RUUMIYA 15

1Ana uni gun ’bitha is mo tani mina mii ḵal to gi uni gun ’ka’da is kun aṯẖa/aṯẖ mo dhali mmo’koki maŋ is bana mo be. 2Dhalki ana ka ’deṯe/ ’deṯe/ maŋa amannyaḵ c̱a’b bana mo gom tom ’borgam piti mmoṯel a’di sho’k mo. 3Haala Ḵrisṯẖos diki maŋ is pitiŋ gana/ mo, hili me’d gwo jin ’kwarkunu mo ki: Awaḵ jin waḵkina uni gwansan /e mo tani uni biṯkina p̱o/ aha/ mo be. 4Haali/ me’d gwo yin jin ’kwarkunu kadhamo/ mo ka tee yin mo tani ’kwarkunu mo mmoye’th ana gwo sho’k mo mmoṯela ṯel sho’k mo dhali mmoroc̱a roc̱ mo gom Gwo ma Arumgimis kun ’kwarkunu mo tani ana mina ta gi mo ma ’teŋ kap̱e/ mo be. 5Dhalka Arumgimis jin ta jin ṯele’da ṯel sho’k mo dhali mmoroc̱a roc̱ mo tani c̱i um bwa mo mmo’ko ki bwan ṯal ’de/ ka rem ’kup̱ isi ki bwa ma Ḵrisṯẖos jin ta’da Yesus mo be. 6Ki umi monṯal ’de/ mo dhali ki ’twan ṯal ’de/ mmokar a’di jin ta’da Arumgimis mo dhali jin ta’da Baba gi Tap̱a Yesus Ḵrisṯẖos bana ki ca mo. 7Hayi ci ka rem ’kup̱ mo ma. Wakan me’da Ḵrisṯẖos a’di hay ki um mo gom monyca ma Arumgimis mo be. 8Haali/ aha/ ṯora um gwo ka Ḵrisṯẖos warki’d ki c̱iŋkina/ e mo jin ’ciṯẖuwa munyjal yis mo mmoṯora Arumgimis gwoŋ gana/ mo mmothim gwo jin onu is yan jin c̱ikunu idhan ibaba mo be. 9Dhali ki mii yan ki ’kwani kun ’koki ta ’Kwani Yahuuda/ mini kar Arumgimis ki ca mo gom momiimiim piti mo be. Me’d gwo jin ’kwarkunu mo ki: Wakan aha/ mina maŋ /e mo e bwaman ’kwani kun ’koki ta ’Kwani Yahuuda/ mo, dhali yuḵ gway gom gway pini mo be. 10Dhali doḵ/e a’di onu mo ki: ’Kunyi bwa mo ma, ayy ’kwani kun ’koki ta ’Kwani Yahuuda/ nyaḵki ’kwanim piti mo. 11Dhali doḵ/e: Maŋi um Tap̱a mo, um ’kwani ’baar mo kun ’koki ta ’Kwani Yahuuda/ mo, dhali dhalka ris ’kwani ’baar ki ’beles maŋ a’di mo. 12Dhali doḵ/e Ishaya o gwo mo ki: Abirman ma Yassa midi p̱u’du/ mo, a’di jin midi cu mo mmota tap̱a ap̱o/ ’kwani kun ’koki ta ’Kwani Yahuuda/ mo, dhali e a’di mo tani mmina ’kwani kun ’koki ta ’Kwani Yahuuda/ nta ga ’teŋ kap̱e/ mo be. 13Dhalka Arumgimis jin ta ji gi mo ma ’teŋ kap̱e/ ’tu’d um ka ris bwaŋ ’kunyga/ dhali moŋḵu’th is e moŋgam gwo is mo, wakan ki mom’bi’th gi Shi/in Dheleladhelel ki um mini ish ka enthus e mo ma ’teŋ kap̱e/ mo be. 14Aha/ ki is pem kap̱u/ gom um iwaḵ pem mo, ki um ki is bum ’tu’dkunu ki piny piny ki miim ’borgaŋ gana/ mo dhali mmo’tu’d ka risa yuḵ mo dhali mmomish cin tiya sho’k ye’th ka rem ’kup̱ mo. 15Hili ka ’ban kuku/ mo tani aha/ ’kwarkina um gwo ki dar gi monyju/ gana/ mo mmorogom um gwo mo haali/ goma ’the jin c̱ikin ma Arumgimis aha/ mo be. 16Mmota amanmii to goma Ḵrisṯẖos jin ta’da Yesus mo gom ’kwani kun ’koki ta ’Kwani Yahuuda/ mo mmota gasiis ma aṯu’c gi gwom ’borga/ ma Arumgimis mo. Wakan ki to jin isi’d gi ’kwani kun ’koki ta ’Kwani Yahuuda/ minu mish bu’th mo a’di jin dhagamkunu ki Shi/in Dheleladhelel mo be. 17Wakan eya Ḵrisṯẖos jin ta’da Yesus mo tani aha/ tana gi ’kup̱ gwo mo mmokar is ki ca mo goma ṯu’c pem goma Arumgimis mo be. 18Haali/ aha/ dinaki mii ka gugundhi/ mo mmoc̱i gwo gom toŋ kamu/ ’de/ hili isi ciki/ a’di jin wagaskin ma Ḵrisṯẖos ki aha/ mo mmodhu ’kwani ’peni ’kwani kun ’koki ta ’Kwani Yahuuda/ mmoha gwo e mo ki gwo mo dhali ki mii mo be. 19Ki mom’bi’th gi jamas mii mo dhali momer dhali ki mom’bi’th gi Shi/in Dheleladhelel mo. Gom mii gi wakan ’peni Pa Urushaliim mo dhali ntagi mo is ’ko’d e Pa Illirikuun mo tani aha/ thimkina gwom ’borga/ ma Ḵrisṯẖos mmoc̱i mo be. 20Wakan mmokar a’di ki tom pem jin guka/ ki e mo mmoc̱i gwom ’borga/ mo e mo jin dinuki mish gway ma Ḵrisṯẖos naskina/ mo ki aha/ mina diki nyaŋ to e mo jin ḵa’ba wathiŋ kamu/ mo be. 21Hili me’d a’di jin ’kwarkunu mo ki: Uni mini hil a’di mo, uni kun ’konuki ṯor a’di ki sule/ mo, dhali uni mini mish gwo ’ban mo, uni kun ’koki ciḵ gwo gom a’di ki sule/ mo be. 22Yan a’di ta ’kup̱ gwo mmononkunu aha/ bway mo me’d ka hony/e mo mmoyaku/ i um mo be. 23Dhali hili shwane/ haali/ aha/ dara ki mo mo goma ṯu’c e bampa/ gwansan ka kukul is mo dhali haali/ aha/ dina gwo ibwa kagahara yil ka ris mmoyaku/ i um mo be. 24Aha/ ṯora ki ya p̱ar um e mo mmomiga/ pe ki tur mo me’d jin miga/ ya Pa Ispaaniya mo dhali mmomina umi sus aha/ m’pen mo e moyam pem imun mo waḵki/ nṯwa/a/ mo tani aha/ mina ’taki kap̱ buṯi um ari’ceenne/ mo. 25Hili shwane/ aha/ yakina ya Pa Urushaliim ki to ime’d mo mmowoṯẖ uni gun dhunu ki she/ ki dhelel dhelel mo be. 26Haali/ ’peni Pam Makiduniyya mo dhali Pa Aḵaa/iya mo tani uni ’borkina bwa mo mmoc̱i ton tiya gom unin tiya kun aṯẖa to mo e bwam uni gun dhunu ki she/ ki dhelel dhelel e Pa Urushaliim mo be. 27Uni ’kokina bwa mmo’bor mo mmomii a’di mo dhali ka jiŋ gana/ uni ’kon ma mure/ m’ba/ mo gom uni mo, haali/ waḵki/ ’kwani kun ’koki ta ’Kwani Yahuuda/ daḵa p̱u’dkin mmopwaḵ to gi shi/in buni bwa mo e mom’bor mii mo tani uni ḵa si’da/ ba/ mini ta imanmii uni to ki mom’bor mii ki to gun isha e uni mo be. 28Gom a’di gi wakan mo tani me’d jin miga/ ’baar mii yan mo tani dhali c̱iki uni to ki ’dantar mo gun tulu is mo tani aha/ mina yaki bway bum e Pa Ispaaniya mo be. 29Dhali a’di mishga/ ki aha/ mina yaku/ i um mo tani aha/ mina yaku/ ki mon’tu’d gi mom’bor mii ma Ḵrisṯẖos mo be. 30Aha/ yip̱a ’kup̱ ’kup̱ ki um mo, iwaḵ, gom Tap̱a Yesus Ḵrisṯẖos bana mo dhali gom mo/en gi Shi/in, ki um mini uṯẖ mo mmonṯal ’de/ nyaḵki aha/ mo e mon’thom bum eya Arumgimis mo gom aha/ mo be. 31Ki aha/ minu ’cuḵ mo ’peni uni gun ’koki gam gwo is e Pa Yahuudiyya mo dhali ka ṯu’c pem jin miiga/ gom Pa Urushaliim mo tani minu mish bu’th mo e uni gun dhunu ki she/ ki dhelel dhelel mo be. 32Wakan ki bwa ma Arumgimis mo tani aha/ mina yaku/ i um ki bwaŋ ’kunyga/ mo dhali aha/ minu wac̱ mo e bampam bum mo be. 33Arumgimis gi moŋḵu’th is midi di e umi ’baar mo. Amen.

will be added

X\