Ebereeocuru Rai 1

1Inoaelu jetaote nere bera inoaesihuru- profetacuru aina cuaain araaisaain cana inoaensihuru rai ere Cana Coaunera, ecoetacaaeneein mituhelanaala, taba que acaauru sinihu, taba que letonocuru anjeraauru letoae, acaauru rai ecocohin beeuruhane coina, naaonjoaain. 2Nete laen inae enene Calaohi que nere berate Cana Coaunera, Cana Coaunera nihane coitucuhacache itolereneeinne coina. Nii rai Calaohi aina cuaainte, itolere cana rai chauratane, dede, itolere cautenu rijihuru, itolere cana janonaa, naaonjoainuri coaaunaain niichuru Curuaanaa neein telu Cana Coaunera. 3Nihei chunei cacha niqui Cana Coaunera coaraai. Nete caje uhin canaacaanu rene ecooca rai Calaohine jaun, canaacaanu rohan turuaain coaracaanune jaun, “Naaonjoaan Cana Coaunera,” naain coitucuhacaanu, jeelai Cana Coaunera tocohaneein necaohachaain nichao que ichaohana jaun. Acate Cana Coaunera Calaohineein itolere sirichaneein coaaraneein ne. Acate Cana Coaunera Calaohineein caa chauratane que ohelu, jianacoon osa caje cana mitaeranu que. Nitohaneeinte inae osa caje cana mitaeranu que ohane baiha, rai Inaca Cana Coaunera raotono nichajai que rori- trono ichoae nelauriaa cuelu. 4Jataain rai letonocuru anjeraauru cocoainaane amurijiriinte, rai Calaohi cocoainaelu Cana Coaunera, acaauru amurijiriin nihane coina. 5Nitohanihane jaun, nihei chuni letono anjera rai: “Iite cacalabineein canuhacha jereineein canuhacha teineein nenaaneeicha,” naain irihei Cana Coaunera. Niheichu chuni letono anjera que: “Leinjiin acaacha canu calaohineein nihane janana, Canu, leinjiin inaca neein nereeunicha,” naain irihei Cana Coaunera. 6Caa chauratane que nenacaauru cachaauru que, leinjiin acaacha rai calaohineein nihane coitucueratihane coinate laen: “Quere tonoraain canu coroaaequichene rijijieein, jerichanejeein nere tonoraain coroaaecuche satiin,” nae, rai letonocuru anjeraauru rai, Cana Coaunera. 7Nii rai letonocuru anjeraauru quete laen: “Canu letonocuru- anjeraaurute laen aiha cujuanane rijijieein, usi rijijieein naaonjoaain canuhacha jerei icharaneein neeurureein,” nae Cana Coaunera. 8Jana rai Calaohi quete laen: “Chabana sarinaain itolere Curuaanaa neein- itolere Coaunera neein neeine. Chaen techu chabana satonoenereein caohacha ichaain neeine. 9Nii rijijieein techu caohacha nejesina ichara curuaanaa neein neeina jaun, esinae rauhijiriin baaso ichaain nenacaauru aina nejerateein, caohacha icharaauru belairiquiin. Nii coinane Canu, Itolere Coaunera neein ii Coauneranichaaunne ii teein neeun, ii, jataain leeochaauru amuritoheriin raotojoeein rachoojoeein neeine coina,” nae Cana Coaunera. 10Chaen techu: “Ii canuhacha tei Curuaanaa neeinete, jauriaanejeein nunuhe caje coaauneein niha cana rai chauratanene coina aitiin dede coaaunaailu. 11Satiin iicha coaaunanojoite sareein. Jana iite laen chabana nitajenereeini. 12Inae ecu tihane banate, siriteein saa cajionene jaohin, enachasine que coreein jianaa rijijieein, janonaa coreriquiin. Nete laen, ii chabana satonoelanaala ichaoriquiin,” naelu rai Calaohi rai Cana Coaunera. 13Nii jaun coatiha chuni, rai letono anjera rai: “Chajaaute caraaotono nichajai que nelaauriaena, ii tijia asaae iniha nejeratenacaauru amuritiin tee te coaraaicha,” naailu Cana Coaunera. Chabana nii Calaohi que aitohane rijijieein letono anjeraauru que irihei. 14Nechu raujiaain ichoteratenojoineein nerichaacheeinne rai, cha beraneeichate suujueneein Cana Coaunera tenojoineein neeure rai anjeraauru.

will be added

X\