1 'Bamani, t'éjin kakun nga ja'a kjuanima Cristo ngajin yojore 'ba=tsa'en ta'e_ru kjua'ñu yojonu nga kuetsubando nga xjo'o kjuanima ngayeje. Ngu xi je ja'a kjuanima ngajin yojore ngat'are Cristo, je 'ejñat'axin jio ngayeje. 2 'Ba nixtjin xi k'uejñakun ngisa bi nde sik'etjusunni jo tsu yojore xuta, tusa jotsa'en mejénre Na'enchana. 3 Je= ja'a jotsa'en tsiketsubo nixtjin kuatse jan, nga tsiketsubo jotsa'en matsjare 'bendu xuta xi bi be Na'enchana, nga kitsa'e'nde_ru yojonu nga kjiño'on tumeñu, kjinik'etjusun_ru kjuach'o xi kitsu yojonu, kuach'iu, kika'e_ru kjuatsja yojonu, 'ñu kji'yu ngajin jngu s'i, 'ba kji'yakun na'en ch'okun xi ntsja xuta kuandakoni. 4 'Ba tu 'ba=mare xutabiu nga bi nde tu jngu ndiya mangikoñu nga inyatsa'en kjuach'o xi kitsingantsjare yojore. 'Ba nganda'e ch'otsa'en inyachjani ngat'anu. 5 Tunga tjinne=re nga sja kuenda ngixkun Na'enchana. Xi je tijñanda nga sa'enre kjua xi tjindukun ko xi je jesun. 6 Ngat'a kui= kjua 'ba nde kis'eyanire nijmi en ndare Na'enchana xi je jesun, tuxi ninga je kjiña'anre kjua joni xuta ngat'are mé= xi kitsa'en nga tsaka'a yojo, ku̱an k'uendukunni joni isennixtjin jotsa'en tijñakun Na'enchana. 7 Je tjima tiña nixtjin nga kjue ngayéje xi tjin. Kui kjua nda tinkjinni_ru kakún 'ba bi nikja'ayo nga xuko Na'enchana. 8 'Ba kibi= xi ngisa chjire. Nga ko ngayéje inimanu timejénkaño xingiu, ngat'a kjuanimejen 'ñu= tse je tsichajun. 9 Tsja ngat'enu nga kua'e_ru nga'nde ngaya ni'yanu xi fechukunu. 10 Jotjin kjuanda xi kisakunu ngat'are Na'enchana nga jngu jnguu, 'batsa'en tichjon nga kuiseko xuta xi kja'ere. Ngat'a tjinne=re nga nda sichjon nga jngu jngu kuya kjuanda xi kika'enu. 11 Tsa tjin xi sikja'axtiuya, ngatatsikja'axtiuya jo tsu enre Na'enchana. Tsa tjin xi mejénre kuatesinre kja'e xuta, ngatatesinre jotjin nga'ñu xi tsjare Na'enchana. 'Ba 'batsa'en ngat'are ngayéje xi si'on sa̱kure kjuaje Na'enchana ngat'are Jesucristo. Xi 'bakore ngayéje kjuaje ko kjua'ñu ka'nda ngantsjai nixtjin. 'Ba ngatjama. 12 Jun nts'ia xi tsimijaa̱n, bi ngatjamakunnu mé= xi temato'on nga 'ñu tichut'ayakonu, tsa tjimanu xi bi tjinni nga ku̱annu tsakaiñu. 13 Tusa tsja ngatjas'enu nga tisakut'anu kjuana'enre Cristo, tuxi 'ba nde 'ñu tsja s'e̱ninu nixtjin nga s'e̱jñatsejen kjuajere ngayeje. 14 Tsa ch'o 'minu ngat'a makjainnu ngat'are Cristo, ¡ndaxunu! Ngat'a ngajinnu tijña Isennixtjintsjere Na'enchana, Isennixtjintsje xi tjinre kjuaje. 15 Bi 'ba ngatjama ngajinnu joni xi tifa'a kjuanima ngat'a kitsik'en asa cheje kitsa'en asa ch'o kitsa'en asa kitsungijin yojore kjua xi bi kui 'bakore. 16 Tunga tsa tifa'a kjuanima ngat'a makjainre ngat'are Cristo, bi ngatjamasubare. Tusa ngatatsichjire Na'enchana ngat'a xutare Cristo 'mire. 17 Je tjimatiña nixtjin nga sa'en kjua Na'enchana, 'ba k'uetuts'inre ngajinre xutare. 'Ba tsa 'batsa'en je tjis'etuts'inre ngajinna, ¿jó ngisa bi 'ba ku̱ata'en xi bi inyamakjainre en ndare Na'enchana? 18 'Ba tsa xuta xi kixi na'en 'bangi, ¿jó fa ngisa bi ku̱ata'en xi bi bekun Na'enchana ko xi inyakjeje? 19 'Bamani, xi inyafa'a kjuanima jotsa'en mejénre Na'enchana, janda ngatatsa'en xi nda 'ba ngatatsingantsja yojore Na'enchana xi kitsa'en tsi'i xuta. Ngu kui xi ma chunre.
