WIƐƐLAA 27

1Baŋ wa ŋᴐ a wia tuŋ, ba ŋᴐ ba daŋ gil Pᴐᴐl zuu muugbera bɛl ú la Itali hɛri. Ba kpa u ni diitᴐᴐri dia hina baŋhina tɛɛ yagboŋ koori soojazi nabᴐma bɛl ú kpogli baa ra la. U sᴐnnɛ faa Julius. 2N ni baa maa ga zuu muugbera bɛl n lii Adramitium di ra la Eesia hɛri bola la n du muuzeŋ la be la. Masɛdᴐnia hɛri hinuu bɛl n lii Tɛssalᴐnaika ge faa du yaa be yaa nuu maa ra la. U sᴐnnɛ faa Aristarkus. 3Hᴐᴐŋ wa pizɛɛ yaa wa hel Saidᴐn. Julius la ɛɛ Pᴐᴐl nɛnnɛ di tɛu ŋmɛnɛɛ ú la u dammuzi be de bá ga kpogluu tama ka ú bir di ra ba. U la kaa k bir ba. 4Yaa kpa ra la. Peu gaa ta di ra chem yaa ni, yaa bir ga hɛrjiga Saiprus harbᴐᴐ ú tᴐ yaa peu la. 5Yaa ba nii la n dugli Sailisia ni Pamfilia hɛri la di giu di ga hel Mira la n du Lisia hɛri la. 6Soojazi nabᴐma la wer na Alɛzandira muugbera bɛl n na la Itali hɛri di gil yaa zuuu di ra la. 7Yaa waa wette ya na manaŋ ka ra la bᴐᴐih guŋŋ hᴐpizaa anɛɛ. A nuu yaa mᴐᴐ ka yaa wer hel Sinaidus. Peu waa sɛɛwɛ yaa deŋli ra la. Yaa bir la hɛrjiga bɛl banna yir Kirit paga bᴐr la peu n waa ta werge, di ga bɛri Salmᴐn 8di ga dugli muu kɛrii di ra la. A kaa nuu yaa werge ka yaa haa hel bᴐr la n dugli Lasia ba ra yir de Fɛɛ Hevins la, 9di birgi de werge. Jus hina hᴐpizizeŋ la banna vᴐᴐ nua la wa bɛri yaa ni gba. Di a saŋa wa bɛrᴐᴐ, muuzeŋ la waa ᴐᴐ kaa ɛɛ zuui. Awia Pᴐᴐl karfi baa 10di ŋᴐ, Di yaa ra la filaŋkeŋ yaa daŋ ga zuu tᴐᴐrᴐᴐ biini yaa ni yaa muugbera ni u bunni maa ta. 11Ka soojazi nabᴐma la waa nuuwɛ tɛɛ Pᴐᴐl ka ra hiŋ a muugbera balaa nabᴐma ni a muugbera hiŋ nuuzi. 12Baabuu ŋᴐwɛɛ lugᴐ bᴐr la waa wer ban niŋ lau muugbera la chiŋŋi de a peuzenaa saŋa la. Ka Kirit muugbessi chigni bᴐr bɛl du de ba ra yir de Finisia. Ba galga maa ra ŋᴐ dí bá izi ra la bá vii wer hel de mᴐᴐ di ga du de ka á peuzenaa saŋa wa bɛri. Denii niŋ wer tᴐ baa peuzenaa la ni, dikuu bɛɛwiai, wiicholii bariirɛ ɛɛ a muu bᴐr, wiifurii ni wiikakag barii ge ɛɛ u muu baŋgia. 13Denii peu la n wa bittɛ di lii nomɛɛl keŋkere di jaa ra ta tama tama, ba binni lugᴐ ba jaa na ŋmɛnɛɛrɛ bá ra la. Ba lalli a muugbera lugbii la n ᴐᴐ lawuu chiŋŋi la ka ra la di ga ga muu kɛrii di ra kaali. 14Tama di peuzenzeŋ bɛl izoo. Waabuu ᴐᴐ lii wiifurii di chum werge la. 15U lii a hɛri barii di waa yag yaa muugbera. Yaa yoou huhzi. A muugbera waa kaa wer ra la see, ka hanna la bᴐr la a peu n tawɛɛ di ra la la. 16Yaa wa hel hɛrjiga bɛl banna yir Kauda harbᴐᴐ. U tᴐ yaa a peu tama ka u haa ra yoo yaa. Yaa kuuh werge maa 17ka haa wer lalli gberjiga la n choŋŋi harbᴐᴐ di ra hiŋ la di vᴐᴐu nɛnnɛ. Baŋ wa vᴐᴐu la, ba kaa vᴐᴐzi muugbera la maa. Bᴐdɛdɛrɛ bɛl du de ba ra yiruu Sirtis. Ba maa ra fᴐŋ lugᴐ peu la daŋ taa baa la bá ga far. Awia ba gil wɛjɛzeŋ la n du a muugbera nyuu la tuu hɛri ka peu la taa baa guŋŋ ba ra la. 18Hᴐᴐŋ wa pizɛɛ di a peu haa ra ta werge. Ba lizi muugbera la bunni di ra ta a nii biini. 19Hᴐᴐŋ kaa pizi ba kaa lizi a muugbera kuna aŋhina ge di kaa ta. 20Hᴐpizakpila maa biini di yaa waa wette na wiizi. Yaa waa chinchiŋwilaa gba nawɛɛ. Ka peu la haa vɛɛ ra ta werge. Yaa waa kaa ɛɛ tamii lugᴐ yaa daŋ wer lɛɛ yaa hinaa. 