GWO JIN ’CEENU MO 20

1Dhali yan’ko’d aha/ p̱arkina man’doyu gwo e mo mmothulu/ ka ’cesh ’peni momis mo, mmota ga mup̱tha/ e me’da bim poros piti mo gom dhan jis jin dar gi ’pemen mo dhala jindhiir mo. 2Dhali a’di ki ’dap̱ dhan tasha/ yan ka nyoḵ mo, dhan tashan dhamo/ yin, jin yuḵkunu gway ki Tap̱a ma Ruma ’Cesh mo dhali ka Seṯaan mo dhali a’di ki deḵ a’di mo gom yil alip̱ mo. 3Dhali a’di ki biṯ a’di mo e mo jin ’kula’kul mo, dhali a’di ki mu’th a’di ’twa/ mo dhali a’di ki ’dap̱ a’di ka ’diŋkila/ ap̱o/ mo ki a’di midi ’taki diki heka ris kal gi ’kwaniny’cesh e doḵ/e mo ntagi yil alip̱ midi di ’kup̱ mo. Dhali ’ko’di mii c̱aan mo tani a’di minu mii dhalu me’d mo gom ari mo mo. 4Dhali yan’ko’d aha/ p̱arkina risa ḵursi ma maliḵ e mo, dhali uni gun ’kokina p̱o/ uni mo tani uni ta uni gun c̱ikunu gwon dwall jin toru gwo ’twa/a ’cesh mo. Dhali aha/ si’da/ p̱arkina ḵashira/ gi uni gwansan kun ’ciṯẖkunu ’kup̱ mo gom gwom buni kun ṯora uni goma Yesus mo dhali gom gwo ma Arumgimis mo, dhali uni gun ’koki luŋ to/e yan mo walla jamas piti jin uḵu mo, dhali uni gun ’koki bu’th jamas piti e buyem buni mo walla e me’d buni mo. Uni p̱u’dkin ki e mo doḵ/e dhali nyaḵ tap̱a ta ka Ḵrisṯẖos ki yil alip̱ mo be. 5Dhali unin tiya kun wukin mo tani ’koki p̱u’du/ mmo’ko ki e mo naskina/ mo tani ntagi yil alip̱ midi di ’kup̱ mo. A’di yansan ita mo jin pinu jin ta jin ṯwa/a/ mo be. 6Mom’bor mii mo dhali a’di jin ḵogu mo tani ta a’di mo a’di jin pwaḵki mompinu jin ta jin ṯwa/a/ mo. Ap̱o/ uni kun wakan mo tani mowu jin ’kon ma p̱o/i su/ mo tani a’di dar gi mom’bi’th ap̱o/ uni mo, hili uni mini ta igasiis ma Arumgimis mo dhali goma Ḵrisṯẖos mo, dhali uni mini nyaḵ tap̱a ta ki a’di ki yil alip̱ mo be. 7Dhali ki yil alip̱ midi di ’kup̱ mo tani aSeṯaan a’di minu dhalu me’d mo ’pena sijin piti mo 8dhali a’di midi p̱u’du/ ka pije/ mo mmoheka ris kal gi ’kwaniny’cesh e mo, uni gun ’kon ki ’ban gi mony’cesh kun ’kona shem ’penabi idoŋon mo, a’di jin ta Pany Juuj mo dhali Pam Majuuj mo, mmotul uni is mo gom mo ma mee mo. Mondeŋ buni uni wana e ka si’b gi bwam ma gap̱ gi ḵumma/ yi’de/ mo. 9Dhali uni yakina ye’th ye’th mo mmohakar mony’cesh ka bor mo dhali mmo’kama ris gu’ba’ku/ gi uni kun dhunu ki she/ ki dhelel dhelel mo dhali ’peŋkuman bampam buni jin enu mo. Hili o’d p̱u’dki’d ka ’cesh ’peni momis mo dhali shwa uni ki ’ci’d’da/ mo. 10dhali tap̱a ma ruma ’cesh jin he’k uni e mo tani a’di biṯkunu mo eya al o’d mo dhali e bwam to jin si’du mo, e mo jin dina to/e mo dhali amanc̱i gwonthus mo, dhali uni minu ’kosh ki isa nyor jin midi wo’c is she/ mo montee dhali ki mon’thiny ilu/ mo ki sule/ dhali ki sule/ mo. 11Dhali yan’ko’d aha/ p̱arkina dhana ḵursi ma maliḵ jin ta gi kush e mo dhali a’di jin c̱a’bki’da p̱o/ a’di mo. ’Peni buŋ’kus piti mo tani mony’cesh dhali momis uni yakina ŋwac̱a/ mo, dhali mo yisa gamu gom uniya. 12Dhali aha/ p̱arkina uni gun wukin e mo, uni kun cakin mo dhali kun gwa’dkin mo, mmodosh mo mbwambor ma ḵursi ma maliḵ mo, dhali arisa warka/ ḵa’dkunu mo be. Dhali awarkaŋ kamu/ si’da/ ḵa’dkunu mo, a’di jin ta’da warka/ gi mondiki/e mo. Dhali uni gun wukin mo tani uni dwallkunu gwo mo me’d gwo jin ’kwarkunu mo e bwam ma risa warka/ mo ki mii kun miikina uni mo be. 13Dhali ḵumma/ yi’de/ c̱iyi ’kwani ka nyaŋ’ko’d kun wukin e a’di mo. Mowu dhali Mo ma Haawiya c̱iyi ’kwani kun wukin e uni mo, dhali aris uni ’baar mo dwallkunu gwo mo ki mii kun miikina uni mo be. 14Dhali yan’ko’d Mowu dhali Mo ma Haawiya uni ṯa’kkunu mo eya al o’d mo. A’di yansan ita wu jin ’kon ma p̱o/i su/ mo, a’di jin ta’da al o’d mo. 15Dhali waḵki/ jan ṯal ’deŋ kamu/ ’konuki gam gway piti jin ’kwarkunu mo eya warka/ gi mondiki/e yan mo tani a’di si’da/ minu biṯ mo eya al o’d mo be.

will be added

X\