RUUMIYA 9

1Aha/ ona gwoŋ gana/ eya Ḵrisṯẖos mo. Aha/ dinaki ta ṯor mo. ’Twa/ ma dum pem ḵalki aha/ gwo o e Shi/in Dheleladhelel mo 2ki aha/ takina gi bwan diṯi’d jin caaca mo dhali aha/ dinaki daḵ she/ ’pe’d eya dum pem mo. 3Haali/ aha/ mina ’taki ṯoshi ki aha/ ki is pem minu jee is jwa mo dhali ’ciṯẖ ’twa/ ’pena Ḵrisṯẖos gom gway gi ikam pem gun tana bas pem ka yi’c mo. 4Uni gun ta ’Kwani ma Israyiil mo dhali uni gun ta iya/ kun cila to mii mo dhali uni gun cila monyca mo dhali gwo jin gamu me’d mo dhali gwoŋḵan jin c̱ikunu mo dhali gwo gi luŋu mo dhali gwo jin onu is mo be. 5E uni a’di icil ma idhana baba mo dhali ’pena yi’c buni isi ki buŋgwar is mo tani a’di nta’da Ḵrisṯẖos jin diki’da p̱o/ aris to ’baar mo, a’di jin ta’da Arumgimis jin ’boru mii ki sule/ sule/ ya ye ’ba/ nnii mo. Amen. 6Hili a’di yisa ta gwo ma Arumgimis jin ushki me’d mo yisa. Haali/ uni ’baar gun piyin ’peni uc̱i ma Israyiil mo tani ta uniŋ gana/ ma Israyiil yisa. 7Dhali uni ’baar mo ’koki ta uc̱iŋ gana/ ma Ibrahiim mo haali/ uni ita kun piyin mo ’peni a’di. Dhali hili uni gun pikin ’pena Is/hak mo tani uni ita emen kun yerkunu gway ŋ’ko’d mo be. 8’Pemen gwo yan diki ta jasi gwo gi tana uni uc̱i gi buŋgwar is mo ’te/ uni kun ta uc̱i ma Arumgimis mo. Hili uni ta uc̱i gi gwo jin onu is mo kun ta emen kun yerkunu gway ŋ’ko’d mo be. 9Haali/ gwo jin onu is yansan mo o gwo mo ki: Ki mo c̱aan mo tani aha/ mina doḵ ka nyaŋ’ko’d mo dhala Saarah midi ta gi ya/ mo be. 10Dhali a’di ta jasi kan yisa. Hili si’da/ me’d jin bwaakin ma Rip̱ka uc̱i ki wathiŋ gwaṯẖa ’de/ mo tani ababam bana jin ta’da Is/hak mo tani 11bala ki uni ’konuki dho’th naskina/ mo tani dhali ’koki mii toŋ kamu/ jin ’boro’d mo walla jin shiyi’d mo tani ki bwa ma Arumgimis jin ’kawurkina a’di nṯwa/a/ ki mo jin kwanya a’diya kwany midi di ki sule/ mo tani yisa jasi gom mii yisa, hili goma yuḵ piti mo tani 12a’diyim ṯorkunu gwo ki a’diŋ gwanyjaḵa/ imidi mii to gom a’di jin ta dhuru’c mo be. 13Me’d gwo jin ’kwarkunu mo ka: Yakuub a’di enka/ mo be. Hili Iisu a’di i’teka/ bwa mo be. 14Ana mina i/o kata si’da/? Arumgimis ṯẖu’thki mii mo ’taa? Dhalku/ ki ṯosh kan mo ma. 15Haali/ a’di oki’da Musa gwo mo ki: Aha/ mina miimiiya po/ uni gun miga/ miimii mo dhali aha/ mina ḵo’c eya p̱o/ uni gun miga/ ḵo’c e nycine/ mo. 16Haali/ a’di diki ta to jin ’dap̱a’d e bwa wathi/ mo walla to jin palkunu mii mo hili a’di ’dapa’d ki momiimii ma Arumgimis mo. 17Haali/ Gwo ma Arumgimis kun ’kwarkunu mo oki’da P̱irawn gwo mo ki: Aha/ cukina /e mis mo gom ’kup̱ mii yaaseŋ gana/ mo mmoṯor mom’bi’th pem e /e mo. Wakan ki gway pem minu c̱i ki lala’th e mony’ceshi ’baar mo. 18Dhali kan mo tani a’di miiki