2 KƆRINT 4

1Kᴐraawiizi suŋ yaa ninɛɛ di tɛɛ yaa huma naa. Awia a waa yaa bᴐra ra yᴐᴐri. 2Yaa vɛɛ wia la baŋ ᴐᴐ suah di ra ɛɛ a dᴐᴐ hiihzi labuu. Yaa waa nɛra ra fugzi. Yaa waa Kᴐraawiizi wiŋᴐzi ra bir di ra kanni u nua. Yaa ra ŋᴐ wibiire a chaani nɛnnɛ nɛ́r maa wer zum u biini lugᴐ yaa wiŋᴐzi dᴐᴐ wibiire ya wer lii Kᴐraawiizi be. 3Di amaniyesuma la yaa n na lizi la suah baŋhina be, banla n leuwe di ra siuzi benii a suah la. 4Sitaani la n dᴐᴐ durnya naa ba ra tᴐgzuu lugᴐ Kᴐraawiizi la tᴐ ba nfɛssii. Waa nyiŋŋi amaniyesuma la n lii Kristo la n dᴐᴐ girme werge di du alugᴐ Kᴐraawiizi n duwɛɛ la be wia wer chaani ba ni bá zumuu. 5Yaa himmaa biini wia lɛi yaa ᴐᴐ ra ŋᴐ. Yeesu Kristo wiarɛ yaa ra ŋᴐ. U ɛɛ yaa maa Dᴐᴐrii, yaa ge ɛɛ ii balaa dikuu u wia. 6Kᴐraawiizi la n faa ŋᴐ b'ᴐr chaani bᴐbiri la maa chaani la, waabuu chaani yaa ge biine di chaani yaa siwee yaa wer zum u girmezeŋ la yaa n nawɛɛ Kristo ni la. 7Wia naa maa yaa n zummɛ naa, a maa ɛɛwᴐᴐ lugᴐ baŋ ᴐᴐ kpa kunnanii di du vii biini. Yaabuu a vii. Yaa waa kpeg. Ka u kpa u huma labuu di tɛɛ yaa yaa wer ra humaa. U ɛɛ gunnɛ ú bagli lugᴐ fᴐŋŋazeŋ la lii u benii. Waa yaa be liwɛɛ. 8Yaa ᴐᴐ ra na tᴐᴐrᴐᴐ diikpila maanii ka a waa ᴐᴐ wer gɛrgi yaa di wa tuŋ. Wia ᴐᴐ ra tir yaa, ka a waa ᴐᴐ wer ra chᴐg yaa biine di ga tuŋ. 9Nɛra ᴐᴐ ra ɛɛ yaa wichᴐgaa, ka Kᴐraawiiziwaa waa yaa gillɛ ta. Ba lᴐᴐzi yaa di dau. Ka ba waa wette bá kpu yaa di tuŋ. 10Yaa sɛɛwᴐᴐ ya siu Yeesu siu nɛ́ra wer na u miibᴐᴐ yaa ni. 11Yaa n haa dᴐᴐ miibᴐᴐ naa, siu biinii yaa ᴐᴐ haa du dikuu Yeesu wia la, ka nɛ́ra wer na u miibᴐᴐ yaa bᴐrahᴐnsiwaa la biini. 12A ɛɛwᴐᴐ lugᴐ yaawaa ra siwuu, ka iawaa ra na miibᴐᴐ yaa siu la biini. 13Ba faa sɛbᴐᴐrɛ, N yardᴐᴐrɛ. Awiarɛ n ŋᴐ a wia. A guŋ yardaa yaa ge dᴐᴐ di ra ŋᴐ wia la. 14Yaa zummᴐ lugᴐ unla n lalli yaa Dᴐᴐri Yeesu Kristo siu biini la daŋ lalli yaa ge gba yáa ni ia maa wer chi u be. 15Ii wiarɛ yaa ra ɛɛ a maa. Di nɛra ra sɛɛ Kᴐraawiizi nɛsunaa dᴐᴐi la ba wa du kaŋ di ra jaa, jaam la Kᴐraawiizi n niŋ wa na de la daŋ wa du kaŋ di jaa ú na girme nɛnnɛ. 16Awia a huma waa yaa bᴐra ra yᴐᴐri. Yaa bᴐrahᴐna ra gɛrguu, ka yaa biine ra du kpeg hᴐpizibii maa. 17Tᴐᴐrᴐᴐ tama naa n dᴐᴐ tunaa yaa ra di naa, ka a daŋ gil ya ŋmɛnɛ na girme u du kaŋ di siili tᴐᴐrᴐᴐ la ni werge maa di wa bɛri di du de di ra la. 18Kuna la yaa siwee n na na lɛi yaa ra binni. Ka anla yaa siwee n waa na la, aabuu yaa ra binni. Kuna la yaa n na na la daŋ ŋmɛnɛ tuŋ. Ka anla yaa n waa na lawaa daŋ du de hanna la.

will be added

X\