makjainnire ngat'are Na'enchana. 20'Ba kuánre Himeneo ko Alejandro, nchjabiu xi je kitsingantsja_ra̱ chanayiu, tuxi ngatjamanire nga bi ch'otsa'en kuinchja ngat'are Na'enchana.

will be added

X\