TAITUS 1

1Mìŋ́ Pᴐᴐllɛ ra sɛbi hᴐŋ naa ń tɛi. N ɛɛ Kᴐraawiizi baliirɛ di kaa ɛɛ Yeesu Kristo huŋhunni ń wer hiini banla Kᴐraawiizi n lizɛɛ tɛɛ u hiŋ la bá wer yarduu di kaa wer zum u wibii la maa n du yaa hiŋaa naa biini, 2di wer dᴐᴐ miibᴐᴐ la n waa tunaa dᴐᴐwɛ la tamii. Kᴐraawiizi la n waa kara a kanni la, waabuu ŋᴐ a nua saŋa la uŋ faa haa waa durnya tawɛɛ mᴐᴐ la. 3Ka u himmaa kipar saŋa n wa helle, u gil nɛra zum a miibᴐᴐ wia di lii wiŋᴐzi la uŋ gillɛ n na ŋᴐ la biini. Yaa Lɛɛri Kᴐraawiizi labuu gillɛ n wa zum a maa wia di ŋᴐ ń na bagli nɛra. 4N bie Taitus, n na jaamii. Mìŋ́ lulii hiŋaa naa yaa maa n na hiŋ naa biini. Awia i ɛɛ n bie himmaanii. Yáa mɛɛ Kᴐraawiizi ni yaa Lɛɛri Yeesu Kristo hiinii di tɛi bampirsᴐna. 5Miŋ gilii Kirit la, n faa ra nyiŋŋuu lugᴐ i wer tuŋ wia la n faa haa kawɛɛ de la di la bola la maa di ga lizi nabᴐnzi Yeesu hiŋra la maa biini gunla miŋ baglii la bá wer ra binni ba ni. 6Miŋ ŋᴐ í lizi nabᴐnzi naa, ɛɛ́ lizi banla n waa wichᴐgii maa dᴐᴐwɛ nɛra n niŋ ŋᴐ ba wia, ba kaa dᴐᴐ hahkpaŋkpaŋa bɛŋ la. A wesso ba biizi ge n na sɛɛ Yeesu wia, nɛ́ra gilɛɛ wa wer ŋᴐ ba wia alugᴐ ba kpoŋŋoo di ɛɛ dignikpega hina, 7dikuu bɛɛwiai, a dɛkkᴐᴐ nɛr la n na binni Yeesu hiŋra ni n ɛɛ nɛpa nɛ́r maa gilɛɛ wer ŋᴐ u wichᴐgaa ɛɛi maa. Kᴐraawiizi baliirɛ. ú gilɛɛ ra na u hiŋ, di gilɛɛ dᴐᴐ baasi werge, di gilɛɛ ra nyiŋŋi siŋ nyᴐᴐi, di gilɛɛ dᴐᴐ miisᴐᴐh, di gilɛɛ ra nyiŋŋi kebidoŋa. 8ú ɛɛ hᴐᴐhrilɛɛri di ᴐᴐ ra nyiŋŋi winanaa wia. Ɔ'ᴐ dᴐᴐ nfɛrɛ nɛnnɛ di gil u wia maa ra deŋli, dóŋa maa gilɛɛ waa pɛli u ni. Ɔ'ᴐ ra lau u hiŋ nɛnnɛ, 9di ᴐᴐ ra hiŋ Kᴐraawiizi wibii gunla baŋ faa bagluu la ú ᴐᴐ wer ra ŋᴐ Kᴐraawiizi wia ŋmɛnizi gunla anna hiŋ di ra tɛɛ nɛra di kaa wer ra di banla n na hᴐᴐ la wibii bá zum. 10Nɛkpila du de di ɛɛ dignikpega hina di ra ŋᴐ wia pɛɛpɛɛ di ra dar nɛra. Banla n na teŋri hɛna labuu ra dar nɛra werge. 11A wesso nɛra n tᴐ ba nuuzi bá siigi. Ba ra chᴐgi nɛra ni ba diini hina maanii di ra bagli wia la n waa dɛkkɛ bá na kebee a biini. 12Ba bɛl ɛɛ dᴐgtɛɛrɛ di faa ŋᴐ ba wia keŋ, dí, Kirit hina maa ɛɛ karkannaa ani wichᴐg ɛɛraa di dᴐᴐ kɛkɛluu ni yaara. 13Wibiire u faa ŋᴐ gunla. Awia, a di baa wibii bá zum ka bá jaa ra hiŋ Kᴐraawiizi ŋmɛnɛɛ ani wibii. 14Gilɛɛ ra hagzi Jus hina kara la ni wia la banla n vɛɛ wibii n na ŋᴐ bá ra ɛɛ la. 15Di i himmaa biini wesso, kummaa wessoo tɛi. A waa kii. Ka banla n dᴐᴐ wichᴐgaa ba biine, ba waa yarda dᴐᴐwɛ la, kummaa ra kiiu. Ba biine nfɛssi ni ba biine wia maa doŋŋoo. 16Ba ŋᴐ ba zum Kᴐraawiizii. Ka ba wiɛɛlaa biinii i chi zum lugᴐ ba waa Kᴐraawiizi zummɛ. Ba ɛɛ nɛjagazii. Ba waa wia ra nuu. Ba waa wer winanaa maa ɛɛi.

will be added

X\