MAAK 4

1Yeesu kaa ba muuzeŋ la nua di waa bagli Kᴐraawiizi wia de. Nɛdamta kaa ba u be di wa baruu. Baŋ kannɛ werge la wia u nyiŋŋi muugbera bɛl di zuu so nii la nyuu ka nɛra la ge chi muuzeŋ la nua. 2U ra bagli baa di ta sɛɛliizi di ra tɛɛ baa di ra ŋᴐ, 3Ií ra nuu! Baal bɛllɛ izee di la u koo ú ga mizi u mia. 4Uŋ gaa mizi u mia la, aŋhina chogli ŋmɛnɛɛ. Zumbizi wa hᴐᴐzaa di. 5Aŋhina chogli bii bᴐr. An chogli bii bᴐr la, hɛɛhraa n waa hoo de nɛnnɛ la wia, a lii manaŋ. 6Ka wiizi n wa baŋŋɛ di lᴐ a ni, a yᴐl di siu dikuu aŋ waa lunne dᴐᴐwɛ nɛnnɛ la wia. 7Aŋhina ge chogli sᴐᴐhri biini di lii. Sᴐᴐhri la ge lii di tᴐ a ni. A waa wette du bee. 8Aŋhina ge chogli hɛri bᴐnanii di lii di hel di du bee tokko ni kpᴐrgᴐzi, tokko ahorogaa, ni kalfazi. 9Yeesu ŋᴐ ba be, Hinla maa n dᴐᴐ digna di ra nuu wia, gil a ra nuu nɛnnɛ. 10Uŋ haŋ ga du u bɛŋ, banla n ᴐᴐ ra hiŋuu la ni u hiŋra fidibanɛɛ la ba di wa pɛɛzuu u sɛɛliizi la zɛɛzi. 11U ŋᴐ ba be, Kᴐraawiizi tɛɛ iabuu ií wer zum u kora wisuahlaa. Ka banla n waa hoo yaa be la, sɛɛliizii n ᴐᴐ ta di ra tɛɛ baa, 12á ra zuu ba digna ka bá zum a zɛɛ huhzi, di kaa aah siwii bá zum a wia ŋmɛnɛɛ ka zumuu huhzi. Di ba faa zum a zɛɛzi, ba bampiree daŋ faa bir, Kᴐraawiizi faa gil ba wichᴐgaa tɛɛ baa. 13U pɛɛzi baa, Ii waa sɛɛlii naa zɛɛ zummɛa? Di ii waa unnii zɛɛ zummɛ, ɛrɛɛ ií ɛɛ zum anla n kawɛɛ la zɛɛzɛi? 14Baal la n na mizi mia la, a ɛɛwᴐᴐ lugᴐ n wiŋᴐzii u ra mizi la. 15Mia la n chogli ŋmɛnɛɛ la, aabuu banla n nuuwɛ, ka Sitaani ɛɛ manaŋ di wa lizi a wiŋᴐzi ba bampiree biini. 16Anla n chogli bii bᴐr la ge, wikpannɛ. A hᴐl la ban nuuwɛ la, ba bᴐra sᴐᴐnᴐᴐrɛ. A par baa, 17ka ba bampiree waa lauwɛ nɛnnɛ. Ba ᴐᴐ hiŋ tama, ka di ba haŋ waa di dᴐgnya di ra na tᴐᴐrᴐᴐ dikuu wiŋᴐzi la wia, manaŋ, ba vɛɛa ha. Ba waa kaa ra hiŋ. 18Anla ge n chogli sᴐᴐhri biini la, aabuu banla n nuu a wiŋᴐzi, 19ka ba miibᴐᴐni wia zuu ba nyuuni la. Kebinyiŋŋaa du ba bampiree di ra dar baa. Kuŋkpila nyiŋŋaa gba du de. Awia wiŋᴐzi la waa wette na bᴐr di chᴐᴐ ba bampiree. Ba wia ɛɛwᴐᴐ lugᴐ mia la n du bee huhzi la. 20Anla ge n chogli hɛri bᴐnanii la, aabuu banla n nuu wiŋᴐzi la, ba bampiree lawaa. A du bee tokko ni kpᴐrgᴐzi, tokko ahorogaa ni kalfazi la. 21Yeesu pɛɛzi baa, Di nɛr choŋŋi fintina, u daŋ sɛɛ kpa kɛɛgᴐ chig u nii? Gɛɛ u daŋ kpaubuu suah gado zɛɛi? Akai! U daŋ kpaubuu hᴐŋ chiŋ ú ra chaani. 