1 CORINTIOS 15

1'Ba nganda'e nts'ia̱, mejénna̱ sikja'etsjenya_nuu̱ en ndare Na'enchana xi ja'ba kitsikja'axtiuya_nuu̱, xi kuakjainnu 'ba xi kixi tenyajiun nganda'e. 2'Ba Ngat'are= kui k'uangi=ñu tsa nda k'uejñatjo en xi kitsikja'axtiuya_nuu̱, tsa bi 'ba si'on tu kjuatjo= kuakjainnu. 3Je kitsikja'axtiuya_nuu̱ en xi ngisa tjun tijña xi ja'axtiuyana̱ nga Cristo k'enntjai ngat'are jena jotsa'en kua'indut'a enre Na'enchana, 4'ba nga kis'eyanijin, 'ba nga xi majánni nixtjin ja'aya nganire ngajinre mik'en jotsa'en kua'indut'a enre Na'enchana, 5'ba nga yakutsejenre yojore Pedro 'ba jaskan xi tejó. 6'Ba jaskan yakutsejenre yojore ts'axtiu ón sientu nts'ia. Nkjin mani xi tjindu ngisa, 'ba yak'a je jesun. 7'Ba 'ba nde tsa'en yakutsejenre yojore Santiago 'ba jaskan ngatsi'i nchja chinga apóstol. 8'Ba xi fet'ani yakutsejenna̱ yojore an xi joni jngu ki'ndi xi tsején. 9Ngu an xi ngisa bi 'ñu chjire ngajinre nchja chinga apóstol 'ba bi bakinna̱ nga apóstol k'uinna̱, ngat'a kitsjengi=ña̱ xi makjainre ngat'a tse'e Na'enna Jesucristo. 10Tunga tu ngat'are kjuandare Na'enchana= nini kuán=ña̱ 'yá xi kuáa̱n nganda'e. 'Ba bi tu tifiton kjuanda xi kitsjana̱ Na'enchana. Tusa ngisa 'ñu tetsa'exa ngisaa̱ nga ko mare nchja chinga apóstol xi yak'a. Tunga bi an xi 'ba tetsa'aa̱n, tusa kjuandare Na'enchana xi tijñajinna̱. 11'Ba 'batsa'en tsa an xi kitsikja'axtiuyaa̱ asa nchja chinga apóstol xi yak'a; tunga xi ngisa chjire kui nga 'batsa'en kjinikja'axtiuyee̱, 'ba jun 'ba=tsa'en kuakjainnu. 12Tsa tifa'axtiuya nga ja'aya nganire Cristo ngajinre mik'en, ¿jótsa'en nga tjin xi tsu ngajinnu nga bi kjua'ayare mik'en? 13Ngat'a tsa bi kjua'ayare mik'en, 'ba nde Cristo bi ja'ayare ngajinre mik'en ngayeje. 14'Ba tsa bi ja'ayare Cristo ngajinre mik'en, tsu=nire nga tumé chjire en xi tenikja'axtiuyee̱ 'ba nga tumé chjire nga makjainnu. 15Tsa 'ba tjin, ji̱n jín xi tsu en ndesu ngat'a tse'e Na'enchana, ngat'a tenikixiyanii̱ nga Na'enchana kitsikja'aya nganire Cristo ngajinre mik'en. Tsa kjuakixi nga bi kjua'aya nganire xuta ngajinre mik'en, tsu=nire nga ninga Cristo bi kjuakixi nga ja'ayare ngayeje. 16Ngat'a tsa bi kjua'aya nganire mik'en, ninga Cristo bi ja'ayare ngayeje. 17'Ba tsa bi ja'ayare Cristo ngajinre mik'en, tumé chjire nga makjainnu. 'Ba tojo tetsubajinjíun jenu. 18'Ba jín nde xuta xi kuakjainre ngat'a tse'e Cristo xi je jesun 'ba jín nde kichaja ngayeje. 19Tsa tu nixtjin xi tetsuba nganda'e techuyasa_ra mé= xi sjana Cristo, ña jín xi ngisa nima ña'an ngajinre xuta xi tjin ngasun'ndio. 20Tunga kjuakixi= nga Cristo ja'ayare ngajinre mik'en. 