1 JUAN 2

1Jun xi ki'ndina̱, tetsi'indu_nuu̱ kibi tuxi bi xjujeñu. Tunga tsa tjin xi skjeje, tjin=jnguna xi kuinchjantjaina ngixkun Na'enchana, xi Jesucristo xi kixi tsa'en. 2Kui xi kitsja yojore joni chje nga 'echjintjai jena. 'Ba bi tsa tu je xi tsajan 'echjintjai, tusa ko xi tse'e ngatsi'i xuta xi tjin jo kji'i ngasun'ndio. 3Tsa tenik'etjusan kjuatexumare Jesucristo, 'ba=tsa'en 'yaña nga je 'ya ngat'are kui. 4Tsa tjin xi tsu: “'Be=ña̱ ngat'are kui”, tunga tsa bi tsik'etjusunni kjuatexumare, jngu=nini xuta ndesu 'ba tsajain xi kjuakixi ngajin inimare. 5Tunga xi titsik'etjusun enre, kjuakixi= nga kjuanimejenre Na'enchana tis'ejñatsejenkjin ngajinre xutabiu. 'Ba 'ba=tsa'en 'yaña nga tu jngu= ma= ko Jesucristo. 6'Ba xi tsu nga tu jngu makontsjai, kui xi tjinnere nga 'batsa'en kueko yojore jotsa'en kiko yojore Jesucristo. 7Jun xi tsimején_nuu̱, bi kjuatexuma xatse xi tetsi'indu_nuu̱ nga'e, tusa ndekuini kjuatexuma chinga xi kisakuyanu 'ndani ngatuts'inre. Kui kjuatexuma chingabi, ndekuini en xi ja'ba je kjinu'yo. 8Tunga nganda'e tetsi'indu ngani_nuu̱ nga'e jngu kjuatexuma xatse xi kjis'ejñatsejen nga tjinre kjuakixi ngat'are Jesucristo, 'ba 'ba nde tjimatsejen ngani ngat'a tsojon, ngat'a je tifa'a xi jñu 'ba je titsitsejen ndi'i xi kjuakixi. 9Tsa tjin xi tsu nga sejña ña tsejen, tunga tusa mastike=nga xi nts'e mani ngat'are kjuamakjainna, tojo sejña=ngisa ña jñu. 10'Ba xi tsimején xi nts'e mani ngat'are kjuamakjainna, kui xi sejñantsjai ña tsejen, 'ba tumé tjin xi sa'en nga satengi. 11Tunga xi mastike xi nts'e mani ngat'are kjuamakjainna, kui xi sejña 'ba tsu'ba ña jñu, 'ba bi be ñá tifi, ngat'a ña jñu je= kitsikare. 12Ki'ndina̱, tetsi'indu_nuu̱ ngat'a kuachat'anu jenu ngat'are mé= xi kitsa'en Jesucristo. 13Jun xi xuta chinga kuon, tetsi'indu_nuu̱ ngat'a je 'yo ngat'are 'yá= xi ja'ba je tijña 'ndani ngatuts'inre. 'Ba jun xi nchja nisti kuon, tetsi'indu_nuu̱ ngat'a je kjiña'an_ru chanayiu. 14Ki'ndina̱, je kitsi'indu_nuu̱ ngat'a je 'yo Na'enchana. 'Ba jun xi xuta chinga kuon, je kitsi'indu_nuu̱ ngat'a je 'yo ngat'are 'yá= xi ja'ba je tijña 'ndani ngatuts'inre. 'Ba jun xi nchja nisti kuon, je kitsi'indu_nuu̱ ngat'a tjinnu nga'ñu 'ba ngat'a tijñajinntsjai ngajin inimanu enre Na'enchana 'ba ngat'a je kjiña'an_ru chanayiu. 15Bi nimijíon ngasun'ndio ninga xi tsja ngasun'ndio. Tsa tjin xi tsimején ngasun'ndio, tsajain ngajin inimare kjuanimejenre Na'enchana. 