22Wia la maa n suahwɛ ii waa ra na la, a maa daŋ ŋmɛnɛ lii bᴐchaaŋ i naa. 23Hinla maa n dᴐᴐ digna di ra nuu wia, gil a ra nuu nɛnnɛ. 24Denii u kaa ŋᴐ ba be, Wia naa maa iinna nuu naa, ií ra pessaa nɛnnɛ. Gunla maga iiŋ ɛɛwɛ tɛɛ ii dᴐŋhiŋ, guŋ magaa ú ge bir ɛɛ tɛɛ ia di kaa jaa. 25Nɛr la n dᴐᴐwɛ daŋ kaa bir na di jaa anla un dᴐᴐwɛ la ni. Nɛr la n waa dᴐᴐwɛ werge ge, ba daŋ lɛɛ u kuntama la un dᴐᴐwɛ la gba u nonii biini. 26Yeesu kaa ŋᴐ, Kᴐraawiizi kora ɛɛwᴐᴐ alugᴐ kooluu bɛl n izee di la u koo ú ga mizi u mia. 27U ga mizi ka la ga chᴐᴐ guŋŋ mia la wa lii. Waa zum gunla maa aŋ ɛɛwɛ lii. 28Hɛri himmaanii ᴐᴐ ra birgaa a ra lii daŋgbazi mᴐᴐ ka haa hel. Aŋ wa helle tuŋ a kpogli hizi di pur nyuuni di bii. 29Aŋ wa biiwɛ, a kumaa genii la. U kpa kizee di la koo di gaa kumaa. 30Yeesu kaa ra nyiŋŋi sɛɛlii bɛl ú bagli baa gunla Kᴐraawiizi kora n duwɛɛ di pɛɛzi baa, Ii zum gunla Kᴐraawiizi kora n duwɛɛ? 31U ɛɛwᴐᴐ lugᴐ daapuza bɛl bii. A daapuza sᴐnnɛ mastad. U bii jikkᴐ di kaali kummaa bii. 32Ka di u wa hello tuŋ, u ᴐᴐ kaali daapuza maa. Zumbizi ᴐᴐ ba di wa du daŋa u nyuu dikuu un dᴐᴐ kelzenaa di lᴐᴐ werge wia. 33Kennaabuu Yeesu ta sɛɛliizi kpilakpila di ŋᴐ Kᴐraawiizi wia tɛɛ baa guŋŋ a wa hel ba nfɛrɛ maga. 34Di sɛɛlii lɛi, waa ᴐᴐ sɛɛ ŋᴐ wii maa di tɛɛ baa. Ka u ni u hiŋra la n wa lii ba bɛŋ, u ᴐᴐ bagli a maa zɛɛzi nɛnnɛ di tɛɛ baawaa. 35A hᴐl hiŋ, wiizi n wa cholle, u ŋᴐ u hiŋra la be, Ya gi muuzeŋ naa baŋgia. 36U hiŋra la gil nɛdamta la ka zuu Y#cheesu be muugbera la biini di kpau ra la. Baŋhina ge zuu muugbessi la aŋhina di duu ra la. 37Banna la la, peuzeŋ bɛl ga izi di ra ta. Nii la ra lᴐ muugbera la werge, u ra mᴐŋ nii di ra nyiŋŋi u su. 38Ka Yeesu du muugbera la lume di sil kaputti di ra chᴐᴐ dᴐᴐ. U hiŋra ga lalluu di pɛɛzuu, Yaa Nabᴐma, yaa n na nyiŋŋi ŋᴐ ya siuzi naa, a guŋ wɛɛ tittea? 39U izi dᴐᴐ di ŋᴐ peu la be, dí ú gilɛɛ kaa ta, ka ŋᴐ nii la be, dí ú siigi! Peu la teŋ. Nii la ge siigi kakpaŋ. Waa kaa ra ziigi gba. 40Yeesu pɛɛzi u hiŋra la, Ɛrɛɛ wiarɛ ii ra ᴐm gunnɛi? Ii ra tɛmbuu yarda naa? 41A tir baa werge. Ba ra pɛɛzi dᴐŋa, Beedee nɛdeere kennei, haali u wer ŋᴐ wia di tɛɛ peu ni nii a wer nuu u nua di siigɛi?

will be added

X\