Afocarifisi 19

1Nii baiha jataain arajiin dedeeu tonijiaain ereeuruha cachaaurune jana aonacaaunne janate: “Cana ichoteraneein nenaa cana Curuaanaa coroaecuche. Nii itolere ichana naineein, rai necaohacha que necaohachaain, naaonjoaain nihane jaunte cana ichoteraneein Cana Coauneraneein ne. 2Acate esinae rauhijiriin baaso icharaauru coaraain casetecaeraneein ne. Nitohanihane jaunte, rai jaberoco aina cuaain satiin chauratane sacuritaain nenacaauru cachaauru saruhin niha osa quene jaun, nii ene cojoaeloroheri rijijieein nenaa casetecae. Cana Coaunerate rai cachaneein nenacaauru ateinaain nihalune core coaarate que,” naaure. 3Nii baihate nacoaauneein: “Cana ichoteraneein nenaa cana Curuaanaa coroaecuche. Nii chariji bana jianelanaalate ecuun iniha cureein nii ene cojoaeloroheri rijijieein nenaa- Babilonia nese moco cousuruca,” naaure dedeeu tonii. 4Nii janate, curuaanaa nihane jaan rori- trono ichoae lauhaca Cana Coaunerane jana, nacatiha neseeonriaain: “Cana ichoteraneein nenaa cana Curuaanaa coroaaecuche. Nitohanemiin,” naain Cana Coaunera coroaecure, nii coroata choonca jenaain nenacaauru ichauhenaauru, chaen nii jenaain cacha tocorijianeein ichaohin nenacaauru naaonjoainuri. 5Nii janate, nii curuaanaa nihane jaan rori- caje toniin: “Satiin inara canaanainuru, ichauhenaauru, naaonjoaineeichene Cana Coaunera coroaaecuche, nelateein acaneein nihane que casiichene coaarateein neinequichene,” naain toniha erenaane jana aohanrae. 6Chaen nechu tonijiaain toniha arara aina caraturine rijitiinchuru iriha arajii cachane jana aonaaun. Nii janate: “Cana ichoteraneein nenaa Cana Curuaanaa coroaecuche. Inae itolere Curuaanaa neein nihane nunuhetiha cana Curuaanaa, itolere que nelateein, itolere ichana naineraneein nenaa Cana Coaunera. 7Aihane jaun coanete rachoojihacache. Esinae rauhijiriin rai necaohacha que necaohachaain niha Cana Coaunerane coroaaecaache, inae nisirihatiha Carenero Narejeenne jaan cojoanonaa que turuhane jaun. Inae letona jatoraain neruujiha rai comasainu. 8Nitohaneein jereraane jaunte, somajai cajione caohacha jiquihaqui que necoreete nii Carenero Narejeen comasainu. Nii cajione caohacha somajaain jiquihaquiin nenaate, esinae rauhijiriin jeriha Cana Coaunerane rijijieein niicha ranojoineein nenacaauru ne,” naain tonijiaain toni erenaa. Satiin rai cachaneein nenacaauru raa Cana Coaunera Calaohi Jesocurisitone que. 9Nii janate canu rai: “Caa laenaaun: ‘Raotojoeein turuuruhine nii Carenero Narejeen beseta que cotihanohichuru.’ naa caraine baihate: ‘Caa erenaate, inae rauhijiriin Cana Coaunera beratenojoin erenaane,’ ” nae carai nii anjera. 10Nii jana coroaaecaaune coina, nii anjera tijia asaae neseeoriaanune janate: “Coa nitohanai ichana coaauca. Canuhetonaine Cana Coaunera cacha neein neeun, jerichanejeein nii aaine rijijieein. Aihuruha nii ii nejeraauru, acaauru rai aitoha Jesocurisitone rijijieein, naitoonjoan tonoraain nenacaaurune rijijieein. Aihane jaun, Cana Coauneraacha coroaaecu,” nae canu rai nii anjera. Nii Jesocurisito que erenaa techu, profetacuru que beratenojoineein nelu. 11Nii janate dede que ecooca somajaain cabarione jana, nichoae laujuae- nii suujua rijijieein nesineneein curuajai. Acate esinae rauhijiriin baaso icharaauru cachaauru ichao rucujueein, que nejeratenacaauru amuritiin nelu. 12Rai notate jiquihaquiin usi lanaro tocohane. Nii janate, arajiin rai coturi que comai amaane jana, que laenanohineein ne rai curuaa. Leinjiin acaachate nii curuaa coitucuujue. 13Nii jana rai cajionete, ichana que lomonojoin tocohane. Jana rai curuaate: “Cana Coaunera Ere,” nae. 14Nii janate caaijie uure dedeeu anjeraauru- cajione caohacha somajai que necoreeteein- cabario somanerei ichoae uhin. 15Nii janate rai nujuaae caje mitue sabere ajihantiin, satiin lauri lauri nenacaaururu amuritoheraneein nihane cojunacaneein. Acate coata caje nenaa otiha que biji achunequiin, acaauru Curuaanaa niha cureein. Acate, cana tijia que oba shaoquiin, rai baca rocohacane rijijieein, baaso icharaauru coaraain casetecaain, rai nobaeneein casetecocuru que banihateein niicha rucujei- bino que acaauru cocoaa cureein nii itolere que nelateein- itolere ichana naineraneein nenaa Cana Coaunera. 16Chaen techu rai cajione, rai nanaae, naaonjoain que: Reychuru rey-curuaanaacuru Curuaanaa naain laenanohineein ne Acaneei nihane coitucueratera rai curuaa. 17Chaen nechu enoto conohanau chujuhecoha leinjiin anjerane jana coaracaaunne janate, satiin tajaae iniho que lenoneein ecuun jiaauluhin amunacaauru rai tonijiaain: “Chajaauchete netaojiaete tabai lenone que inara coroaatemiin Cana Coaunera. 18Aihate Curuaanaacuru reychuru, soondarooru curuaanaacuru, laraajiin nenacaauru cachaauru, cabariocuru, nichoae cunacaauru, itolere inihocuru, letononelanaala nenacaauru, letononeein nenacaauru, nelatelanaala nenacaauru, nelateein nenacaauru, naaonjoainuri iniho que lenonequiche,” naain ehequiin nii iniho que lenonenacaauru tajaaecuru cotihacane aonaaun. 19Nii baihane, nii necha aansai ataebinae tabai aina, satiin caa chauratane que nenacaauru curuaanaacuru aina sonaana que neeninuru acaauru soondarooru coaraaun. Acaaurute, nii cabario ichoae lauheconaa aina rai anjeraauru sooruhane coina netaojiaaure. 20Nii janate, nii necha aansai ataebinae tabai mucuhin casetecaaure, nii rai profeta- nacatiha neein itolere cojoelanaacojoai ichara aina curuaaecaain. Nii itolere cojoaelanaacojoai ichaane aina cuaainte, nii necha aansai ataebinae tocohaneein niicha ichacuri cojunaca terateein rai ecaanto coroaeraauru cachaauru coritae nii rai profeta niha nocoeti. Nii jaunte, nii profeta niha nocoeti aina curuaaecaain, nii necha aansai ataebinae tabai jaaore ichaaojihane jana, usi conemuri asojoereneein moconaa cuhane. 21Nii jana leeochaaurute, sohin jaonojoinecure, nii cabario somajai choae laujuaain cunaa ujuaae caje mitunaa sabere ajainai que. Nii janate, nii onacaauru iniho quihure nainaain obejeein nii iniho que lenonenacaauru tajaaecuru.

will be added

X\