GWO JIN ’CEENU MO 2

1Eya man’doyu gwo ma ḵaniisa jin di’d e Pan Ep̱asus mo tani ’kwari gwo mo ki: Gwo ’peni a’di, a’di jin bu’thki’da cul kun ’koni pesu/ mo e me’da bim poros piti mo, a’di jin yaki’d e bwaman ṯirkina/ ma lamba/ kun ta ’dolkon gana/ mo kun ’koni pesu/ mo, mmo/o gwo mo ki: 2Aha/ misha miim pini mo, dhali aṯu’c pini jin miina /e ki mii jin ’batha’ba’th mo dhali mo jin ’kuc̱a /e bwa ki ’kari’th mo mmo’dim ’kup̱ mo dhali mo jin mola /e bu’th ’kwani kun mii ton thus mo hili /e nyo/ki uni gwansan kun yuḵki is buni ki uni kun dhunu ki she/ mo tani hili uni yisa ta uniya, dhali gam uni ki uni ta thus ki thus mo. 3Aha/ misha ki /e ’dimki ’kup̱ mo ki bwa jin ’kuc̱a /e ki ’kari’th mo dhali ḵal mo jin ’koshu is ka nyor mo gom gway pem mo dhali /e yisa cakin mo e mowu is eya. 4Hili aha/ tana gi gwo yaase ap̱o e mo haali e dhalki mo/en jin ta jin ṯwa/a/ jin di’di /e ’pen mo. 5Kayi gwo e mo ’peni a’diyin jin biṯkina /e mo dhali rici /e adu is mo dhali miiyi to jin miina /e nṯwa/a/ mo. Waḵki e diki mii mo tani heeyy, aha/ mina p̱u’dku/ i /e mo dhali joc̱ ṯirkina/ ma lambam pini mo ’peni mom piti mo, isi ciki/ waḵki e diki rica du is mo be. 6Naskina/ toŋ kamu/ jin tana /e a’dihe/. /E shi/ki mii jin miina ’Kwani Nugulawiyiin i e mo, mii jin shi/kika/ i e si’da/ mo. 7A’diyin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. E a’di jin p̱iki mii e mo tani aha/ mina c̱i a’di tonṯe/ mmoshwa mo ’peni cwa gi mondiki/e mo, a’di jin diki’d e monyjaro/ ma Arumgimis mo be. 8Dhali eya man’doyu gwo ma ḵaniisa gi Pan Simirna mo tani ’kwari gwo mo ki: Gwo gwansan ta ku gi a’di jin ṯwa/a/ mo dhali jiŋ ’ko’d mo gom a’di jin wuki’d mo dhali a’di jin p̱u’dki’d mo mmodi ki e mo, mmo/o gwo mo ki: 9Aha/ misha monṯo’c bwam pini mo dhali aha’th’ko’d pini mo tani (hili /e ta pa ki pa mo) dhali uni gwansan kun thu’thkina thu’th ’pen mo kun oki uni ta ’Kwani Yahuuda/ mo tani dhali uni yisa ta uniya, hili uni tan gi gu’b gi montul is ma Seṯaan mo be. 10Dhalku/ is ki ḵo/ mo gom to kun mura /e i’kosh is ka nyor nycine/ mo. Hili mo mo ma, tap̱a ma ruma ’cesh ona bwa ki ṯa’k uma tiya eya sijin mo ki um minu ’taki nyo/ mo dhali ka tee kun ’koni ’kume’d mo tani um mini gam monṯo’c bwa mo. Tayi /e a’di jin ta/a isiŋ gana/ mo mmowu mo dhali aha/ mina c̱i /e toŋ’kup̱ gi mondiki/e mo be. 11A’diyin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. A’di jin p̱iki mii e mo tani a’di iminu ’koki shi/ ki wu jin ’kon ma p̱o/i su/ mo be. 12Dhali eya man’doyu gwo ma ḵaniisa gi Pam Bargaamus mo tani ’kwari gwo mo ki: Gwo gi a’di jin ta’d gi gandala turga/ jin ka’d ka ’ban su/ mo, mmo/o gwo mo ki: 13Aha/ misha mom pini jin c̱a’ba /e mo, e mo jin c̱a’b ma ḵursi ma Seṯaan mo. /E ṯelki sho’k mo e gway pem mo dhali /e diki waṯ gwom pem jin gamu is mo isi kani ka tee ma Antibas mo, a’di jin ta’da man/o gwom pem mo, a’dim pem jin di’d ’de/ mo jin ta isiŋ gana/ mo, a’di jin ’koshkunu mo mbwam um mo, e mo jin c̱a’bkin ma Seṯaan mo be. 14Hili aha/ tana gi ushi gwon tiya idaḵa/ mmo/o ap̱o e mo. /E tan gi ’kwanin tiya imun, uni kun bu’th