'Ba kui joni ture chan xi tjun, ngat'a kui xi tjun ja'ayare ngajinre mik'en. 21Ngat'a jotsa'en ngat'are mé= xi kitsa'en jngu xuta ja'e kjuabeya ngasun'ndio, 'ba=nde tsa'en ngat'are mé= xi kitsa'en kja'e xuta kjua'aya nganire xuta ngajinre mik'en. 22Ngat'a jotsa'en ngat'are Adán fesun ngatsi'i xuta, 'ba=nde tsa'en ngat'are Cristo k'uendukun ngani ngatsi'i xuta. 23Tunga jotsa'en nga 'bakore nga jngu jngu 'ba=tsa'en kjua'ayare: Cristo tjun 'ba jaskan xuta xi tse'e nga kjua'e ngani kui. 24Tjun skja'are kjua'ñure ngatsi'i xi batexuma 'ba ko ngatsi'i xi tjinre xa 'ba ko xi tjinre kjua'ñu tsakaiñu, 'ba jaskan singantsja ña batexuma ngaya ntsja Naina xi Na'enchana, 'ba kio kjue ngasun'ndio ya'a. 25Ngat'a Cristo tjinnere nga kuatexumare ka'nda nga ngatsi'i xi stike k'uendungi ngi ndsaku. 26'Ba enemigo xi fet'ani nga sikjekjua, kjuabeyo. 27Ngat'a Na'enchana kitsik'endungi ngi ndsaku Cristo ngayéje xi tjin. Tunga kionga tsu nga kjinik'endungi ngi ndsaku ngayéje xi tjin, tinchja tsejen nga bi ko Na'enchana tijñangi ngi ndsaku Cristo, ngat'a Na'enchana xi 'ba kitsa'en nga kui tjindungi ngi ndsaku ngayéje xi tjin. 28'Ba nga s'e̱ndungi ngi ndsaku Cristo ngayéje xi tjin, 'ba=tsa'en ko Cristo xi Ki'ndire Na'enchana mani singantsja yojore nga k'uejña ngixkun xi 'ba kitsa'en nga ngi ndsaku kis'endungi ngayéje xi tjin. 'Ba 'batsa'en Na'enchana tu kui tajngu tse'e ku̱anni ngayéje xi tjin. 29'Ba tsa bi kjua'aya nganire ngajinre mik'en, ¿jótsa'en machjen nga xuta batenda yojore ngojore mik'en? Tsa kjuakixi nga bi kjua'ayanire xuta, ¿ánñu tsa'enni kibiu? 30'Ba ¿ánñu tetsubanii̱ jngu kjuabenichun xi tu tsjenngichantsjai̱ tsa bi fa'ayare mik'en? 31Ngat'a an nts'ia̱, nyujun nyujun tjenngina̱ kjuabeya. Kjuakixi= xi xin_nuu̱ jotsa'en kjuakixi nga tsja= mana̱ nga makjainnu ngat'a tse'e Na'enna Jesucristo. 32Tsa tu ngat'are mé= xi mejénre xuta, tsa kui kjua kiskjankoña̱ tjiuba ts'en xi tjindu naxinanda Éfeso, tsa 'ba kitsa'aa̱n, ¿mé= xi kitsa'enni_ra̱? Tsa bi kjua'aya nganire mik'en, ¿ánñu bi si'anña jo tsu xuta: “Xinia 'ba s'ia, ngat'a nyujunni kueyaña”? 33Bi ba'e'ndio nga s'e̱jñunu. “Xi tsjenko xuta ch'okun, 'ba=nde ch'okun 'betju.” 34Tikja'etsjen ngañu xi kixi tjin 'ba bi nde minyijeñu. Ngat'a tjin= yak'a ngajinnu xi bi be Na'enchana. 'Ba xin_nuu̱, tuxi ku̱asubaninu. 35Tunga tsa tjin xi 'ba kuetsu: “¿Jótsa'en kjua'aya nganire mik'en? ¿Mé= yojo xi kua'a ngani?” 36¡Xuta chikun! Xujma xi s'entje bi fesu tsa bi tjun s'eyanijin 'ba k'uantjaiya. 37'Ba bi tsa kui xi s'entje kui xi kjuesu, tusa xujma sani, tsa xujma trigo asa kja'e xujma. 38Tunga Na'enchana tsjare isen xujmo xi mejénre sjare, 'ba tsjare nga jngu tsujmi ntje isen jotsa'en nga 'bakore xujmare. 39Jotsa'en tjin kja'e kjuanga kuya xujma ko tsujmi ntje, 'ba=nde tjin kja'e kjuanga kuya yojo ngayeje. Kja'e= kun yojore xuta, kja'e= kun xi tse'e tjiuba, kja'e= kun xi tse'e tjiunise, 'ba kja'e= kun xi tse'e tjiuti. 