Ebereeocuru Rai 3

1Canejeraauru, aihane jaun Cana Coaunera ranojoineein, inae rai cachaneein neeichene jaun, niicha icharatenohi icharaanu que niicha tei- Jesocurisitohacha que coaaucuche. Nariha jataain coreniha chabana satonoelanaala esenetaacachene jaun. 2Jerihane rijijieein nere tonoraain niha Jesocurisitone jaunte, niicha icharatei icharaanu que cocoainaain nelu Cana Coaunera. Nii rijijieein techu, Cana Coaunera cachaneein nenacaauru aina, niicha icharatenohi icharaneein nelu Moisesa. 3Charijieein teeinti, niicha jai loreri amurijiriin jataain nelateineein ne loreri ichara, nii rijijieeinte, jataain Moisesa amurijiriin nelateineein nelu Jesocurisito. 4Itolere lorerite, niha icharane jaun neein naaonjoaen. Nete laen Cana Coaunera coaaunaane jaun, neein naaonjoaen itolere. 5Nii rijijieein techu, rai cachaneein nenacaauru rai Cana Coauneraacha icharatei icharaneein nihane jaun, raujiaain nota que coaraain, que niicha beratei beraneein nelu Moisesa. 6Nete laen rai Calaohi Jesocurisito, cana rai cachaneein- rai loreri rijijieein nihacachene amurijiriin, cocoainaain cana inana neein telu. Nii jaunte, rai loreri rijijieein nerichaacheein, esinae rauhijiriin jerihane rijijieein neein, chabana cohajihacachene coiinteein jianelanaala canaacha cohajei cohajihacachene. 7Nitohanihane jaun, rai Quiricha Inoaensi cuhane: “Enene cojoanonaa cuhane inara rai niicha jerei biha Cana Coaunerane, 8jiaonriha inara suujua aohana jerelanaala, aihuruhalu nere tonoraelanaala, nechu acaauru casetecaa Cana Coaunerane cojuhin coaraa cacha areroo ichatane janane rijijieein nihache. 9Ecute jenachoonca jaanacaneein mainajeriin acaauru notajaain, acaauru coroatajanichaaunne saijieein, acaauru casetacaanune coujuha quere tonoraaurenelu- inara foerateracuru. 10Nii jaunna, nii inara foerateracuru aina obajeein: ‘Nechu itolere bana joaenreein rai suujua cuaauruhane jaunte, acaauru que canuhacha coitucueratenaa jerei coitucunaa jerecurene.’ naain: 11Aihane jaun, coatiha acaauru que banihateein canuhacha rucujueihu turuururinaain,” naain biha Cana Coaunera Suujuene jaun ne laenanohineein. 12Aihane jaun canejeraauru, le cacha nequichene- inara netonai nabana cana rai Cana Coaunera beratei esenetaain neeichene jianequichene coataa, que nainaain necohalajiin ichaaoche. 13Nitohaneein nenaa coacuelanaala, jianeein lecacha nequichene jiniiquiin ita suujua lararajiaain neeuche: “Enene cojoanonaa,” naain aitoha Cana Coaunera Quiricha cuhanena jaan que turusihane ajiniha. Nabana inara tabaauru saruhin niha osane, rijitojoeein chatohanai ichaquichene, inara netonai canaacha esenetai esenetaelanaala naitoonjoan tonoraeneeichene coataa. 14Nitohanihane jaun, esinae rauhijiriin Jesocurisito aina nenaa jerichaachene, nii esenetaacachene bana canaacha cohajei que turuhane reeintiaain esenetaacachenete ne. 15Nii coinate: “Enene cojoanonaa cuhane inara rai niicha jerei biha Cana Coaunerane, jiaonriha inara suujua aohana jerelanaala, aihuruhalu nere tonoraelanaala nenacaaurulune rijijieein nihache.” nae Nere Inoaesi. 16“Charijihuru Cana Coaunera ere aonacuruhane saijieein nii baiha nere tonorana jerecurenelu,” naaichena. Acaaurute, satiin Egipto batane caje Moisesaacha rocoorinelu. 17Nii jeelaihuru que techu, nitohaneein nere tonoracurenihane jaun, acaauru que nejerateein acaauru coroatajanihane jianiha jenachoonca jaanacaneein Cana Coaunerane jaun, ichataneu cacha areroo satiin ohacoaaurelu. 18Chaen techu nii jelaihuru, rai nitohaneein nere tonoracurenihane jaun, esinae rauhijiriin acaauru que banihateein niicha rucujuihu enoorenerichaaine que aitelu Cana Coaunera. 19Nii jaunte, esenetacurenihane coreniha nii acaauru que banihateein niicha rucujuihu turuurenerichaaine coitucuhacache raotojoeein.

will be added

X\