1 TESALONICENSES 2

1Ngu 'yañu, nts'ia̱, nga bi tu kjuatjo nga echii̱ ngajinnu. 2'Ba 'yañu ngayeje nga kje fechujíi̱n ngajinnu, tsitjaxtii̱ kjuana'en 'ba ch'o kuata'en naxinanda Filipos, tunga Na'enchana kitsi'ñu kakui̱n nga kjinikja'axtiuyee̱ en ndare kui ngajinnu, ninga 'ñu nkjin xi stikeni̱. 3'Ba nga kik'ene_ri̱ xuta nga ku̱akjainre ngat'are 'endare Na'enna, bi ko kjuamaña kjinikja'axtiuyee̱. Tusa enni̱ jendibanire inima xi tsje, 'ba bi kik'ejñu_ri̱ xuta. 4Ngu nga je kiskut'ayakoni̱, Na'enchana nda tsabeni̱ 'ba kitsja xani̱ nga sikja'axtiuyee̱ en ndare Jesucristo. 'Ba 'ba= teñe'ee̱n. 'Ba bi xuta xi teba'e_ri̱ kjuatsja, tusa Na'enchana xi kut'ayako inimani̱. 5'Ba jotsa'en je 'yo, niñajanni nichjee̱n en xi tsja tsu nga chukori̱ 'ba ninga bi amigu ñe'ee̱n yojoni̱ tsa tuxi 'batsa'en kua'eninii̱ me xi tjinnu. 'Ba Na'enchana be= kibiu. 6'Ba ninga bi teminyisjai̱ tsa xuta sjani̱ kjuaje, ninga tsojon jín 'ba ninga tse'e xuta xi kja'e=re jín ngayeje. 7Ningara ji̱n xi apóstore Cristo kuái̱n kuán= kjinichjee̱n kjua'ñure xani̱ ngajinnu tsakaiñu, tusa inda= kikjai̱ inimani̱ joni jngu chjun xi tsikuenda ki'ndire. 8Ne 'ñu nimejénri̱ jun. Ka'nda kuamejen=ni̱ nga bi tu en ndare Na'enchana kjiningantsjari̱, tusa ka'nda yojoni̱ ngayeje, ngat'a je kuon xuta xi 'ñu tjoni̱. 9Ngat'a fa'etsjennu, nts'ia̱, jótsa'en kjiña'axai̱ 'ba nga 'ñu jejndani̱ ngajinnu. Nga nixtjin nga nistjen kjiña'axai̱ tuxi tu'yá kjinik'ena'enni ngajinnu nga kjinikja'axtiuyari̱ en ndare Na'enchana. 10Ngu jun= xi kji'yo 'ba nde Na'enchana tsabe ngayeje jótsa'en tsje 'ba kixi 'ba nda tsiketsubai̱ ngajinnu xi makjainnu ngat'a tse'e Na'enchana. 11'Ba 'yañu jo kjinikori̱ nga jngu jnguu, jo tsiko xi na'en kuán ko ki'ndire. Kikaku ndiyari̱ 'ba kika'eri̱ kjua'ñukakun. 12'Ba kik'eneri̱ nga kuetsubo jotsa'en tjinnere nga k'uendu xuta xi tse'e Na'enchana. Ngat'a kui= kinchjanu nga kuitjas'ion ña batexuma 'ba nga sa̱kut'anu kjuajere. 13'Ba bi nikjejndai̱ nga ba'e_ri̱ kjuanda Na'enchana ngat'are kibi. Nga jun kikasen ñojon enre kui xi ji̱n kjinikja'axtiuyari̱, bi kichjubio joni tsa enre xuta, tusa joni enre Na'enchana. 'Ba kjuakixi= nga enre Na'enchana, 'ba titsa'exajinnu nganda'e jun xi makjainnu ngat'a tse'e kui. 14Ngu 'ba=nde kuato'on jun, nts'ia̱, jo kuata'en xuta xi tjin nangi Judea xi naxinandare Na'enchana kuán nga makjainre ngat'a tse'e Cristo Jesús. Ngat'a xuta xi tu jngu nanginu kitsikja'anu kjuanima, jotsa'en kjinikja'a kjuanima nts'iabiu ngat'are xuta judío xinkjin. 15'Ba kui= xutabiu xi kitsik'en Na'enna Jesús 'ba nixtjin kuatse jan 'ba nde kitsiko nchja chinga profeta ngayeje, 'ba nganda'e tso'oxjejinni̱. Kui bi tsjare kjuatsja Na'enchana 'ba mastike ngatsi'i xuta ngayeje. 16'Bechja'ndeni̱ nga nikja'axtiuya_ri̱ en ndare Na'enna xuta xi bi judío nga tuxi k'uangini tsakaiñu. Ngantsjai inyatsinkjinta'en je yojore nga 'ba inyatsa'en, tunga je ja'ene nde ngat'are xutabiu kjuastire Na'enchana. 17Nts'ia̱, kionga je tsikinyat'axinchiri̱ tu chuba nixtjin (nisi bi nde kji'yaxkunña xingia, tunga 'ñu= kjinikja'etsjee̱n ngat'a tsojon), 'ñu kuamejénni̱ 'ba tsinyisjai ndiya=nii̱ nga kuangichu nganiri̱ tsakaiñu. 18'Ñu kuamejénni̱ tsangichun nganiri̱ tsakaiñu, 'ba an Pablo jó ján ndiya kuamejénna̱ kikun ngani_nuu̱ tsakaiñu, tunga chanayiu 'echjani̱. 19Ngu, ¿'yá= ngat'a tse'e s'e̱ni̱ kjuachuya ko kjuatsja? 'Ba ¿'yá ngat'a tse'e ku̱an je sik'ejñee̱ yojoni̱ ngixkun Na'enna Jesucristo kionga kjua'e ngani? ¿A bi tu jún sa? 20Ngu ngat'a tsojon je nik'ejñee̱ yojoni̱ 'ba tjinni̱ kjuatsja.

will be added

X\