1 CORINTIOS 6

1'Ba kionga ngajinnu tjin jngu xi tjinkore kjua ko kja'e nts'ia, ¿a ku̱an= kakun nga ngat'are xutaxa xi bi bekun Na'enchana kjuik'endako kjua nga'ndere nga ngixkun xuta tsjere Na'enchana? 2¿A bi 'yo nga xuta tsjere Na'enchana sa'enre kjua naxinanda xi tjin ngasun'ndio? 'Ba tsa jun si'an_ru kjua naxinando, ¿ánñu bi maninu 'benda kjua xi ichi? 3¿A bi 'yo nga ka'nda ankjele ña si'an_ra kjua? Kui kjuañu tjinnenire ku̱anna k'uenda kjua xi tisakuna ngasun'ndio. 4Kui kjuañu kionga tjinkonu kjua xingiu ngat'are kjua xi tjin ngasun'ndio, ¿ánñu nchja xi bi 'yakun ngajinre xuta xi makjainre ngat'a tse'e Na'enna mangichunñu nga k'uenda kjuanu? 5'Bi xin_nuu̱ tuxi ku̱asubaninu. ¿A nijngukjín= tjin ngajinnu xi nkjin kakun, xi ku̱anre k'uendare kjua nts'ia? 6Tunga xi tjima ngajinnu, ndekuini nts'ia inyabangi xinkjin 'ba ngixkun xutaxa xi bi makjainre ngat'a tse'e Na'enna 'ba inyatsa'en. 7Ngu nga nde jun tjis'ekonu kjua xingiu, kui= xi ne ch'o tjin. ¿A bi ngisa nda ni tsa xukjuakonu tume kjua xi bi 'ba tjin xi ku̱ato'on? ¿A bi ngisa nda ni tsa kua'e'ndio nga si'annu cheje? 8Tunga nde jun= teña'anñu xi bi 'ba tjin 'ba ko cheje. 'Ba nts'ia xi 'ba teniko. 9¿A bi 'yo nga xuta ch'okun bi sa̱kure nga'nde ña batexuma Na'enchana? Bi 'bejñu_ru yojonu. Bi kjua'as'en ña batexuma Na'enchana xuta xi tjindujin kjuaska, 'ba xi tsichjire na'en xi ntsja xuta kuandani, 'ba xi kjuachajngi tsa'ent'are xinkjin, 'ba xi xanda, 10ninga xi tsa'en cheje, ninga xi 'ñu mejénre tsajmi, xi mach'i, 'ba xi nchja en ch'otsu, 'ba xi 'bonachare xuta xi kja'ere. Ngatsi'i xuta xi 'ba tsa'en, bi sa̱kure nga'nde ña batexuma Na'enchana. 11'Ba kui=biu xi 'ba nde kitsa'en yak'a xi tjin ngajinnu nixtjin kuatse jan. Tunga nganda'e je= kisanejun, je kuatsjio, 'ba xuta kixi= je kuon ngixkun Na'enchana ngat'are mé= xi kitsa'en Na'enna Jesucristo ko Isennixtjintsjere Na'enchana. 12“Ma= tsa'aa̱n tume tsajminu”, tsu xuta. 'Ba= tjin tsakaiñu, tunga bi nda ngayéje kibiu. Ninga tsa ma tsa'aa̱n tume tsajminu, tunga bi sja'ndia̱ tsa kui xi kuatexumana̱. 13“Xi chine tse'e= ngats'a, 'ba ngats'a tse'e= xi chine”, tsu xuta ngayeje. 'Ba= tjin tsakaiñu, tunga Na'enchana sikjekjua ngojó. Bi kich'a yojona tuxi siskakoña. Tusa yojona tse'e= Na'enna, 'ba Na'enna tse'e yojona. 14Jotsa'en nga ko kjua'ñure Na'enchana kitsikja'ayare Na'enna ngajinre mik'en, 'ba=nde tsa'en sikja'ayana ña ngayeje. 15¿A bi 'yo nga yojonu, jo=ni tsa ichi yojore Cristo? Kui kjuañu, jngu xuta xi ichi yojore Cristo ya'a, ¿a sikjen yojore tuxi sijngukoni jngu chjun ska? ¡Ngu niñajanni! 16¿A bi 'yo nga xi tsiko jngu chjun ska, kui xi tsijnguko yojore chjun sko? Ngat'a 'ba=tsa'en kua'indut'a enre Na'enchana: “Tu jngu ku̱an yojore ngojó.” 17Tunga xi tu jngu tsa'en ko yojore Na'enna, kui= xi tu jngu ku̱an ko kjuafa'etsjenre ngayeje. 18Kui kjuañu tisent'axin_ru ngayéje kuya kjuaska. Tume je xi kja'ere xi tsa'en xuta bi fa'as'enjin yojore. Tunga xi tijñajin kjuaska, nde kui tajngu tikjejeta'enni ngat'are yojore. 19¿A bi 'yo nga yojonu xi ningure Isennixtjintsje xi tijñajinnu, xi Na'enchana kitsjanu? 'Ba bi nde tsojon tajnguni yojonu. 20Ngat'a kuachjintjaiñu nga tsindanu. Kui kjua tichjenñu yojonu nga sichji_ru Na'enchana.

will be added

X\