GWO JIN ’CEENU MO 9

1Dhala man’doyu gwo jin ’kon ma p̱o/i mudhe’d mo tani dhalki’da poomem piti me’d mo, dhali aha/ p̱arkina cul e mo mmobiṯu/ ’peni momis a’cesh mo, dhali a’di c̱ikunuwa mup̱tha/ ki jis jin shu’d jin dar gi ’pemen mo. 2Dhali a’di ki ḵa’d moshu’d gi jis jin dar gi ’pemen mo, dhali ’peni moshu’d gi jis yan mo tani aku’d cuki mis mo me’d dhana ku’d jin caaca ’peni mo jin ’thanu o’d ki wur wur mo, dhali atente/ dhali bul mis ’kokin mo mmodhuruma dhurum mo ka ku’d ’peni jis shu’d yan mo be. 3Dhali ’pena ku’d yan mo tani ameeŋkuuyu/ p̱u’dkin ap̱o/ mony’cesh mo dhali uni c̱ikunu mom’bi’th mo mmowa e ki mom’bi’th ma ’daḵ mo e mony’cesh mo. 4Uni ṯorkunu gwo mo mmo’koki shi/ asho e mony’cesh mo, walla aris mo gunn kun dhii/in mo, walla cwa gunn mo, hili jasi ’kwani gwansan kun ’koki ta ga ’diŋkila/ ma Arumgimis e buyem buni mo tani 5uni idhalkunu uni bway mo mmoc̱i isa nyor ki me’d mo ka ppe ’kup̱i mudhe’d mo, hili yisa mmo’kosh uni jwa mo, dhali thulany buni wana e ki thulany ma ’daḵ mo ki a’di wo’cki ’kwani mo be. 6Dhali ka cim gwansan mo tani ’kwani mini ŋap̱ wu mo tani dhali uni yisa mini gam a’diya. Uni mina bwa o kagahara mmowu mo dhali wu midi gus ’peni uni mo be. 7Dhali jamas ma kuuyu/ gwansan mo tani uni wana e ki shumarum kun thosonkunu is mo gom mo ma mee mo. E ’kup̱ buni mo tani uni takin gi toŋ’kup̱ kun wana e ki toŋ’kup̱ ’dolkon gana/ mo. Jis/em buni wana e ki jis/eŋ ’kwanim pa mo, 8amur is buni wana e ka amur’kup̱ gi up̱ mo dhali shem buni wana e ki she/ ma dhop̱ mo. 9Uni takin gi nyahara/ kun wana e ka rac̱pa/ kun ta toŋḵuthu’d mo, dhali is ma bim buni alki is mo me’da risa arabiya kun dirkina shumarum mo mmoya ŋwac̱a/ e mo ma mee mo be. 10Uni takin gi thin kun wana e ka ’daḵ mo dhali wo’c buni mo, dhali mom’bi’th buni mmoshi/ ’kwani mo ka ppe ’kup̱i mudhe’d mo ishki’d e thin buni mo be. 11Uni takin ga maliḵ ap̱o/ uni mo a’di jin ta’da man’doyu gwo gi jis jin dar gi ’pemen mo. Gway piti yuḵu ki ’twaŋ ’Kwani Ibraniyiin ka Abadduun mo, dhali ki ’twaŋ ’Kwaniŋ Griḵi a’di yuḵu ka Abulliyyuun mo. 12Dhali awayyi jin ta jin ṯwa/a/ peki’d mo. Hili mo mo ma, awayyi jin ’kon ma p̱o/i su/ mo a’di diyi’d mmomii p̱u’du/ mo. 13Dhali yan’ko’d aman’doyu gwo jin ’kon ma p̱o/i pe’de/ mo dhalki’da poomem piti me’d mo, dhali aha/ ciḵkina ’twa/ ’peni ce kun ’koni doŋon ’pena gwaṯa/ jin ta ’dolkon gana/ jin di’di bwambor ma Arumgimis mo 14mmo/o gwo mo eya man’doyu gwo jin ’kon ma p̱o/i pe’de/ mo, a’di jin ta’d ga poome/ mo ki: ’Cuḵi iman’doyu gwo kun ’koni doŋon mo, uni gun deḵkunu mo eya dhan ḵumma/ yi’de/ jin yuḵu gway ka Elp̱uraat mo. 15Wakan iman’doyu gwo kun ’koni doŋon mo tani uni ’cuḵkunu mo, uni gun bu’thkunu me’d mo mmothoson is mo goma saa mo dhali goma tee mo dhali goma ppe mo, dhali gom yil mo, mmo’kosh ’ban gi ’kwani kun ’kon ma p̱o/i kwara a’cesh mo. 16Dhan mondeŋ ma thuruḵ ma mee kun mer shumarum ap̱o/ mo tani ’koni alaap̱i ’kume’d mar is doḵ/e ka alaap̱i ’kume’d mo dhali doḵ/e mar is ka alaap̱i ’kume’d mo. Dhali aha/ ciḵkina dhan mondeŋ buni e mo. 17Dhali tonyjan pem jin p̱arkika/ e mo tani shumarum wana e ciki/ mo. Dhali uni gun mer shumarum ap̱o/ mo tani uni hi’thkina rac̱pa/ mo ki jamas gi mo/o’d mo dhali jamas gi wosh jin ta ’pinyamaṯẖ mo dhali jamas gi wosh jin si’da ’kwani mo jin c̱a’bki go’d go’d mo, dhali ’kup̱ shumarum wana e gi ’kup̱ ma dhop̱ mo, dhali o’d dhali aku’d dhali wosh jin si’da ’kwani mo gac̱ki’d ’peni ’twam buni mo be. 18Ki to gwansani kwara kun ’koshi ’kwani is ka nyor mo tani ’ban gi ’kwani kun ’kon ma p̱o/i kwara kun ’kon e mony’cesh mo tani uni ’koshkunu ki o’d mo dhali ka ku’d mo dhali ki wosh jin si’da ’kwani mo jin gac̱ki’d ’peni ’twam buni mo be. 19Haali/ mom’bi’th gi shumarum mo a’di diki’d e ’twam buni mo dhali e thin buni mo. Thin buni waki tasha/ mo kun takin gi ’kup̱ mo, dhali ki uni mo tani uni ki dhu ’kwani jama/ i is mo. 20Dhali ’ban gi ’kwaniŋ kamu/ mo, uni gun ’konuki ’kosh mo naskina/ ki isa nyor yan jin woci ’kwani is she/ mo tani uni ’koki rica du is mo ’peni mii gi me’d buni mo walla dhala ruma ’cesh luŋ ’pen mo dhali tomp̱inycon kun uḵu ’peni ’dolkon gana/ mo dhali ’dolkon kush mo dhali akoroḵ mo dhali wosh dhel mo dhali cwa mo, uni kun mol mo p̱ar e mo walla ciḵ gwo mo walla ii ki sho’k mo. 21Walla uni si’da/ ’koki rica du is mo ’peni mo ma meem buni kun ’kosha uni mo walla mii ma rum buni kun miina uni mo walla miinyc̱al buni kun miina uni mo walla mii ma ’dim buni kun miina uni mo.

will be added

X\