RUUMIYA 11

1A’di doṯka/ gwo doḵ/e mo ki: Arumgimis waḵki ’kwanim piti mo ’taa? Dhalku/ ki ṯosh kan. Aha/ ki is pem tana Wathi/ ma Israyiil mo, emen ma Ibrahiim mo, dhali aha/ tana jim ma waḵ ma Benyamiin mo be. 2Arumgimis diki waḵ ’kwanim piti mo, uni gun ’kawurkina a’di mo. Dhali ’kona um ki misha, Gwo ma Arumgimis jin ’kwarkunu mo o gwo ki Iliyya a’di jin woṯẖki’da Arumgimis gwo is apo/ ’Kwani ma Israyiil mo ’taa? Mmo/o gwo mo ki: 3Tap̱a uni ’koshki /e imanc̱i gwom pini mo. Uni ’ce’dki mo jin karu mmomiiya basa ’cesh gom /e sho’k mo dhali aha/ dhalkunu, aha/ ’de/ mo. Dhali uni ŋap̱ki mondiki/em pem mo. 4Hili Arumgimis thoḵ a’di gwo kata mo sa/? A’di thoḵ a’di gwo mo ki: Aha/ dhukina ’kwani ki is pem kun tana alaap̱i pesu/ mo kun ’koki luŋ ki jiŋ ’kup̱a’dup̱un goma Baal mo. 5Dhali wakan si’da/ ki mo yan mo tani ’kwani ’kokini daḵa/ kun kwanykunu ka ’the mo be. 6Hili waḵki/ a’di ka ’the mo tani a’di diki ta to mmo’dap̱ ki mii mo. Waḵki/ a’di diki wakan mo tani a’the midi diki ta a’the mo be. 7Dhali ki gwonta si’da/? ’Kona ’Kwani ma Israyiil ki bu’th mo a’di jin ŋap̱kina uni mo. Uni gun kwanykunu mo tani uni bu’thki a’di mo. Hili unin tiya ’bi’thkunuwa du mo be. 8Me’d gwo jin ’kwarkunu mo ki: Arumgimis ki c̱i bwa eny’ce’d mo, ki em buni mini ’taki ’koki mish mo mo dhali ’ce si’da/ mini ’taki ’koki ciḵ gwo mo, ntaga teeŋ gana/ yansan mo. 9Dhala Dawuu’d o gwo mo ki: Dhalka ayuḵ jin yuḵa uniya yuḵ mmotul ’kup̱ mo tani warki’d ki mo jin ceshuwa cesh mo dhali ka gume/ si’da/ mo dhali wosh jin gol uni mo dhali jin garr uni ’kus mo. 10Dhalki em buni warkin ki mondhurumi’d mo ki uni mini ’koki mish mo mo, dhali dhalka ap̱om buni mmogomki’d ki sule/ sule/ mo. 11Wakan aha/ doṯa gwo mo ki: A/ki uni golkunu jin mina uni ’taki biṯ mo ’taa? Dhalku/ ki ṯosh kan. Hili gom gwon dhaŋ buni mo tani a’di ip̱u’dkina mowoṯẖ e ’kwani kun ’koki ta ’Kwani Yahuuda/ mo be. A’di gi wakan mo tani a’di idhu ’Kwani ma Israyiil mmota aṯacum bwa mo. 12Dhali waḵki/ gwon dhaŋ buni ta ’pemen pa mo gom ’kwaniny’cesh mo tani dhali waḵki/ miim buni kun ush me’d mo ta tom pa mo gom ’kwani kun ’koki ta ’Kwani Yahuuda/ mo tani bakata ’te/ ’peni ’tu’d buni mo? 13Hili aha/ ṯorkina um gwo mo um kun ’koki ta ’Kwani Yahuuda/ mo. Ma isi me’d jin taka/ amankaru ki she/ gom ’kwani kun ’koki ta ’Kwani Yahuuda/ mo tani miim pem mmomii to mo tani eḵkika/ mo be 14jin minu dhu gwasi ’Kwani Yahuuda/ mmoṯa’c bwa mo dhali ki mii gi wakan mo tani unin tiya takunu is ki me’d mo be. 15Dhali waḵki/ gwo waḵ buni ta ’pemen jin wanuwa wan ’ba/ mo mmoṯal isa ’de/ mo gom ’kwaniny’cesh mo tani mombu’th buni midi ta ’pemen wakata mo? Hili mondiki/e ’peni mowu ’te/ mo. 16Dhali waḵki/ ara gana’th ’peni maman to jin ta jin ṯwa/a/ jin c̱inu mo ta jin ḵogu mo tani wakan si’da/ min ma gabul piti ka ’duntula/ ta jin ’ḵogu mo. Dhali waḵka birman ta jin ḵogu mo tani wakan si’da/ abim piti mo be. 17Dhali hili waḵka bin tiya ḵwa/kunu mo tani dhali /e jin tana ale/ ’te/ ’pena seṯuun jin ’kaki is piti ’te/ ḵamkunu mo e embul buni mo tani mmonyaḵ pa ta ki cwa seṯuun ’te/ mo tani 18dhalku/ ki kar ’ba/ ki ca eya bi ’te/ mo. Dhali waḵki e kar ’ba/ ki ca mo ’te/ tani kayi gwo e ki /e a’di idiki ṯela birman sho’k mo, hili abirman c̱aan jin ṯelki /e sho’k mo be. 19/E mini o gwo mo ki, abi ’ce’dkunu wakan jin miga/ ’taki ta ḵamkin ki a’di mo. 20A’di ta gwoŋ ganayi. Uni ’ce’dkunu mo haali/ uni dar gi moŋgam gwo is mo. Hili /e nṯelki mo gi gamu gwo is sho’k mo ’te/. Wakan dhalku/ ’ba/ ki kar ki ca mo hili doshi ki jiŋ ko/ mo ma. 21Haali/ waḵki/ Arumgimis diki ṯor momiimiim piti ap̱o/ abiny cwa ka ’kup̱ ’de/ mo tani wakan si’da/ a’di midi diki ṯor a’di ki /e mo be. 22Hili a’di mo ma, mo jin miin ma Arumgimis ki bwaŋkush mo dhali mo jin miinuwa jisa ki ’bi’th ka ḵar/e ’peni Arumgimis mo. Jisaŋ ḵar/e yan ’kup̱ ki uni gwansan kun biṯkin mo, hili Arumgimis midi mii ki bwaŋkush gom /e mo waḵki e mini c̱a’b ki sule/ e mo gi bwaŋkush piti mo. Waḵki/ a’di diki wakan mo tani /e si’da/ minu ’ciṯẖ mo be. 23Dhali kan si’da/ gom kun tiya mo tani waḵki/ uni mini ’taki buḵ ’twa/ ’peni mo jin ushu gwo gam is mo tani uni minu ḵam mo be. Haali/ Arumgimis ta gi mom’bi’th mmoḵam uni doḵ/e mo be. 24Haali/ waḵki e ’ciṯẖkunu ’peni cwa seṯuun jin ’kaki ’pen piti ka ’kup ’de/ mo dhali /e ḵamkunu ki c̱a’ckon mo /e jin diki di ka ’kup̱ ’de/ e cwa seṯuun jin c̱u’thkunu mo tani bakata imin ma biny cwa ka ’kup̱ ’de/ ḵam ka nyaŋ’ko’d doḵ/e e cwa seṯuun buniŋ gana/ mo. 25Ki um mini ’koki ’ko ki ji mol mo mo e mohe’k em bum mo tani aha/ ŋap̱a um mmomish gwo ’ban mo, a’di jin ta gwo jin bagu mo, iwaḵa. A/usiny’ce p̱u’dki’d e ’ban gi ’Kwani ma Israyiila tiya mo ntaga waambuhany ’kwani kun ’koki ta ’Kwani Yahuuda/ ’tu’dkunu mo mmopu’d mo be. 26Dhali wakan si’da/ aris ’Kwani ma Israyiil iminu ta is ki me’d mo be. Me’d gwo jin ’kwarkunu mo ki: Ka man’cuḵa ’cuḵ ’ba/ mo midi p̱u’du/ ’pena Sihyuun mo tani a’di midi dhi’th mo gi ushuwa ush gom Arumgimis sho’k mo ’pena Yakuub mo be. 27Dhali a’di yansan midi ta gwom pem jin gamu me’d nyaḵki uni mo, ki aha/ mina ḵal miinthus buni mo be. 28Isi gom gwom ’borga/ mo tani uni ta ’kup̱ ka Arumgimis mo gom gway bum mo. Hili isi gom unim piti kun kwanykina a’di mo tani uni a’di ita ku gi ena a’di gom gway gi ibabam buni kun ’kokin mo nṯwa/a/ mo be. 29Haali/ to kun c̱inu ki me’d mo dhali ayuḵ ma Arumgimis uni ’kon ka ḵanne/ mo. 30Jasi me’d jin ’kokina um mo mmo/usha Arumgimis gwo ha e mo tani hili shwane/ um bu’thki momiimiim piti mo gom mo jin usha uni gwo mmoha e mo be. 31Wakan uni ushki gwo ha e mo jin mina uni ’taki gam momiimii si’da/ gom momiimii jin ṯorkunu um mo be. 32Haali/ Arumgimis tulki’da aris ’kwani ’baar ’twa/ mo mmo/ush gwo ha e jin mina a’di miimii ap̱o/ uni ’baar mo be. 33Ayy mmo’kula mo jin tan ma Arumgimis pa ki ’kul mo dhali ayuḵ piti mo dhali momish gwo ’ban ma Arumgimis mo. Mmotheke’th gwon dwall piti wanu imola dhali mmothuḵ bway piti ki e mo tani wanu imola. 34Haali/ kaja mishki’da adun Tap̱a Arumgimis mo walla aja ita’da manlogom a’di gwo mo? 35Walla aja a’di jin c̱iki a’di to jin c̱inu ki me’d mo ki a’di midi ’taki c̱i to ka garr ’kus mo? 36Haali/ ’peni a’di mo dhali ki a’di mo dhali e a’di mo tani aris to ’baar ’kokin mo. Dhali e a’di mo tani dhalki monyca di’d ki sule/ sule/ ya ye ’ba/ mo. Amen.

will be added

X\