GWO JIN ’CEENU MO 7

1’Ko’di mii yansan mo tani aha/ p̱arkina iman’doyu gwo e mo kun ’koni doŋon mo mmodosh eya rukun gi mony’cesh kun ’koni doŋon mo mmobu’th ’tham kun poshkin me’d mo ’peni mony’cesh kun ’kona shem ’pena bi idoŋon mo, ki ’thama kamu/ midi ’taki diki poshu ap̱o/ mony’cesh mo, walla e ḵumma/ yi’de/ mo walla ap̱o/ cwaŋ kamu/ mo. 2Yan’ko’d aha/ p̱arkina man’doyu gwoŋ kamu/ e mo jin shinkunu mo ’peni mo jin sul ma tente/ mo ka ’diŋkila/ ma Arumgimis jin di ki e mme’d mo, dhali a’di yuḵki’da yuḵ ki dhan ’twa/ jin caaca kagahara mo e iman’doyu gwo kun ’koni doŋon mo, uni kun c̱ikunu mom’bi’th mo mmoshi/ mony’cesh mo dhali ḵumma/ yi’de/ mo 3mmo/o gwo mo ki: Dhalku/ mony’cesh ki shi/ is mo walla ḵumma/ yi’de/ mo walla aris cwa mo, ntagi ana mina ’dap̱a ’diŋkila/ ap̱o/ imanmii to ma Arumgimis bana mo e buyem buni mo. 4Dhali aha/ ciḵkina dhan mondeŋ gi uni gun ’dap̱kunuwa ’diŋkila/ mo mmota alaap̱i iss ’kwanimpa ipesu/ mo i’ce’dka doŋon ap̱o/ mo, uni gun ’dap̱kunuwa ’diŋkila/ mo ’peni arisa waḵ kun ’kona e ki she/ ki she/ mo ’peni iya/ ma Israyiil mo, 5alaap̱i ’kume’d i’ce’dka su/ ap̱o/ mo, uni gun ’dap̱kunuwa ’diŋkila/ ’pena waḵ ma Yahuuda/ mo, dhali alaap̱i ’kume’d i’ce’dka su/ ap̱o/ mo, ’pena waḵ ma Ra/ubiin mo, dhali alaap̱i ’kume’d i’ce’dka su/ ap̱o/ mo, ’pena waḵ ma Jaad mo, 6dhali alaap̱i ’kume’d i’ce’dka su/ ap̱o/ mo, ’pena waḵ ma Ashiir mo, dhali alaap̱i ’kume’d i’ce’dka su/ ap̱o/ mo, ’pena waḵ ma Nap̱taali mo, dhali alaap̱i ’kume’d i’ce’dka su/ ap̱o/ mo, ’pena waḵ ma Manassa mo, 7dhali alaap̱i ’kume’d i’ce’dka su/ ap̱o/ mo, ’pena waḵ ma Shamuun mo, dhali alaap̱i ’kume’d i’ce’dka su/ ap̱o/ mo, ’pena waḵ ma Lawi mo, dhali alaap̱i ’kume’d i’ce’dka su/ ap̱o/ mo, ’pena waḵ ma Yassaakar mo, 8dhali alaap̱i ’kume’d i’ce’dka su/ ap̱o/ mo, ’pena waḵ ma Sabuluun mo, dhali alaap̱i ’kume’d i’ce’dka su/ ap̱o/ mo, ’pena waḵ ma Yuusup̱ mo, dhali alaap̱i ’kume’d i’ce’dka su/ ap̱o/ mo, gun ’dap̱kunu ’twa/ ka ’diŋkila/ ’pena waḵ ma Benyamiin mo. 9’Ko’di mii yansan mo tani aha/ hilkina mo mo dhali hili mo mo ma, adhana buhany wathimpa caaca mo jin mina wathin ṯal ’deŋ kamu/ mol deŋ e mo, ’peni aris kal gi ’kwaniny’ceshi ’baar mo, dhali ’peni arisa waḵ gi ’kwani ki she/ ki she/ mo, dhali ’peni ’kwani kun ’kona e ki she/ ki she/ mo, dhali ’peni ’kwanin tiya kun wal ’twa/ ki she/ mo, mmodoshkina uni mbwambor ma ḵursi ma maliḵ mo dhali mbwambori Ari Ḵa’bal mo, mmohi’th burrinyen turga/ kun ta kuŋ kush mo, dhali abiny jeṯẖkum e me’d buni mo be. 10Dhali uni cuun ki dhan ’twa/ kun caaca mo mmo/o gwo mo ki: Mowoṯẖ ta ji ma Arumgimis bana mo, a’di jin c̱a’bki’d eya p̱o/ ḵursi ma maliḵ mo dhali e Ari Ḵa’bal mo. 11Dhali aris iman’doyu gwo ’baar mo doshkin ki mis mo mmo’kam a’di is mo, ḵursi ma maliḵ mo, dhali mmo’kam ’kwaniŋ gwanyjaḵa/ is mo dhali to/e kun ’koni doŋon kun ’kon ki e mo, dhali uni ṯa’kki bwam/em buni ibwambor ma ḵursi ma maliḵ mo dhali luŋa Arumgimis mo 12mmo/o gwo mo ki: Amen. Mom’bor mii mo dhali monyca mo dhali moyuḵ mo dhali mo jin ’boruwa ’bor bwa i is mo dhali montaḵ mo dhali mom’bi’th mo dhali mo/eḵ mo eya Arumgimis bana mo gom ki sule/ mo dhali ki sule/ mo. Amen. 13Dhali yan’ko’d jan ṯal ’deŋ kamu/ ’peni ’kwaniŋ gwanyjaḵa/ ’ka’daa/ gwo me’di is mo, mmo/o gwo mo ki: Ki ija anahannee kun shumkunu ki burrinyen turga/ kun ta kuŋ kush mo dhali ’peni mana ip̱u’dkina uni mo? 14Aha/ ki o a’di gwo mo ki: Gana, /e a’di imishki uni mo be. Dhali a’di ki oyaa/ gwo mo ki: Uni gwansani, ita uni gun piyin mo ’pena dhan monṯo’c bwa mo. Uni lamki burrinyen tur buni mo dhali mii uni ki bany bany ka bas gi Ari Ḵa’bal mo. 15Wakan uni ’kokini bwambor ma ḵursi ma maliḵ ma Arumgimis mo dhali mii a’di to ki montee ilu/ mo dhali ki mon’thiny ilu/ mo e gu’b gi mondheleladhelel piti mo be, dhali a’di jin c̱a’bki’da po/ ḵursi ma maliḵ mo tani a’di midi p̱a’d ki uni adarha’da/ jin ta buŋ’kus piti mo be. 16Uni mina ṯe/ mol ’kosh ki sule/ mo, walla mina yi’de/ ’koki bu’th ki sule/ mo. Atente/ si’da/ midi diki ’kosh uni mo, walla midi diki c̱i’th uni is ki mom’batha’d piti mo. 17Haali/ Ari Ḵa’bal, a’di doshki’di bwaman ma ḵursi ma maliḵ mo, a’di jin ta’da Amanhil uni mo, dhali a’di midi shu uni bway mo e mo jin kasha yi’de/ jin di ki e e mo dhali Arumgimis midi shumuṯa ris jabudhi ’baar mo ’peni em buni mo be.

will be added

X\