P̱ILIMUUN 1

1ABuulus jin ta’da habuus goma Ḵrisṯẖos jin ta’da Yesus mo dhala Ṯimuṯẖawuus jin ta’da kam bana mo, Eya P̱ilimuun jin enu mo, a’di jin ta’da mannyaḵa ṯu’c bana mii mo. 2Dhala Abp̱iyya mo jin ta ’bwah bana mo dhala Arḵibbus mo jin ta’da garr bana jin ta’da thuruḵ mo, dhala ḵaniisa e kuŋ gu’b pini mo. 3A’the e /e mo dhali moŋḵu’th is ’peni Arumgimis jin ta’da Babam bana mo dhali Tap̱a Yesus Ḵrisṯẖos mo be. 4Aha/ ’bora Arumgimis pem bwa i is isa yempa/ mo ki aha/ kakina /e e mo eya ’thom pem mo be, 5haali/ aha/ ciḵkina gwo mo gom mo/en pini mo dhali gom moŋgam gwo is pini jin karkina /e ka ḵarambuye/ ki Tap̱a Yesus mo dhali goma ris uni ’baar mo kun dhunu ki she/ ki dhelel dhelel mo, 6dhali aha/ ’thokina ki moŋgam gwo is pini jin pwaḵkunu /e mo midi um mo mmonyiṯẖa ris to kun ’boron mo kun ta kum bana mo eya Ḵrisṯẖos mo be. 7Haali/ aha/ tana gi moŋ’kuny bwa kagahara mo dhali momalas ’peni mo/en pini mo, /e jin tana kam pem mo, haali/ adu gi ’kwani kun dhunu ki she/ ki dhelel dhelel mo tani uni yenu ’ba/ mo e /e mo be. 8Isi kan mo tani ba aha/ dara gi monyju/ mo ki nyanye/ eya Ḵrisṯẖos mo mmoḵan /e gwo mo mmomii to kun ’theḵkunu gwo mo tani 9hili gom gway gi mo/en mo tani aha/ ona bwa mo mmoyip̱ ’kup̱ ’kup̱ki /e mo — aha/ jin tana Buulus mo, aha/ jin tana amanya goma Ḵrisṯẖos mo dhali shwane/ aha/ tana habuus mo si’da/ goma Ḵrisṯẖos jin ta’da Yesus mo be— 10Aha/ yip̱a ’kup̱ ’kup̱ki /e mo, goma ’cim pem jin ta’da Unisiimus mo, aha/ jin warkina a’di ki com mo me’d jin dikika/ mo eya sijin mo. 11(Kadhamo/ niin mo ’thissa/ tani a’di diki ha me’d gom /e mo, hili shwane/ mo tani a’di ta a’diŋ gana/ jin ha me’d mo gom /e mo dhali gom aha/ mo be. ) 12Aha/ hashkina a’di ka nyaŋ’ko’di /e mo, isa dum pem gana/ a’di ihashkika/ mo niin. 13Aha/ onayi ki aha/ mina bwa ’taki ’kuny mo mmokar a’di nyaḵki aha/ mo, ki mii gi wakan mo tani ki a’di midi ’taki mii aha/ to mo gom gway pini mo me’d jin ṯikirkika/ di mo eya sijin mo gom gwom ’borga/ mo. 14Hili aha/ ’tena bwa ki mii toŋ kamu/ ki dar gi gwom pini jin gama /e me’d mo, ki mii gi wakan mo tani ki tom pini kun ’boron minu ’taki ’koki mii ki mii kun ṯucu /e mo, hili ki bwam piniŋ gana/ jin di ki ḵany mo be. 15Wariba/ a’di ta mii yansan jin ḵwa/kunu a’di is mo ’peni /e mo gom ari mo mo ki /e mini ’taki ta gi a’di ka nyaŋ’ko’d mo ki sule/ sule/ mo, 16mmodoḵ/e kar a’di me’d c̱iŋkina/ jin yolu yisa, hili mmothis a’di mii ’ko’d e mo me’d c̱iŋkina/ jin ’konuki yol mo, mmokar a’di ka kam pini jin enu mo, dhali isi ki ji mum si’da/ mo gom aha/ mo, hili a’di ’teki nyanye/ gom /e ba/, gom mii kun ’konu ki shuman is mo dhali e Tap̱a mo be. 17Wakan waḵki e mini o bwa ki aha/ mo mmota agarr pini mo tani budhi a’di mo ma me’d mii jin mina /e ’taki bu’th aha/yi. 18Waḵki/ a’di ṯẖu’thki /e toŋ kamu/ mii mo tani walla di ka murem pini ’ba/ mo gom toŋ kamu/ mo tani ’kwari a’di gom gway pem mo ma. 19Aha/, jin tana Buulus mo, i’kwarkina gwo yansan ki me’d pem gana/ mo. Aha/ mina c̱i /e to mo gom a’di mo — ki aha/ mina diki o gwoŋ kamu/ mo goma murem pini jin dina /e aha/ i’ba/ mo, isi kani jin ta buŋgwar is piniŋ gana/ mo. 20Nye, akam pem, aha/ ŋap̱a shi/ miim ’boro’d ’peni /e mo e Tap̱a mo. Yeyi aha/ adum pem eya Ḵrisṯẖos mo ma. 21Gom jwam pem jin wuka e i is mo gom gwom pini jin hana /e e mo tani aha/ ’kwarkina /e gwo yan mo, mmomishkika/ ki /e mini mii uni kan ki nyanye/ mo mmobol gwom pem jin oka e e mo. 22Ki mii yan jin miina /e e me’d mo tani thosoni gu’b yilkina/ si’da/ mo gom aha/ mo haali/ aha/ ṯosha e mon’thom pini mo ki aha/ minu c̱i ki /e mo be. 23Abap̱raas, a’di jin ta’da garr pem jin nyaḵ aha/ c̱a’b eya sijin mo gom gway ma Ḵrisṯẖos jin ta’da Yesus mo tani hashki /e monthe me’d mo, 24dhala Markus si’da/ mii’d wakan mo dhala Aristarḵus mo dhala Dimas mo dhala Luuka mo, uni kun tana garr pem kun nyaḵ aha/ aṯu’c mii mo. 25A’the gi Tap̱a Yesus Ḵrisṯẖos midi nyaḵ di ki /e e shi/in pini mo be.

will be added

X\