GWO JIN ’CEENU MO 12

1Dhali adhan toŋ kamu/ jin ta to mer piki’d mo e momis mo jin ta jamas ma ’bom jin hi’thki’da tente/ mo dhali appe e ’basho’k ma yim mo dhali e ’kup̱ ma yim mo tani toŋ’kup̱ hi’thkin ma yim jin ’kon ma culi ’kume’d i’ce’dka su/ mo. 2Dhali ayim bwaaki’da ’ci mo dhali ayim ki ’ther cuuwa/ mo gom isa nyora dho’th ma yim mo mmo’pe’dkina a’di she/ mo goma dho’th jin mina a’di idho’th mo. 3Dhali adhan to mera kamu/ doḵ/e piki’d mo e momis mo. Hili mo mo ma, adhan tasham ’per taki’d gi ’kup̱i pesu/ mo dhali jin ḵalki ce ’kup̱i ’kume’d mo dhali toŋ’kup̱ ma maliḵ kun ’koni pesu/ kun ’tamkunu mo e ’kup̱ piti mo. 4Dhali thin piti ’cwarki ’ban ma cul jin ’kon ma p̱o/i kwara mo ’peni momis mo dhali ras uni ka ’cesh mo. Dhali tasha/ doshki’di bwambor ma ’bom mo a’di jin ’disha ’twa/ mo mmodhodha ’ci mo ki a’di midi ’taki losa ’ci ma yim mo ka yim midi ’taki dho’th a’di mo. 5Dhali ayim dho’thki’da ’ci jin ta’da gwas mo, a’din ’de/ yan jin midi ta tap̱a ap̱o/ aris kal gi ’kwaniny’cesh mo ki cwaŋ kol ’kus jin ta toŋḵuthu’d mo, hili a’ci ma yim a’di bu’thkunu mo eya Arumgimis mo dhali eya ḵursim piti mo. 6Dhali a’bom yaki’da ŋwac̱a/ mo e mombwaasho mo, e mo jin thosonkin ma Arumgimis goma yim mo, e mo jin minu thip̱ a’di goma tee ma alip̱i ’de/ mo jin ’ce’dki’d ka iss ’kwanimpa ka ’kume’d mo ny’ce’dka kwara mo. 7Dhali mo/as cuki mis mo e momis mo. Miḵa/iil dhali iman’doyu gwom piti askin ap̱o/ tasha/ mo dhali tasha/ si’da/ nyaḵki/ iman’doyu gwonthus piti mo askina as mo. 8Hili uni p̱ikunu e mo dhali moŋkamu/ di’d gom uni e momisa? 9Dhali adhan tasha/ a’di biṯkunu ka ’cesh mo, dhan tashan dhamo/ yin mo, a’di jin yuḵkunu gway ki Tap̱a ma Ruma ’Cesh mo dhali ka Seṯaan mo, a’di jin ta’da manhe’k ’kwaniny’cesh e ’baar mo — a’di biṯkunu mo ka ’cesh mo dhali iman’doyu gwonthus piti si’da/ mo, uni ṯa’kkunu ka ’cesh nyaḵki a’di mo. 10Dhali aha/ ciḵkina dhan ’twa/ ’peni momis mo mmo/o gwo mo ki: Shwane/ mowoṯẖ dhali mom’bi’th dhali ’peŋkuman bampa/ ma Arumgimis bana mo dhali moshirr jin ta ji ma Ḵrisṯẖos piti mo tani p̱u’dkin mo, haali/ amanyera waḵ bana is ki gway mo, a’di biṯkunu ka ’cesh mo, a’di jin yerki uni is ki gway mo isa yempa/ ki montee ilu/ mo dhali ki mon’thiny ilu/ mo ibwambor ma Arumgimis bana mo. 11Dhali uni p̱iki a’di e mo ka bas gi Ari Ḵa’bal mo dhali ki gwonṯor buni kun ṯora uni mo, haali/ uni yisa enki moŋ’koki/em buniya. Isi kani uni c̱i uni mmowu mo. 12’Kunyi bwa mo ma, ayy um ’kwani kun ’koni momis mo dhali um gwaṯṯan kun ’kokin e a’di mo. Hili wayyi e um mo, ayy mony’cesh dhali ḵumma/ yi’de/ mo haali/ tap̱a ma ruma ’cesh p̱u’dki’d e um mo ka dhana nyor jin shi/ashi/ mo haali/ a’di mishki’da tentem piti ’disha’dish mo. 13Dhali ki tasha/ p̱arki mii yan e mo ki a’di biṯkunu ka ’cesh mo tani a’di ŋalki’da ’bom mo, a’di jin dho’thki’da ’ciŋgwaṯẖ mo be. 14Hili a’bom c̱ikunuwa biny jeshe/ isu/ mo, uni kun ta ku ma dhana wulu/ mo ka yim midi ’taki p̱e mo ’peni tasha/ mo e mombwaasho mo e mo jin minu thip̱a yim mo ki mo mo dhali ki mo me’d ka ris mo dhali ki mo ka nus mo. 15Dhali tasha/ gac̱ki yi’de/ ’peni ’twam piti me’d ḵumma/ yi’de/ mo ’ko’da ’bom mo mmodhidha yim sho’k ka dhana gannu/ yi’de/ mo. 16Hili mony’cesh p̱u’dki’d mo dhali woṯẖa yim mo dhali mony’cesh ḵa’dki ’twam piti mo dhali los yi’de/ jin gac̱kina tasha/ ’peni ’twam piti mo be. 17Yan’ko’d doḵ/e tasha/ shin ma nyori me’d mo goma ’bom mo dhali yaki’d mo mmomii mo/as ap̱o/ ushi uc̱i ma yim mo kun ’kokin mo, uni gwansan kun dhuki gwoŋḵan ma Arumgimis kun ’kwarkunu mo dhali kun ta iman/o gwo goma Yesus mo. Dhali a’di doshki’d ap̱owa si’b gi ḵumma/ yi’de/ mo be.

will be added

X\