40'Ba 'ba=nde kja'e kun isen xi tjin ngank'aa ko xi tjin t'anangiu ngayeje, 'ba kja'e tsa'en tsitsejen xi tjin ngank'aa ko xi tjin t'anangiu. 41Tsu'biu kja'e tsa'en tsitsejen, 'ba na'enso kja'e tsa'en tsitsejen, 'ba niñu kja'e tsa'en tsitsejen ngayeje. 'Ba nga jngu jngu niñu xi tjin kja'e kja'e tsa'en tsitsejen. 42'Ba=nde ku̱an nga kjua'aya nganire xuta ngajinre mik'en. S'eyanijin= xi fe'ndu, tunga xi kjua'aya nganire bi nde kjue'nduni. 43Xi s'eyanijin kjuasuba tsja, tunga xi kjua'aya nganire s'e̱=re kjuaje. S'eyanijin= xi inda, tunga xi kjua'aya nganire s'e̱=re nga'ñu. 44S'eyanijin= yojo xi ya'a xuta, tunga kjua'aya= nganire yojo xi Isennixtjintsjere Na'enchana sjare kjuabenichun. Tsa tjin yojo xi tu xuta ya'a, ngu, 'ba=nde tjin yojo xi Isennixtjintsjere Na'enchana tsjare kjuabenichun ngayeje. 45Jotsa'en kua'indut'a enre Na'enchana: “Xuta xi tjun xi Adán 'mi, kui xi kjininda 'ba kitsa'ere kjuabenichun.” Tunga Adán xi fet'ani, kui xi kuán Isennixtjintsje xi tsjare kjuabenichun xuta. 46Tunga mé= xi tsja Isennixtjintsjio bi titjun ndiba, titjun= ndiba xi xuta ya'a, 'ba jaskan xi tsja Isennixtjintsjio. 47Xuta xi tjun chojore t'anangiu kuandakoni, tunga xuta xi majóni ngank'aa jendibajenni. 48Jo kji'i xuta xi chojore t'anangiu kuandakoni, 'ba=nde kun ngatsi'i xi tse'e t'anangiu. 'Ba jo kji'i xuta xi jendibajenni ngank'aa, 'ba=nde kun ngatsi'i xi tse'e ngank'aa. 49Jotsa'en nganda'e kich'a= isenre xuta xi kuandakoni chojore t'anangiu, 'ba=nde tsa'en x'a= isenre xuta xi jendibajenni ngank'aa. 50Xin_nuu̱ kibi, nts'ia̱, nga yojo xi kich'a nganda'e bi ku̱an sa̱ku'ndere ña batexuma Na'enchana. Ninga xi fe'ndu bi sa̱ku'ndere ngajinre xi bi fe'ndu. 51Tjinu'yo kjua'mobi. Bi ngatsi'a kueya, tunga k'uantjaiya tsi'iña. 52Jotsa'en kitsa 'bechja 'ba chjux'a tuxkuan, 'ba=tsa'en kitsa k'uantjaiya kionga kjuane tjio xi fet'ani. Ngat'a nga kjuane tjio, mik'en kjua'aya nganire 'ba bi nde kueya ngisani, 'ba k'uantjaiya tsi'iña. 53Ngat'a yojo xi kich'a nganda'e xi fe'ndu, ku̱an ngani yojo xi bi nde fe'nduni. 'Ba yojona xi 'me nganda'e, ku̱an ngani yojo xi bi nde 'meni. 54'Ba kionga xi fe'ndu ku̱an ngani xi bi nde fe'nduni, 'ba yojo xi 'me ku̱an ngani yojo xi bi nde 'meni, kio= k'uetjusun en xi kua'indut'a enre Na'enchana: “Xi kitsa'en, kui xi kitsikjekjua kjuabeyo. 55¡Ji kjuabeya! ¿Jótsa'en si'an ngani? ¡Ji kjuabeya! ¿Ñá tijña nga'ñu xi sik'enkoni xuta?” 56Ngat'a nga'ñure kjuabeyo, jio. 'Ba nga'ñure jio kjuatexumo ndibanire. 57Tunga ba'e_ra kjuanda Na'enchana xi tsa'en nga ña'an_ra je ko kjuabeya tu ngat'are Na'enna Jesucristo. 58'Bamani, nts'ia̱ xi tsimijaa̱n, kixi tinyo 'ba bi nichojo yojonu. Ngantsjai tangiko nduju xare Na'enna Jesucristo, ngat'a 'yañu nga bi tu kjuatjo xi teño'on nga ña'axat'a_ru kui.

will be added

X\