1 KƆRINT 8

1Too. A ka vugkuari ola la wia. Yaa zummᴐ lugᴐ yaa maanii zum wia. Ka newee zumaarɛ ᴐᴐ gil u ra nyiŋŋi sᴐŋ. Nɛnᴐŋŋaawaa dᴐᴐ hiinaare. 2Nɛr la maa n na binni lugᴐ u zum wiarɛ, u haa waa wia zummɛ nɛnnɛ alugᴐ un niŋ vii zum la. 3Ka nɛr lawaa n nᴐŋŋi Kᴐraawiizi, Kᴐraawiizi zunnii. 4Awia, yaa n ᴐᴐ ŋᴐ vugkuari ola wia naa, yaa zummᴐ lugᴐ vug maa waa hoo durnya di ra nyiŋ. Wiizizi gba waa hore, di kpaŋkpaŋ bɛŋ lɛi. Waabuu Kᴐraawiizi. 5Kuna la newea n na yir ba wiizizi ni ba dᴐᴐra la, a kannᴐ werge chiŋ ni hɛri biini. 6Ka yaawaa be, Kᴐraawiizi ɛɛ kpaŋkpannɛ. Waabuu yaa mɛɛ Kᴐraawiizi la. U fᴐŋŋa wiarɛ yaa maa du de la. Yaa Dᴐᴐri ge ɛɛ kpaŋkpaŋ. Waabuu Yeesu Kristo la n ta kummaa di kaa tɛɛ yaa miibᴐᴐ la. 7Ka nɛr maa lɛi zum guŋ. Nɛra baŋhina faa ra ɛɛ vuga wiarɛ a ra mani baa. Awia haali zinaa di ba hee ol la nɛra n kpuwɛɛ tɛɛ vuga la, ba ᴐᴐ haa ra sɛɛu lugᴐ vuga la du denii di ra nyiŋ. Awia ba biine ᴐᴐ chᴐgi di ra tᴐᴐri baa dikuu baŋ haa ra aani la wia. 8Yaa kundiwee lɛi niŋ gil yaa wia par Kᴐraawiizi. Di yaa vɛɛ a dii, a wàá la yaa ni harbᴐᴐ. Di yaa haa ra dia, a wàá la yaa ni see. 9Ama ií ra dazi ií gilɛɛ gil ii guŋ ɛɛi wer dar banla n haa ra aani la ba chol, 10dikuu bɛɛwiai, di ii zum wia naa zɛɛ ka la vugkuari bᴐr di gaa hee ola la, ii dᴐŋhiŋ la n haa ra aani la wa na ia de, u ge daŋ dᴐᴐ bampirii di kutti zuu de di ge ra hee. Ka uŋ haa ra aani la, u biini daŋ chᴐgi di ra tᴐᴐruu. 11Ii chᴐg ii dᴐŋhinnɛ la. Kristo siuwᴐᴐ dikuu u wia, ka ii bir chᴐguu dikuu ii zumaa wia. Nau! 12Di ii ra ɛɛ ii dᴐŋa hina kennaa, ba biine chᴐgi di ra tᴐᴐri baa dikuu baŋ haa ra aani wia naa, Kristoo ii ra ɛɛ wichᴐgaa la. 13Awia di diwee la min niŋ di daŋ bir n dᴐŋhiŋ harbᴐᴐ, màá ka di a diwee di hanna la ń dᴐŋhiŋ la gilɛɛ waa bir harbᴐᴐ.

will be added

X\