1 CORINTIOS 11

1Chjunginuu̱ jotsa'en kjengi_ra̱ Cristo. 2Nda 'baxje_nuu̱ nts'ia̱, ngat'a ngantsjai fa'etsjennu ngat'ana̱ 'ba ngat'a 'bejñatjo xi yakuya_nuu̱, mé= xi kitsa'ena̱ 'ba kitsikja'axtiuya_nuu̱. 3Tunga mejénna̱ nga nda ngatas'ejinnu nga Cristo, kui xi ngakure nga jngu jngu xuta xi'in. 'Ba xi xi'in kuán, kui xi ngakure chjunre. 'Ba Na'enchana, kui xi ngakure Cristo. 4Tu'ya xuta xi'inñu xi kue'mo nindaku nga kjuako Na'enchana asa nga sikja'axtiuya en xi tsjare Na'enchana, kui xi bi tjibekun xi ngakure. 5Tunga tu'ya chjunñu xi bi kue'mo nindaku nga kjuako Na'enchana asa nga sikja'axtiuya en xi tsjare Na'enchana, kui chjunbiu bi tjibekun xi ngakure ngat'a jo=ni tsa kis'ejunre kui. 6Ngat'a tsa jngu chjun bi kue'mo nindaku, tusa ngatate ntsjare. 'Ba tsa kjuasuba nga kuate ntsjare asa nga k'uejunre yojore, ngu, ngate'mo nindaku. 7Xi xuta xi'in kuán bi tjinnere nga kue'mo nindaku. Ngat'a kui= xi isenre Na'enchana 'ba kui xi bakutsejen kjuajere Na'enchana. Tunga xi chjun kuán, kui xi bakutsejen kjuajere xi xi'in kuán. 8Ngat'a xuta xi'in xi titjun bi yojore chjun jendibani. Tusa chjun xi titjun yojore xuta xi'in jendibani. 9'Ba bi kjuanda tse'e chjun kuanda xuta xi'in. Tusa chjun kuanda tu kjuanda tse'e xuta xi'in. 10Kui kjuañu tjinnenire kue'moni nindaku xi chjun kuán, tuxi kuakuni nga tjin xi batexumare. 'Ba ngatatsa'en tu ngat'are ankjele xi tjin. 11Tunga ngajinna ña xi makjainna ngat'a tse'e Na'enna Jesucristo, xi xi'in bi tijñat'axinre xi chjun, 'ba xi chjun bi tijñat'axinre xi xi'in. 12Ngat'a jotsa'en nga chjun xi titjun jendibanire yojore xuta xi'in, 'ba=nde tsa'en nganda'e xi'in tsinnire xi chjun kuán. 'Ba ngayéje xi tjin Na'enchana ndibanire. 13Jun suba chusun_ru ngat'are kibi. ¿A nda= tjin kionga jngu chjun kjuako Na'enchana nga bi kue'mo nindaku? 14Jo tjin nga'e ngasun'ndio, ¿a bi 'yare nga jngu kjuasuba nga xuta xi'in sinduju ntsjare? 15Tunga ngat'are jngu chjun, nda= bakure nga nduju ku̱an ntsjare, ngat'a kui xi kitsa'ere nga nduju ku̱an ntsjare, tuxi kue'moni nindaku. 16Tunga tsa tjin xi bi tjijngu kakun ngat'are kibi, ngatjabe nga bi kja'e tsa'en ña'an ngisai ninga xuta xi yak'a xi makjainre ngat'a tse'e Na'enchana. 17'Ba xi xin ngisa_nuu̱, bi nda 'baxje_nuu̱. Ngat'a kioxu nga mañojon, tusaxu ngisa ma xi ch'o nga ko mare xi nda. 18'Ba xi tjun xin_nuu̱ nijmi xi tji'bena̱ nga bakjanyaxu xingiu nga mañojon ngaya ningu. 'Ba tjin= tsajmi xi makjainna̱ ngat'are kibiu. 19Kjuakixi= nga machjen nga kuakjanyo xingiu, tuxi xiaña 'yá= xi kixi sejña ngixkun Na'enchana. 20Kionga mañojon, bi 'ba teño'on jotsa'en yakuyana Na'enna Jesucristo nga tsakjenko jñu xutare. 21Ngat'a kioxu nga bechiu, nga jngu jngu xi tjin ngajinnu ja kjebe ja kjebexu nga kjine xi tse'e. 'Ba tjinxu xi bi sakure xichine 'ba tjinxu xi mach'i. 22¿A tsajainnu ni'ya ña ku̱an xino 'ba s'iu? ¿Ánñu joni tsajmi xi tumé chjire teniko=ñu ningure Na'enchana 'ba teba'e_ru kjuasuba xuta xi tumé tjinre? ¿Jó xin_nuu̱? ¿A nda= k'uaxjenu? Bi nda k'uaxjenu ngat'are kibi. 23Ngat'a Na'enna Jesucristo yakuyana̱ kibi, 'ba kui xi kitsikja'axtiuya ngani_nuu̱. Ndekuini nistjen nga kjiningantsja, kiskjebe niñuxtila. 24'Ba kionga je= kitsjare kjuanda Na'enchana, yakjanya niñuxtilo 'ba 'bi kitsu: “Kibi= yojona̱ xi singantsjaa̱ tu kjuanda tsojon. 'Ba ti'on tuxi kjua'etsjenninu ngat'ana̱.” 25'Ba kionga je kiskine xichine, 'ba nde kiskjebe chutsiun, 'ba 'bi kitsu: “Kui= chutsinbiu xi tibakutsejen kjua xatse xi ti'bendakonu Na'enchana. Ngat'are jinna̱ tis'endakoni kjuabiu. 'Ba ti'on tuxi kjua'etsjenninu ngat'ana̱ ngantsjai nga s'iu.” 26'Bamani, jotjin ndiya nga xino niñuxtilo 'ba s'iu chutsiun, te'beñu nijmi ngat'are kjuabeyare Na'enna ka'nda nga kjua'e ngani. 27Ngu, tu'yañu xi bi skuekun nga skine niñuxtilo 'ba nga k'uiya chutsinre Na'enna, kui xi majngije ngat'are yojore ko jinre. 28'Bamani, nga jngu jngu xuta tjinnere nga sinkjinre kjuafa'etsjenre tsa tsje tjin, kionga kje kjinejín niñuxtilo 'ba nga kje 'biyaá chutsiun. 29Ngat'a tsa tjin xi tuchuba skine 'ba tuchuba k'ui nga bi skuekun nga yojore Na'enna kibiu, kui xi tikanine tajngure je yojore jotsa'en tikjine 'ba tji'bi. 30Kui= kjuañu tjinni ngajinnu nkjin xi sefesun 'ba xi inda tjinre, 'ba je jesun masen. 31Tunga tsa tjun nda sinkjin_ra kjuafa'etsjenna, bi si'anna kjua. 32Tunga kionga Na'enna Jesucristo tsa'enna kjua, kui baku ndiyana xi kjuakixi, tuxi bi cha̱jaña nga si'ankona kjua xuta xi tjin ngasun'ndio. 33'Bamani nts'ia̱, nga ku̱añojon nga kuechiu, chuya_ru xingiu. 34Tsa tjin xi 'ñu bojore, ngatakjen ndaba, tuxi bi xaninejeninu kionga ku̱añajanko xingiu. 'Ba ngat'are kjua xi tjin ngisa ngajinnu, kio= k'uendajia̱n nga̱ kjuikun_nuu̱.

will be added

X\