1 PEDRO 2

1'Bamani, t'ejñat'axinñu ngayéje kuya kjuach'o, kjuamaña, kjuajonkjain, kjuaxin kakun 'ba ko kjuanik'axki. 2Ngatjamo joni ki'ndixu xi 'ñu mejénre ndachiki. 'Ñu ngatatsu inimanu ndachiki xi 'ñu tsje kjin, xi tsja nga'ñure kjuafa'etsjennu, tuxi ku̱achañu ka'nda nga k'uangiu ya'a. 3Ngat'a je kichut'o jó tjin kjuandare Na'enna. 4Titiñat'a_ru Na'enna xi joni jngu ndiojo xi tijñakun xi xuta 'ejñat'axin. Tunga Na'enchana kiskja'ajin ndiojobiu 'ba 'ñu= chjire ngixkun kui. 5'Ba jun jo=ni ndiojo xi tjindukun ngayeje, xi tjimandakoni jngu ningu ña tijña Isennixtjintsjere Na'enchana. Kitsa'ennu na'mi tsjere Na'enchana, tuxi ngat'are Jesucristo kua'eñu chje xi kuetsunu Isennixtjintsjio, chje xi ku̱atsjare Na'enchana. 6Ngu 'ba=tsa'en kua'indut'a enre Na'enchana: An k'uejñaa̱ nangi Sión jngu ndiojo xi s'engi xjo, xi kichja'ajin 'ba xi 'ñu chji. Xuta xi ku̱akjainre ngat'are ndiojobiu, niñajanni sa̱kure kjuasuba. 7'Ba 'ñu= chjire ndiojobiu ngat'are jun xi makjainnu. Tunga ngat'are xi bi makjainre, 'betjusun ña 'bitsa'en kua'indut'a: Ndiojo xi 'ejñat'axin nchja chjinexjo, kui xi je kuánni ndiojo xi s'engi xjo. 8'Ba 'ba=nde 'betjusun kibi ngayeje: Jngu ndiojo xi satengi xuta, jngu naxi xi tsa'en nga xuta ká. Satengi= xutabiu ngat'a bi tsik'etjusun ion. 'Ba 'ba=tsa'en ja'ba je kis'enda ngat'are xutabiu. 9Tunga jun bi kuon joni xutabiu. Tusa xuta xi kichja'ajin kuon, na'mire rey, jngu naxinanda tsje, xuta xi je kuatse'e Na'enchana. 'Ba= kjinikonu, tuxi k'ueyañu nijmi ngat'are kjuandare xi kinchjanu. Ngat'a Na'enchana kinchjanu tuxi k'uetukajinñu ña jñu 'ba kuitjas'ion ña kui tsjatsa'en tsitsejen. 10Jun ninga bi naxinanda kik'innu nixtjin kuatse jan, tunga nganda'e je kuon naxinandare Na'enchana. Bi ja'anima_ru nixtjin kuatse jan, tunga nganda'e je fa'anima_ru. 11Jun nts'ia̱ xi 'ñu tsimején_nuu̱ xi xin nanginu 'ba xi tetsumasun nga'e ngasun'ndio, 'bets'a_nuu̱ nga t'echja'nde_ru yojonu ngat'are kjuach'o xi nimijíon nga'e ngasun'ndio, xi kjanko inimanu. 12Nda tangiko yojonu ngajinre xuta xi bi makjainre ngat'are Na'enchana. Ninga ch'otsa'en inyanchja ngat'anu nga tsu nga ch'o teño'on, tunga nga skue tsajmi nda xi teño'on, sikixiya nga Na'enchana tjinre kjuaje nixtjin nga kui skui'a kuenda. 13Ngat'a tse'eru Na'enna, kui kjua ngisa ngi'nde tekoñu yojonu ngixkun ngatsi'i xutaxa xi tjin nga'e ngasun'ndio. 'Ba 'ba nde ti'on ngixkun rey xi ngaku ngayeje, 14'ba 'ba nde ti'on ngixkun chikun xi rey tsikasen nga tsikja'a kjuanima xi majngikjua 'ba nga nk'a 'baxje xi nda tsa'en. 15Ngat'a xi mejénre Na'enchana, kui= nga si'on xi nda meni k'uechjañu ts'a xuta chi̱kun xi bi mankjinre ngat'are Na'enchana xi inyatsu nga ch'o teño'on. 16Ndainu yojonu ngixkun Na'enchana, tunga bi nichjon kjuandaibiu nga kua'e'nde_ru yojonu nga si'on xi bi nda. Tusa tetsubo joni chu'ndare Na'enchana. 17Chaxuto ngatsi'i xuta. Timijón xi nts'ia mani. Ngatja'yakun Na'enchana. Chaxuto xi rey ngayeje. 18'Ba jun chu'nda xi tsa'exa ngaya ndaba kja'e xuta, ngisa ngi'nde teko yojonu nga te'yaxuto xi nainu, 'ba bi tsa tu kui sa ngixkun xi nda xuta 'ba xi nda tsikonu, 'ba=nde ngixkun xi 'ñu mejennu ngayeje. 19Ngu Na'enchana nda= nchja ngat'are jngu xuta xi tsajainre je, tunga tichukjuakore nga tifa'a kjuanima ngat'a ngajin kjuafa'etsjenre tijñajin Na'enchana. 20Ngu, tsa tsinyijio 'ba nganda'e techjo'o kjuana'en, ¿mé= xi tjijennu nga tichukjuakonu? Tunga tsa techjo'o kjuana'en ninga nda kjiño'on 'ba tichukjuakonu, kui=bi xi nda tjin ngixkun Na'enchana. 21Ngat'a kjinukjuanu nga si'on kibi, ngat'a Cristo ja'a= kjuanima nga tu kjuanda tsojon. 'Ejña kusunnu, tuxi kuangitjenngiñu chuba ndsaku. 22Kui niñajanni kiskjeje 'ba tu'yá tsak'onachare. 23Nga ch'o kik'inre, bi ch'otsa'en kitsingojo ngayeje. Nga ja'a kjuanima, bi kitsu nga singojo ngani. Tusa kitsingantsjare yojore Na'enchana xi kixi tsa'en kjua. 24Kui fa tsaka'anijin jena nga kis'et'a kru yojore, tuxi eyaña ngat'are jio 'ba kuetsubakuan ngat'are xi kixi tjin. Kjini'on=re Cristo, tuxi kuandañu. 25Ngat'a jun jo=ni chutsanga xi kit'axin nixtjin kuatse jan. Tunga nganda'e je tso'bekun ngañu Cristo xi tsikuendanu joni jngu pastor 'ba xi nda kutsejenre inimanu.

will be added

X\