GWO JIN ’CEENU MO 10

1Yan’ko’d aha/ p̱arkina man’doyu gwoŋ kamu/ e mo a’di jin ta gi mom’bi’th mo mmothulu/ ka ’cesh ’peni momis mo, koṯẖu is ka raḵ mo dhali ka p̱e’do/ i’kup̱i a’di mo, dhali bwam/em piti wana e ka tente/ mo dhali ’basho’k piti wana e ka kaḵ o’d mo. 2A’di ta’d gi ari yiṯ jin ’kuc̱u is mo mmodi ’twa/ ḵany mo e me’d piti mo. Dhali a’di ki kar shoka bim poros piti ap̱o/ ḵumma/ yi’de/ mo dhali shoka biny cam piti ap̱o/ mony’cesh mo, 3dhali a’di ki yuḵa yuḵ ki dhan ’twa/ jin caaca mo, mmowa e ka dhop̱ jin aŋkarki ko mo. Ki a’di yuḵki’da yuḵ mo tani mondor ma sho’k kun ’koni pesu/ mo tani alki is mo. 4Dhali ki mondor ma sho’k kun ’koni pesu/ mo alki is mo tani aha/ ’disha ’twa/ mo mmo’kwar a’di mo, hili aha/ ciḵkina ’twa/ ’peni momis mo mmo/o gwo mo ki: ’Dap̱i a’di ka ’diŋkila/ mo, a’di jin ona montor ma sho’k kun ’koni pesu/ mo, dhali dhalku/ a’di ki ’kwar mo ka jes is mo. 5Dhali aman’doyu gwo, a’di jin p̱arkika/ e mo tani doshki’da p̱o/ ḵumma/ yi’de/ mo dhali mony’cesh mo mmo’de’k me’da bim poros piti ’kup̱ ki momis mo 6mmothul gwo me’da p̱o/ mo ki a’di jin diki’d goma sule/ mo dhali ki sule/ mo, a’di jin uḵki momis mo dhali to kun ’koni bwaman a’di mo dhali mony’cesh mo dhali to kun ’koni bwaman a’di mo dhali ḵumma/ yi’de/ mo dhali to kun ’koni bwaman a’di mo ki miiŋ kamu/ minu ’taki ’koki mii miiyu/ ka diiṯe/ mo, 7hili ka tee gi ko ma poome/ jin yuḵuwa yuḵ mo jin minu ḵum cuuwa/ ka man’doyu gwo jin ’kon ma p̱o/i pesu/ mo gom gwo ma Arumgimis jin c̱inu ki jim bag mo me’d jin mina a’di baḵ a’di e c̱iŋkinam piti mo, uni gun ta imanc̱i gwom piti mo, ki a’di minu ’taki thim mo be. 8Dhali yan’ko’d ’twa/ jin ciḵka/ ’peni momis o aha/ gwo mo doḵ/e ki: Yaku/ mo, dhali budhi yiṯ jin ’kuc̱u is mo, a’di jin di ’twa/ ḵany mo e me’d ma man’doyu gwo mo, a’di jin doshki’da p̱o/ ḵumma/ yi’de/ mo dhali ap̱o/ mony’cesh mo be. 9Wakan aha/ yakina mo eya man’doyu gwo mo dhali ṯor a’di gwo mo mmoc̱i aha/ ari yiṯ jin ’kuc̱u is mo. Dhali a’di ki o aha/ gwo mo ki: Budhi a’di ma dhali ’kayi a’di ma. A’di midi ḵa/aḵa/ gom bwam pini mo, hili a’di midi c̱a’bki dhel dhel me’da dham mo e ’twam pini mo be. 10Dhali aha/ bu’thkina ari yiṯ jin ’kuc̱u is mo ’peni me’d ma man’doyu gwo mo dhali ’ka a’di mo. A’di c̱a’bki’d ki dhel dhel me’da dham mo e ’twam pem mo. Hili ki aha/ ’kakina a’di mo tani bwam pem c̱a’bki’d ki ŋah ŋah mo. 11Dhali aha/ ṯorkunu gwo mo ki: /E mini mii c̱i gwo is mo gom ’kwani ka ris mo dhali gom kal gi ’kwaniny’cesh mo dhali gom ’kwani kun ’kona ’twa/ ki she/ ki she/ mo dhali gom imaliḵ mo be.

will be added

X\