1 CORINTIOS 10

1Jun nts'ia̱, bi mejénna̱ nga sichiyajiun jó kuánre xuta chingana nixtjin kuatse jan. Nga ngatsi'i kitsjen ngi yufi xi yaku ndiyare 'ba ja'axtiu ndachikun. 2'Ba 'batsa'en ngatsi'i kuajngukoni Moisés nga kisatendajin yufi ko ndachikun. 3'Ba ndekuini xichine kiskinetsi'i xi kitsjare Na'enchana. 4'Ba ndekui nanda kits'ini ngatsi'i xi kitsjare Na'enchana. Ngat'a ngatsi'i kits'i nanda xi 'etjure naxi xi kitsjare Na'enchana, naxi xi kitsjenko. 'Ba kui naxibiu Cristo= nini. 5Ninga 'batsa'en, Na'enchana bi kuatsjare ngat'are nkjin xutabiu, kui kjua tuchuña= kis'enduni mik'en nga'nde t'axin. 6Ngayéje kibi kuán tuxi s'ejñanina joni jngu kjuakusun ngat'ana, tuxi bi simejénña xi ch'o, jotsa'en kitsimején xutabiu. 7Ninga bi nichji_ru na'en xi ntsja xuta mandani jo kitsa'en yak'a xutabiu. Jotsa'en kua'indut'a enre Na'enchana: “Xuta tsik'endu 'ba kiskine 'ba kits'i, 'ba sa'e tsisetjen nga kitsitsjare yojore.” 8Bi siskakua yojona jo kitsa'en yak'a xutabiu, 'ba kui= kjua jesunni kanján mi nga tu jngu nixtjin sa. 9Ninga bi xut'ayakua Na'enchana jo kitsa'en yak'a xutabiu, 'ba kui= kjua kiskinenire tjiuye 'ba jesun. 10'Ba ninga bi tsujeto'on Na'enchana jo kitsa'en yak'a xutabiu, 'ba kui= kjua ankje xi batexumare kjuabeyo kitsik'enni. 11Ngayéje kibi xi kuánre xuta chingana, kui xi kis'ejña kusunna. 'Ba enre Na'enchana kua'indut'a kibiu, tuxi kuaku ndiyanina ña xi tetsuba nixtjin xi je mején kjuet'a. 12'Bamani, xi tsikja'etsjen nga nda kixi sejña, ngatakutsejenre yojore, tuxi bi skajinni ndekuini je. 13Xi kjima ngat'a tsojon nga tichut'ayakonu bi ngisa ts'axtiu ngisa nga ko mare mé= xi kjima ngat'are xuta xi yak'a. Tsik'etjusun= mé= xi nchja Na'enchana 'ba bi sja'nde tsa ngisa 'ñu xut'ayakonu nga ko mare mé= xi ku̱an xukjuakonu. Tusa sja ndiyanu jótsa'en k'uetju nga xut'ayakonu, tuxi xukjuakoninu mé= xi kjua'enio. 14'Bamani tsu'ba, jun nts'ia̱ xi tsimején_nuu̱, tisent'axin_ru jo tsa'en xuta nga tsichjire na'en xi ntsja xuta mandani. 15Tefako_nuu̱ joni xuta xi be mé= xi tsa'en. Nde jun= tikja'etsjenñu tsa kjuakixi mé= xi texin_nuu̱. 16Kionga 'yáa binu tsje nga ba'e_ra kjuanda Na'enchana, ¿a bi jngu yojo maña ko Cristo ngat'a tse'e jinre? 'Ba kionga china niñuxtila xi bakjanya_ra xingia, ¿a bi jngu yojo maña ko Cristo ngat'a tse'e yojore? 17Tu jngu= ma sani niñuxtilo. Kui kjua tu jngu yojo maña, ninga nkjin maña ña. Ngat'a tu jngu niñuxtila china. 18Chutsejen'a chuyo xuta xi tse'e Israel. Xi kjine yojore tjiuba xi ba'ere chje Na'enchana, ¿a bi tu jngu yojo ma ngat'a tse'e chje xi ba'ere Na'enchana, xi s'endusun altar? 19Nga 'bi texia̱n, bi texia̱n nga chjire na'en xi ntsja xuta mandani, ninga yojo xi ba'ere joni chje. 20Tusa kui= xi texia̱n. Chje xi tsja xuta xi tjin ngasun'ndio, isennixtjin xi tsa'exat'are chanayiu tsjare 'ba bi Na'enchana. 'Ba bi mejénna̱ an nga jngu kuon ko isennixtjinbiu. 21Bi ku̱an s'iuyo vasore Na'enchana 'ba ko vasore isennixtjin xi tsa'exat'are chanayiu. Bi ku̱an xinet'o yamixare Na'enchana 'ba ko yamixare isennixtjinbiu ngayeje. 22Tsa si'on kibi, tsunire nga mejénnu nga ku̱astire Na'enchana. ¿A nikja'etsjenñu nga ngisa tjinna kjua'ñu ña nga ko mare Na'enchana? 23“Ma= tsa'aa̱n tume tsajminu”, tsu xuta. 'Ba= tjin tsakaiñu, tunga bi ngayéje kjenndiya. “Ma= tsa'aa̱n tume tsajminu”, tsu xuta. 'Ba= tjin tsakaiñu, tunga bi ngayéje tsja nga'ñuna. 24Ni'yá ngatamangisjai xi tu kjuanda tse'e, tusa ngatamangisjai kjuandare xuta xi yak'a. 25Ku̱an xino tume yojo xi sateña 'ba bi nikja'etsjion tsa kui xi ch'otsa'en k'uejña kjuafa'etsjennu. 26Ngat'a ngayéje ngasun'ndio ko ngayéje xi kio tjin, tse'e= Na'enchana. 27Tsa jngu xi bi makjainre ngat'a tse'e Na'enchana sikjint'enu nga kuangin chino niñu ndaba 'ba mejénnú kuangiun, chino tume xi kueyanu 'ba bi nikja'etsjion tsa kui xi ch'otsa'en k'uejña kjuafa'etsjennu. 28Tunga tsa tjin xi kuetsunu: “Na'en xi ntsja xuta= kuandani kitsa'ere joni chje yojobi”, bi chino. T'echjon_ru yojonu tu ngat'are xi 'ba kitsunu 'ba tu ngat'are kjuafa'etsjenre. 29Ngat'are kjuafa'etsjenre xi 'ba tsu tenchjaa̱, bi ngat'are kjuafa'etsjennu. ¿Ánñu jo tsu kjuafa'etsjenre xuta xi kja'ere k'uechja'ndenire mé= xi ma tsa'aa̱n? 30Tsa tsja_ra̱ kjuanda Na'enchana ngat'are xi kjinia̱, ¿ánñu kuetsuni xuta nga bi nda tjin nga skinaa̱ tsajmibiu kionga je kitsja_ra̱ kjuanda Na'enchana? 31'Bamani, tsa xino asa s'iu asa si'on tume tsajminu, 'ba ti'on tuxi s'e̱jñatsejenni kjuajere Na'enchana. 32Bi 'bejña_ru kjuana'en xuta judío ninga xi bi judío ninga xi makjainre ngat'a tse'e Na'enchana. 33Joni an, tume xi tsa'aa̱n, tsa'en=ña̱ mé= xi matsjare ngatsi'i xuta. Bi tu kjuanda tsa'an mangisjaa̱, tusa kjuandare xi yak'a, tuxi k'uangini.

will be added

X\