1 CORINTIOS 5

1'Ba kjuakixi= nga tjinu'yare nga tjin ngajinnu jngu xi ndekuini najunre tijñakoni. Ka'nda xuta xi bi makjainre ngat'a tse'e Na'enchana bi 'ba tsa'en. 2'Ba tu ngisa= nk'a 'naxjo yojonu nga'ndere nga s'e̱nu kjuaba. Kui xuta xi 'ba titsa'en tjinnere nga kjui'naxjejiun ngajinnu. 3'Ba an, ninga bi tejñajin_nuu̱, tunga tijñakonu kjuafa'etsjenna̱. 'Ba jo=ni tsa tejñajin_nuu̱, nga kitsa'en_ra̱ kjua nga yanejia̱ xuta xi 'ba titsa'en. 4Kionga ko ja'enre Na'enna Jesucristo ku̱añajant'a_ru xingiu, 'ba=nde k'uejñajinnu kjuafa'etsjenna̱ ko kjua'ñure Na'enna Jesús ngayeje. 5'Ba kio singantsjare chanayiu xuta xi 'ba titsa'en, tuxi kjuetsunni yojore xi tjinre je 'ba k'uangi inimare nixtjin nga kjua'e ngani Na'enna Jesús. 6Bi nda tjin nga nk'a kjui'naxjo yojonu. ¿A bi 'yo nga jngu stinchi na'yu san tsisan yeje ninga tse na'yu? 7Tisent'axin_ru na'yu san chinga xi titsikjetsunnu, tuxi ku̱anñu joni na'yu xatse xi tsajainre na'yu san, xi joni na'yu xi nichjan nga s'i pascua. Jun=ñu xi kui nganda'e, ngat'a Cristo xi chutsangare s'i pascuana je k'enntjaina. 8'Bamani tsu'ba, kjui'naxjia s'iu nga sichjan niñuxtila xi tsajainre na'yu san. Xi tsunire nga tsje tijña inimana 'ba nga tjin ngajinna kjuakixi. 'Ba xanikja'a na'yu san chingó, xi tsunire kjuats'en ko kjuach'o. 9'Ba xujun xi sa kitsikasen_nuu̱ kixin_nuu̱ nga bi sijnguko yojonu xuta xi tjindujin kjuaska. 10Tunga nga 'ba kixin_nuu̱, bi kixin_nuu̱ nga kuinyat'axinkjin_ru xuta xi bi makjainre ngat'a tse'e Na'enna Jesucristo xi tjindujin kjuaska, asa xi 'ñu mejénre tsajmi, asa xi tsa'en cheje, asa xi tsichjire na'en xi ntsja xuta kuandani. Ngat'a tsa bi mejénnú kuetsubajin_ru xuta xi 'ba inyatsa'en, tjinne=re nga k'uetju nga'e ngasun'ndio. 11Tusa kixin_nuu̱ nga kitsi'indu_nuu̱ nga bi nijnguko yojonu tu'ya xi nts'ia tsure yojore tunga tojo tijñajin kjuaska, asa xi 'ñu mejénre tsajmi, asa tsichjire na'en xi ntsja xuta kuandani, asa nchja en ch'otsu, asa mach'i, asa tsa'en cheje. Xi 'ba tsa'en ka'nda bi chineko niñu. 12Ngat'a bi an 'bakona̱ nga sa'en_ra̱ kjua xi tjindu ngandetsian, xi bi makjainre ngat'a tse'e Na'enna Jesucristo. Tunga ¿a bi jun 'bakonu nga si'an_ru kjua xi tjindu ngaya, xi makjainre? 13Ngat'a Na'enchana sa'enre kjua xi tjindu ngandetsian. Kui kjuañu tichuxjejinñu ngajinnu xuta xi timajngi je.

will be added

X\