21Denii bam birgee ka ba haa waa diwee diwee la, Pᴐᴐl izi ba baaŋ di ŋᴐ ba be, N nabᴐnzi, di ii vii nuu wii la miŋ faa ŋᴐwɛɛ ŋᴐ ií gilɛɛ gil ya lii Kirit mᴐᴐ la, wii naa vii wàá na yaa, yaa kuna maa chᴐgi keŋ. 22Ka n na suŋŋi ia ií nuu n be di gil ii bᴐra sᴐᴐni. Muugbera naawaa daŋ chᴐgi, ka ii bɛl maa wàá siu. 23Kᴐraawiizi la n dᴐᴐŋ di gil n na hum u huma labuu bagliŋ guŋ. U gillᴐᴐ u mɛlika bɛl ba n be dɛɛla hamuŋa ni, 24di wa ŋᴐ, Pᴐᴐl, i daŋ chi yagboŋ koori Siiza be. Kᴐraawiizi dawii guŋ. Awia gilɛɛ ra ᴐm. Bannii maa i ni baa n du muugbera naa biini naa ge, Kᴐraawiizi nuuwᴐᴐ tɛi di ŋᴐ u daŋ lɛɛ ba gba. 25Awia yaabalaa, ií maa gil ii bᴐra sᴐᴐni. N yardi Kᴐraawiizi lugᴐ gunla uŋ ŋᴐ n be la, guŋ himmaanii niŋ ɛɛ. 26Ama yaa daŋ wa ta hɛrjiga bɛl. 27Denii hamuŋzi fidaanaazu hiŋ wa hel, di peu la haa ra yoo yaa Adira muuzeŋ la biini. Hɛuh n wa hɛɛhzɛɛ di muugbera balaa la tami lugᴐ ba jaa ra dugli hɛri bɛllɛ. 28Ba kpa kuŋ di du nii la biini di mɛgzuu ra na. U luŋzi ɛɛ naagaliŋgazi kalfa ni tokko. Tama ba kaa mɛgzi na. U kaa ɛɛ naagaliŋgazi tokko ni kpᴐrgᴐ. 29Ba jaa ra fᴐŋ lugᴐ a muugbera daŋ lii bia ni di purgi. Ba lau muugbera la lugbia anaazu di gil a tuu a nii biini a muugbera har á lawuu chiŋŋi, ka ra suŋŋi Kᴐraawiizi hᴐ'ᴐ pizi b'ᴐr chaani baa. 30A muugbera balaa baŋhina ra nyiŋŋi ba chᴐ lii muugbera la biini di gil muugberjiga la tuu nii la biini di ra nyiŋŋi ba dar yaa lugᴐ ba daŋ kpa lugbia di lau a muugbera see ge. 31Ka Pᴐᴐl ŋᴐ soojazi ni ba nabᴐma be, Di nɛra naa lii muugbera naa biini, ii wàá na ii hinaa. 32Soojazi la ga chaahzi muugberjiga la ŋmɛnni u chol nii la biini. 33Hᴐᴐŋ waa nyiŋŋi pizaa, Pᴐᴐl suŋŋi ba maa werge, Ií di diwee. Hᴐpizaa fidaanaazu maa iinna fᴐŋ wii la n niŋ wa ɛɛ ia naa wiarɛ ii haa waa sɛɛwɛ ii di kummaa la. 34Awia n na suŋŋi iabuu, ií nyiŋŋi diwee di di, di wer dᴐᴐ fᴐŋŋa di wer na ii hinaa wia naa biini, dikuu bɛɛwiai, ii yemmaa waa ba ɛŋ tai. 35Uŋ wa ŋᴐ guŋ, u kpa paanuu di suŋŋi Kᴐraawiizi di du u ni ba maa see, ka mᴐnnuu ra hee. 36Denii ba maa bampiree ɛɛ kpaŋ. Ba jaa ra di. 37Nɛra kalfazi anɛɛ ni tokko ahoro ni fidaanumbɛllɛ faa du a muugbera biini. 38Ba maa n wa diwee piŋ, ba kpa mia la maa fug chaari nii la biini ka muugbera la jaa wer du fug. 39Hᴐᴐŋ wa pizi baa, muugbera balaa la waa wette bá zum hɛri la. Ka baŋ wa na a muu bᴐfᴐᴐlii bɛl, de hɛri mɛgzi dᴐŋa ni, ba ta jina dᴐŋa be bá vii wer ga de di gilli, 40di jaa kpa a muugbera lugbia maa ta nii la biini di pur u kuna la ge n ᴐᴐ gil u ra deŋli la, ka kpa wɛjɛzeŋ la di kaa vᴐᴐ chiŋ di lawuu bir peu ra ta u ni u wer ra la. 41Banna la la, ba waa de helle ka zuu bᴐtizaa bɛl. A muugbera nyuu zuu hɛɛhriichaa biini di far de chi. Waa wette lii. Nii ra yag u harbᴐᴐ werge, u ra purgi. 42Denii a soojazi ta jina bá kpu banla ban vᴐᴐzi yᴐlᴐzi la maa bá gilɛɛ wer sᴐŋŋi kaali di foozi ba hinaa. 43Ka ba nabᴐma kuu Pᴐᴐl wia di ŋᴐ bá gil baa, ka ŋᴐ dí banla maa n zum sᴐŋŋaa bá zaah chogli nii la biini di tᴐ see ra lii. 44Banla ge n kawɛɛ, bá kpa muugbera daazi ni kummaa ban niŋ wer kpa a muugbera biini di zaali nii la biini di hiŋ baa lii. Ba maa ɛɛ guŋ di wer lɛɛ ba hinaa di lii nii la biini.

will be added

X\