gwo jin ṯor ma Balaam mo jin ṯorki’da Baalaag gwo mo mmokar mo jin koluwa kol mo mbwambori iya/ gi ’Kwani ma Israyiil mo, ki uni mini ’taki shwa to jin ’ciṯẖu/ ’kus mo gom tomp̱inycon mo dhali mmoboṯki mii jin miinu miinyc̱al mo. 15Wakan si’da e tan gi ’kwanin tiya kun bu’thki gwo jin ṯora ’Kwani Nugulawiyiin mo. 16Kan mo tani rici /e adu is mo. Waḵki e diki rica du is mo tani heeyy, aha/ mina yaku/ i /e ki jahanne/ mo dhali mii mo/as ap̱o/ uni ki gandala turga/ jin ta ’twam pem mo. 17A’di yin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. E a’di jin p̱iki mii e mo tani aha/ mina c̱i a’di amanna jin bagu mo, dhali aha/ mina c̱i a’di wosh dhel jin ta jiŋ kush mo ki gway this nycine/ mo jin ’kwaru ap̱o/ wosh mo, a’di jin mola jan ṯal ’deŋ kamu/ mo, isi ciki/ jasi a’di jin bu’thki a’di mo. 18Dhali eya man’doyu gwo ma ḵaniisa gi Pan Ṯẖiyatira mo tani ’kwari gwo mo ki: Gwo jin ta ji gi Ya/ ma Arumgimis mo, a’di jin ta gi e jin shwa’d ka le’dan o’d ki bar bar mo dhali a’di jin wana ’basho’k ka koroḵ mo. 19Aha/ misha miim pini mo dhali mo/en pini mo dhali moŋgam gwo is pini mo dhali miin tom pini kun miina /e mo dhali bwam pini jin ’kuc̱a /e ki ’kari’th mo mmo’dim ’kup̱ mo dhali miin tom pini kun ta kuŋ ’ko’d mo mmobol kun ṯwa/a/ e mo. 20Hili aha/ tana gi to yaase ap̱o e mo ki /e dhalkina ’bom jin ta’da Isabal mmodi e /e mo, ayim jin yuḵki is piti ka manc̱i gwo mo dhali a’di ṯorki gwo mo dhali mmosus c̱iŋkinam pem mmoper mo mmoboṯki mii jin miinu miinyc̱al mo dhali mmoshwa to jin ’ciṯẖu/ ’kus mo mmothe tomp̱inycon mo. 21Aha/ c̱ikina yima tee mo mmorica du is mo tani hili ayim ushki’d mo mmorica du is ’peni miinyc̱al ma yim mo. 22Hili mo mo ma, aha/ mina ’daŋkala yim ’ko’da ci mo, aci jin isha a’di ki ’ba’th mo dhali uni gwansan kun mii miinyc̱al nyaḵka yim mo tani aha/ mina biṯ uni e monṯo’c bwa jin caaca mo, isi ciki/ waḵki/ uni ’koki rica du is ’peni mii ma yim mo. 23Dhali aha/ mina ’kosh uc̱i ma yim jwa mo. Dhali arisa ḵaniisa gwansan mini mish mo mo ki aha/ tana a’di jin ŋap̱ki bwaŋ ’kwani ki bur bur mo dhali aduŋ ’kwani mo, dhali aha/ mina c̱i aris umi ’baar mo to ka ’deṯe/ ’deṯe/ mo, to kun wana e ki miin to kun miina um mo. 24Hili gom uma tiya kun ’kon e Pan Ṯẖiyatira mo kun ’koki bu’th gwo yansan jin ṯoru mo, um kun ’koki da/ar gwo mo kun yuḵa ’kwanin tiya ki toŋ’kulga/ ma Seṯaan mo, e um mo tani aha/ mina o um gwo mo ki aha/ dinaki ’thi toŋ kamu/ jin diṯadiṯ ap̱o/ um mo a’di jin dina e ki she/ jin mina umi ḵal mo. 25Hili ṯeli sho’k mo e a’di jin tana um mo ntagi aha/ mina p̱u’dku/ mo. 26A’di jin p̱iki mii e mo tani dhali dhu miin tom pem mo ntagi ’pemen mo tani aha/ mina c̱i a’di mom’bi’th mo ap̱owa ris kal gi ’kwaniny’cesh mo 27dhali a’di midi ji uni ki cwaŋ kol ’kus jin ta toŋḵuthu’d mo, me’d jin ’kon ma anos kun uḵu ’pena je mo tani uni ’ce’dki bwa mo ki ’ci’cimi’th mo, wakan isi kani aha/ ki is pem si’da/ bu’thkina mom’bi’th mo ’peni Ababam pem mo 28dhali aha/ mina c̱i a’di acul gi mon’thamo/ mo. 29A’di yin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo.

will be added

X\