mii ap̱o/ unin tiyan tiya mo kun ona bwa a’di mo dhali a’di ’bi’thki’da du unin tiyan tiya kun ona bwa a’di mo be. 19A’di mina umi oyaa/ gwo cikise/ mo ki: Atinta karkina a’di gwo ap̱o/ naskina/ mo? Haali/ kaja midi mish bwam piti roc̱ mo? 20Hili ki /e wathi/ ja midi thoḵa Arumgimis gwo ka nyaŋ’ko’d mo? Mina to jin uḵu o a’di jin uḵ a’diya ki: Atinta uḵa /e aha/ kan mo? 21Aman/uḵa je dina a’di ki ta gi ’bi’th ap̱owa je mmo/uḵ ’pena jeŋ gabula ’de/ yan toŋ’kul bwaŋ kamu/ ki jaro/ mo dhali jaŋ kamu/ jin dinu ki ga/ to mmomiiya? 22Atinta waḵki/ Arumgimis dina gwo ibwa mmoṯor anyor piti mo dhali mmoṯor mom’bi’th piti mo tani a’di ḵalki bwan diṯi’d ki bwa jin ’kuc̱u/ ki ’kari’th mo dhali toŋ’kul bwa ma nyor gun uḵkunu mo tani a’di ita gom mo gi ’ce’duwa ’ce’d sho’k mo be 23mmothosonkina a’di momish mo jin tanu pa gi monycam piti gom toŋ’kul bwa gi momii miim piti mo be. A’di jin thosonkina a’di nṯwa/a/ gom monyca mo 24me’d isi anayi kun yuḵkina a’di mo, yisa jasi ’peni ’Kwani Yahuuda/ uni ’cena yisa si’da/, hili ’peni ’kwani kun ’koki ta ’Kwani Yahuuda/ mo be. 25Me’d ka jiŋ gana/ jin okina a’di gwo eya Huusha mo ki: Uni gwansan kun ’koki ta ’kwanim pem mo tani miga/ yuḵ ki ’kwanim pem mo. Dhala yim jin dinuki en mo tani aha/ mina yuḵ a’di ki jim pem jin enka/ mo be. 26Dhali e mo yan gana/ mo, e mo jin onu gom uni mo ki: Um ’koki ta ’kwanim pem mo tani uni minu yuḵ ki iya/ ma Arumgimis mo, jin di’d ki e mo be. 27Dhali Ishaya a’di cuuki’d mo gom ’Kwani ma Israyiil mo ki: Bala waḵki/ aris iya/ ma Israyiil mina e ’taki wa ki emena si’b gi bwam ma gap mo tani hili jasi unin tiya ki daḵa/ iminu woṯẖ mo be. 28Haali/ Tap̱a midi daḵ bwan dwall gwom piti ’kup̱ mo e mony’cesh ki ’bi’th dhali ki ’ta’b mo. 29Dhali me’d jin ṯorkin ma Ishaya gwo nṯwa/a/ mo tani ki: Waḵki/ Tap̱a Arumgimis gi momis midi diki dhal ana uci mo tani ana mina e ’taki wa ki ’Kwani gi Pan Saduum mo dhali mmowar mo me’d ’Kwani gi Paŋ Gamuura mo be. 30Dhali ana mina i/o kata? Ki ’kwani kun ’koki ta ’Kwani Yahuuda/ kun ’koki ur mo ma ḵar/e isho’k mo dhali bu’th a’di mo, a’di a’di jin ta mo ma kar/e yan gi moŋgam gwo is mo, 31hili ki ’Kwani ma Israyiil kun urki mo ma ḵar/e isho’k jin ’dap̱a’d ki gwoŋḵan jin c̱inu mo tani uni ’koki ha me’d mo mmothim gwoŋḵan c̱aan jin c̱inu mo be. 32Gomata? Haali/ uni ’koki ur a’di isho’k ki moŋgam gwo is mo hili me’d jin ’dap̱u a’di ki mii mo be. Uni golkina wosh jin golki’da gol mo be. 33Me’d gwo jin ’kwarkunu mo ki: Hili aha/ ’thikina Sihyuun wosh c̱aan mo jin midi gol ’kwani mo, wosh c̱aan jin mina uni iṯa’k mo. Dhali a’di jin midi gam a’di gwo is mo tani minu ’koki kar ki mo ma ’the is mo be.

will be added

X\