1 TESALONICENSES 1

1An, Pablo, ko Silvano 'ba ko Timoteo tenikasenri̱ xujunbi jun xi makjainnu ngat'a tse'e Na'enna Jesús xi tetsubo naxinanda Tesalónica, xi tu jngu mo ko Na'enchana ko Na'enna Jesucristo. Ngatjas'enu kjuanda ko kjuaxiu. 2Ngantsjai ba'e_ri̱ kjuanda Na'enchana ngat'anu ngatsi'u, 'ba 'ba nde nikja'etsjen ngat'anu nga chukue̱ Na'enchana ngayeje. 3Bi nikjejndai̱ nga fa'etsjenni̱ ngat'anu ngixkun Na'enchana, jotsa'en teño'on xa xi nda ngat'a makjainnu ngat'are kui, 'ba jotsa'en temiseko xuta ngat'a tjinnu kjuanimejen, 'ba jotsa'en tikakonu xi temato'on ngat'a techuya_ru nga kjua'e ngani Na'enna Jesucristo. 4Nts'ia̱ xi tsimejénnu Na'enchana, 'ya=ni nga kui ja'ajinnu. 5Ngat'a nga kjinikja'axtiuyee̱ en ndare Jesucristo ngajinnu, bi tu en sa xi kjinukjuai̱. Tusa kis'ere kjua'ñu enni̱, 'ba Isennixtjintsjere Na'enchana kitsa'exajinni̱, 'ba bi jó ján kikjai̱ inimani̱ nga kjinukjuai̱. 'Yañu jótsa'en tsiketsubai̱ ngajinnu nga tu kjuanda tsojon. 6'Ba ngat'a tsojon, kichjunginii̱ 'ba 'ba nde kichjungi_ru Na'enna Jesús ngayeje. Ngu nga kuakjainnu ngat'are en ndare Na'enchana, 'ba=nde kisakunu nkjin kuya kjuanima. Tunga ninga kjuanima tsitjaxtiu, Isennixtjintsjere Na'enchana kitsjanu kjuatsja. 7'Ba 'batsa'en kuánñu jngu kusun ngat'are ngatsi'i xi makjainre ngat'a tse'e Na'enna xi tjindu jo kji'i nangi Macedonia ko nangi Acaya. 8Ngat'a 'nda ngajinnu 'etuts'innire nga kjinu'ya en ndare Na'enna nangi Macedonia ko nangi Acaya. 'Ba bi tu kui sa nangibiu, tusa kji'yare nitu ñañu jótsa'en makjainnu ngat'a tse'e Na'enchana, 'ba 'batsa'en bi nde machjenni tsa jó kuixun ngisai̱ ji̱n. 9Ngat'a xuta xi yak'a inyanchja nijmi ngat'ani̱ jótsa'en kichjubetjonii̱ nga echuchunri̱ 'ba jótsa'en kjinik'antjaiyo yojonu nga tsikinyat'axin_ru na'en xi kuandakoni ntsja xuta 'ba kichjubetjo Na'enchana. 'Ba jótsa'en nganda'e teña'axat'a_ru Na'enchana xi tijñakun 'ba xi kjuakixi 10'ba nga techuya_ru Ki'ndire Na'enchana xi ndiba ngani ngank'aa. Xi Jesús, xi Na'enchana kitsikja'aya nganire ngajinre mik'en 'ba xi sik'angina nixtjin nga s'e̱jñatsejen kjuastire Na'enchana.

will be added

X\