16Ngat'a ngayéje xi tsja ngasun'ndio bi Na'enchana ndibanire, tusa ndekuini ngasun'ndio ndibanire. Kio= ndibanire nga mejénre xi tsu yojore xuta, 'ba nga mejénre sitse'e mé= xi tjibe 'ba nga nk'a 'baxje yojore ngat'are mé= xi tjinre ko mé= xi tsa'en. 17Ngu je tife ngasun'ndio 'ba ko ngayéje xi tsja xi tsu yojore xuta, tunga ngat'are xi titsa'en jotsa'en mejénre Na'enchana, kui xi k'uejñantsjai ka'nda ngantsjai nixtjin. 18Ki'ndina̱, je tetsuba nganda'e nixtjin xi je fet'ani. Je kik'inyanu nga tjinnere nga kjua'e jngu xi stike Jesucristo, 'ba jotsa'en kik'innu 'batsa'en nganda'e je inyafa'e nkjin xuta xi stike Jesucristo. Kui kjua 'batsa'en 'yaña nga je tetsuba nixtjin xi fet'ani. 19Kui xi ngajinna 'etjuni, tunga bi tsajan fa. Ngat'a tsa xuta xi tsajanra, bi kijit'axinna. Tunga 'etju=, tuxi 'batsa'en kji'yatsejennire nga nijnguú makona. 20Tunga ngat'are jun, Jesucristo kitsjanu Isennixtjintsjere Na'enchana 'ba ngatsi'u mankjinnu xi tjin. 21Ngu tetsi'indu_nuu̱ ngat'a mankjinnu xi kjuakixi. Bi ngat'a tsa bi mankjinnu, tusa ngat'a mankjinnu, kui kjua tetsi'induni_nuu̱. 'Ba 'yañu nga nijnguú en ndesu ndibanire xi kjuakixi. 22¿'Yá= xi xuta ndesu? Kui xi bi tsikixiya nga Jesús kui xi Cristo. Xi bi tsikixiya ngat'are Na'enchana 'ba ngat'are Ki'ndiu, kui xi stike Jesucristo. 23Tu'yañu xi bi tsikixiya ngat'are Ki'ndiu, kui xi 'ba nde ninga bi tijñajinre Na'enchana. Tunga xi tsikixiya ngat'are Ki'ndiu, kui xi 'ba nde tijñajinre Na'enchana. 24'Bamani, t'ejñajinntsjo inimanu en xi kjinu'yo 'ndani ngatuts'inre. Tsa en xi kjinu'yo 'nda ngatuts'inre k'uejñajinntsjo inimanu, jun ngayeje 'ba=nde kuetsubajinntsjai_ru Ki'ndiu ko Na'enchana. 25'Ba kuifa ni kibi xi Jesucristo kitsutitjun nga kitsjana enre: nga tsjana kjuabenichun xi bi fet'a. 26Tetsi'indu_nuu̱ kibi ngat'are xuta xi mejénre k'onachanu. 27Tunga jun, tijñajin tsi'inu Isennixtjintsjere Na'enchana xi Jesucristo kitsjanu. 'Bamani bi machjen tsa tjin xi kuakuyanu, ngat'a ndekuini Isennixtjintsjio bakuyanu ngat'are ngayéje xi tjin. Xi bakuyanu kjuakixi=, bi kjuandesu. Kui kjuañu jotsa'en yakuyanu Isennixtjintsjio, 'ba=tsa'en tetsubajinntsjai_ru Jesucristo. 28'Ba nganda'e ki'ndina̱, tetsubajinntsjai_ru Jesucristo, tuxi ku̱an kjuenk'anira nkjan nga kuakutsejen yojore 'ba bi ku̱asubana ngixkun kionga kjua'e. 29'Yañu nga kixi kiko yojore Jesucristo. Kui kjua tjinnenire nga xio ngayeje nga ngatsi'i xuta xi tsa'en xi kixi tjin, kui xi 'ba nde ki'ndire Na'enchana.

will be added

X\