1 CORINTIOS 3

1An bi kuán jako_nuu̱, nts'ia̱, jotsa'en fakua̱ xuta xi batexumare Isennixtjintsjere Na'enchana, tusa fako_nuu̱ jotsa'en fakua̱ xuta xi tsik'etjusun mé= xi mejénre yojore asa joni xuta xi sa'e k'uetuts'inre ngat'a tse'e Cristo. 2Kui kjuañu yakuyani_nuu̱ joni nisti ki'ndi xi ndachiki tiba'ere 'ba bi tsajmi xi taja tjinikjine. Ngat'a bi kuankjinnu joni xuta chinga, ninga ka'nda nganda'e kje majínnu, 3ngat'a tojo tenik'etjusun=ñu mé= xi mejénre yojonu. Kionga tjin ngajinnu kjuachini ko kjuasi, ¿a bi tsunire nga tojo tetsubo jotsa'en tjindu xuta xi bi makjainre ngat'a tse'e Na'enna Jesucristo? ¿A bi tsunire nga tojo tenik'etjusun mé= xi mejénre yojonu? 4Kionga tjin xi tsu: “An tse'e Pablo= ña̱”, 'ba tjin xi tsu: “Tse'e Apolos= ña̱ an”, ¿a bi 'ba teño'on joni xuta xi bi makjainre ngat'a tse'e Na'enna Jesucristo? 5Ngu 'batsa'en tsu'ba, ¿'yá= kuán Pablo? ¿'Ba 'yá= kuán Apolos? Kui= xi tu chu'ndanu kuán, 'ba Ngat'are= kui kuakjainnu ngat'a tse'e Na'enna Jesucristo. Ngu nga jngui jngui kjiña'an=nii̱ xa xi kitsjani̱ Na'enchana. 6An 'entjía̱, 'ba Apolos inyandangire, tunga Na'enchana xi kitsink'a. 7'Ba 'batsa'en tsu'ba, tumejín xi 'bentje ninga xi minyandangire. Tu Na'enchana sani xi tsink'a, kui= xi je. 8'Ba xi 'bentje ko xi minyandangire tu jngu. Tunga nga jngu jngu s'e̱chjire jotsa'en nga kitsa'exa. 9Ngat'a ji̱n ñatjen= teña'axat'a_ri̱ Na'enchana. 'Ba jun jo=ni tsujmi ntjere Na'enchana, 'ba jo=ni ni'ya xi kui ti'benda= ngayeje. 10Ngat'are kjuandare Na'enchana xi kika'ena̱, nga an kuáa̱n chamaestru chjinexjo xi 'enda tuts'in xjo. 'Ba nganda'e kja'e= tikjenitjen xjore ni'yo. Tunga nga jngu jngu nda ngatakutsejen jótsa'en nga sindasun xjo. 11Ngat'a tu'yá nde ku̱an sindani kja'e tuts'in xjo nga ko mare xi je tikijño, ngat'a Jesucristo jo=ni tuts'in xjore ni'yo. 12'Ba ngasun tuts'in ni'yo ku̱an xjunitjensun xjo xi ku̱andakoni oro, plata, asa ndiojo xi nda kun, yate, ndiji, asa xka nda̱je. 13'Ba xa xi kitsa'en nga jngu jngu xuta s'e̱jñatsejen nixtjin nga ku̱anre kjua ngasun'ndio. Ngat'a ndi'i xi kjua'e kui nixtjinbiu skut'ayako 'ba kuakutsejen mé= kuya xa xi kitsa'en nga jngu jngu xuta. 14Tsa xare xi kiskjenitjensun tuts'inre xjo xukjuakore ndi'u, kui= xi sa̱kure chjire. 15Tunga tsa 'yá= xi kuiti xare, kui= xi sichaja mé= xi kitsa'en, ninga tsa tu kui tajngu k'uangi joni jngu xi ti'betukajin ndi'u. 16¿A bi 'yo nga jun= ñu ningure Na'enchana 'ba nga Isennixtjintsjere tijña ngajinnu? 17Tsa tjin xi sikjekjua ningure Na'enchana, Na'enchana sikjekjua xi 'ba sa'en. Ngat'a tsje ningure Na'enchana, 'ba jun= ñu ningubiu. 18Tu'yá ngata'bejñure yojore. Tsa tjin ngajinnu xi 'batsa'en tsikja'etsjen nga kui jngu xuta nkjin kakun ngajinre xuta xi tjin ngasun'ndio, tusa xuta xi tumé chjire ngatatsa'en yojore, tuxi ku̱anni jngu xuta nkjin kakun ngixkun Na'enchana. 19Ngat'a kjuankjin kakun xi tjinre ngasun'ndebi, kui= xi tumé chjire ngixkun Na'enchana. Ngat'a 'bi= tsa'en kua'indut'a enre Na'enchana: “Na'enchana tsa'en nga ndekuini kjuamañare xuta nkjin kakun kajin.” 20'Ba 'ba=nde tsa'en kua'indut'a ngayeje: “Na'enchana be= nga tumé chjire mé= xi tsikja'etsjen xuta nkjin kakun.” 21'Bamani, tu'yá nk'a ngata'baxje yojore ngat'are xuta xi tjenngire. Ngu tsojon ngayéje xi tjin. 22A Pablo=, Apolos=, Pedro=, ngasun'ndio=, kjuabenichun= ko kjuabeyo, xi tjima nganda'e ko xi ku̱an; tsojon ngayéjebiu. 23'Ba jun tse'eru Cristo, 'ba Cristo Na'enchana tse'e.

will be added

X\