RUUMIYA 6

1Dhali gwo gi wakata imina ana i/o mo sa/? Mina ana rash ’ko e miinthus ki sule/ mo ’taa? jin min ma ’the i/ish mowa? 2Dhalku/ ki ṯosh kan. Ana gun wukina mo e miinthus mo tani ana mina ’ko ki e e a’di mmana? 3Ki ’kona um ki misha ki ana ’baar gun cuc̱kunu eya Ḵrisṯẖos jin ta’da Yesus mo ’kokunu mo mmocuc̱ mo nyaḵki jwam piti mo ’taa? 4Ana ’kokunu mo mmokan mo kan nyaḵki a’di mo e jwam piti mo. Dhali wakan si’da/ me’da Ḵrisṯẖos mmocukunu a’di mis mo ’peni mowu ki monyca ma Baba mo tani ana si’da/ mina nyaḵ mondiki/en this yan mo be. 5Haali/ waḵki/ ana tana imanwar ki isa ’de/ nyaḵki a’di e jwa jin waki jim piti mo tani ana minu warku/ ki isa ’de/ nyaḵki a’di e mompinum piti jin waki jim piti mo be. 6Haali/ ana misha ki bwan dhamom bana ’koshkunu jwa mo nyaḵki a’di mo, ki buŋgwar is gi miinthus yan minu ’ce’d sho’k mo ki ana mina ’taki ’koki ’ko mo mmota c̱iŋkina/ gi miinthus mo be. 7Haali/ a’di jin wuki’d mo tani a’di di’d ka po/ ’peni miinthus mo be. 8Dhali hili waḵki/ ana wuna mo nyaḵka Ḵrisṯẖos mo tani ana gama gwo is ki ana mina ’ko nyaḵki a’di mo be. 9Haali/ ana misha ka Ḵrisṯẖos a’di jin ’de’kkunu ’peni mowu midi diki wu doḵ/e ki sule/ mo. Mowu ta gi mom’bi’th ap̱o/ a’di doḵ/e yisa. 10Jwa jin wukina a’di mo tani a’di wuki’d gom miinthus mo be me’d ’de/ ki sule/ mo. Hili mondiki/e jin dina a’di ki e mo tani a’di diki’d ki e eya Arumgimis mo be. 11Dhali wakan si’da/ um mini mii dhu is bum ki ku gun wukin mo gom miinthus mo dhali ’ko ki e eya Arumgimis mo eya Ḵrisṯẖos jin ta’da Yesus mo be. 12Dhalku/ ki dhal miinthus wakan mmose ap̱o/ buŋgwar is ga ’cesh bum mo ma mmoṯu’c um mmociḵ gwo ’peni bwam bum mo. 13Walla dhalku/ ki c̱i tom buŋgwar is bum ki miinthus mmota to mmomii mii kun ’coḵa’coḵ mo ma. Hili c̱iyi is bum ka Arumgimis mo ma, me’d ’kwani kun cuyunu mo ’peni mowu e mondiki/e mo dhali tom buŋgwar is bum si’da/ mmota toŋ ḵar/e goma Arumgimis mo. 14Haali/ miinthus midi diki ta gi ’bi’th ap̱o/ um mo, haali/ um ta ’kwani kun wana e ki c̱iŋkina/ gi gwoŋḵan jin c̱inu yisa. Hili um wana e ki c̱iŋkina/ ma ’the ma Arumgimis mo be. 15Haali/ a’di gi wakan mo tani ana mina imii miinthus mo ’taa? Gom ana ’konaki ta c̱iŋkina/ gi gwoŋḵan jin c̱inu mo ’taa? Mmotana ana c̱iŋkina/ ma ’the ma Arumgimis mo ’taa? Dhalku/ ki ṯosh kan. 16Ki ’kona um ki misha waḵki/ um c̱i is bum ki wathiŋ kamu/ mmota c̱iŋkina/ mmociḵ gwom piti mo tani um ta c̱iŋkina/ gi wathi/ jin ciḵa um gwo mo ba/. Waḵki/ a’di midi ’taki ta miinthus mmogam mowu mo, walla waḵki/ a’di midi ’taki ta mmociḵ gwo mo tani a’di nta mii ma ḵar/e mo be. 17Hili ’bora’bor ka Arumgimis mo haali/ um gun ’thissa/ ta c̱iŋkina/ gi miinthus mo tani shwane/ um warkin ki imanha gwo e ’pena duŋ gana/ gom gwoŋ ḵar/e yan jin c̱inu um mmomii mo. 18Dhali mmo’cuḵkunu um ’peni miinthus mo tani um warkin ki c̱iŋkina/ ki mii ma ḵar/e mo be. 19Aha/ ona gwo ki ’twa/ ga ’cesh mo, gom buŋgwar is ga ’cesh bum aṯẖan mo. Haali/ ’thissa/ um c̱i tom buŋgwar is bum ki jiny c̱iŋkina/ ’peni miin ’dap̱ e mo dhali ki miinthus kun eḵa/ eḵ mo tani wakan shwane/ c̱iyi tom buŋgwar is bum ki jiny c̱iŋkina/ ki mii ma ḵar/e mo ma mmodhu gi she/ ki dhelel dhelel mo. 20Ki um ta c̱iŋkina/ gi miinthus mo tani um ’kon ki ’kus mo ’peni miiŋḵar/e mo. 21Hili maman kuna gamkina um ’thissa/ me’dyin ’kona um e mii gun ’the um is shwane/ mo? Haali/ ’pemen gi to gwansan mo tani uni ta mowu mo be. 22Hili shwane/ mmo’cuḵkunu um mo ’peni miinthus mo dhali mmowara um ki c̱iŋkina/ ma Arumgimis mo tani um ta gi maman bum mmodhu gi she/ ki dhelel dhelel mo dhali ’pemen piti ta ji gi moŋ’koki/e ki sule/ ya ye ’ba/ mo. 23Haali/ to jin gamu ki mii jin miinu miinthus mo tani ta mowu mo. Hili a’di jin c̱in ma Arumgimis ki me’d mo tani a’di ta mondiki/e ki sule/ ya ye ’ba/ eya Yesus Ḵrisṯẖos Tap̱am bana mo be.

will be added

X\