P̱ILIBBI 4

1Wakan iwaḵ pem, um gun enka/ mo dhali kun ’kosha ṯe/ aha/ mo dhali kun ta bwaŋ ’kunygam pem mo dhali kun ta toŋ’kup̱ pem mo tani ṯeli sho’k wakan e Tap̱a mo ma um gun enka/ ki mo/en gana/ mo. 2Aha/ malaskina Ap̱uudiya mo dhali aha/ malaskina Sinṯiiḵi mo mmogam gwo me’d mo e Tap̱a. 3Dhali aha/ doṯkina /e si’da/ amannyaḵ dhaŋḵa’b ganam pem bu’th mo ki woṯẖi/ up̱ gwansan mo ma, haali/ uni nyaḵkina ṯu’c mii ki ’ban kuku/ nyaḵki aha/ mo e gwom ’borga/ nyaḵka Aḵlimandus mo dhali kun tiya kun nyaḵkana ṯu’c mii ki aha/ mo uni gun ’kona gway eya warka/ gi mondiki/e mo be. 4’Kunyi bwa mo ma, e Tap̱a, isa yempa/ mo. Doḵ/e aha/ mina o um gwo mo ki: ’Kunyi bwa mo ma. 5Dhalka ris ’kwani ’baar mo mishi mo mo ma, mo ma dum bum jin ’tima um mo. Haali/ Tap̱a a’di ’disha ’twa/ mo hila/. 6Dhalka anan ki anan mo gom ton ’deŋ kamu/ mo ma hili eya ris to ’baar mo ki mon’tho mo dhali ka thip̱ jin thip̱u mo ki mom’bor bwa i is mo tani dhalki ton doṯ bum minu mish mo eya Arumgimis mo. 7Dhali moŋḵu’th is ma Arumgimis a’di jin peki’d eya ris mo jin mishu gwo ’ban mo tani a’di midi jiya dum bum mo dhali bwam bum eya Ḵrisṯẖos jin ta’da Yesus mo be. 8Gom gwo jin boc̱o’d mo gom um, iwaḵ mo tani aris to gun ta kuŋ gana/ mo, aris to gun ta kun taḵu mo, aris to gun ta kuŋ ḵar/e mo, aris to gun ta kun dhelelin mo, aris to gun ta kun ŋa/u mo, aris to gun ta kuny jaro/ mo, waḵki/ akamu/ midi ’taki di jin bol tiya e ki ’bor gana/ mo tani waḵki/ ṯal ’deŋ kamu/ midi ’taki di jin ta jin ha me’d mo ki momaŋ mo tani kulumi gwo gwansani bwa mo ma. 9To gun da/ara um mo dhali kun budha um mo dhali kun ciḵa um mo dhali kun p̱arkina um e mo e aha/ mo tani to gwansan miiyi uni mo ma dhali Arumgimis gi moŋḵu’th is midi di e um mo be. 10Hili aha/ ’bora bwa mo e Tap̱a ki canye haali/ me’d doḵ/e hila/ um ṯuju bwam bum ki cu mo mmokayaa/ e mo. Ka jiŋ gana/ um kaka/ e mo hili um dar gi bway ’boro’d mo mmomii to mo. 11Yisa mmo/oka/ gwo gom mo gi hara to mo haali/ aha/ mishkina mo ki is pem mo ki mo yin jin dika/ nycine/ mo tani aha/ c̱a’bkina mo ka this mo i e mo be. 12Aha/ misha mmokar is ki jiŋ gwa’d mo dhali aha/ misha si’da/ mmo/isha to ka enthus mo. Eya ris to ’baar mo dhali gom to ’baar mo tani aha/ mishkina ka malimbu’da/ mmokap̱ mo dhali mmo’kosha ṯe/ mo, mmo/isha to ka enthus mo dhali mmohara to mo. 13Aha/ misha aris to ’baar mo mii mo e a’di jin ’bi’thki aha/ is mo be. 14Bahili um miikin ki ’bore/ mo mmoc̱ina um to gom aha/ gom monṯo’c is pem mo be. 15Dhali um ki is bum si’da/ mishin um gi Pam P̱ilibbi ki me’d ka muŋ’kup̱ ’peni gwom ’borga/ ki aha/ dhalkina Pam Makiduniyya ’pen mo tani aḵaniisaŋ kamu/ yisa nyaḵ to mii ki aha/ yisa e momii jin c̱inu to ki me’d mo dhali e mo jin budhu to mo hili isi ciki/ um ’cena mo be. 16Gom me’dyin e Pan Tasaluniiki tani um hashki jan ’de/ mo dhali doḵ/e gom to jin miga/ mii ta mo. 17Yisa mmosimmka/ to jin c̱inu ki me’d e mo yisa, hili aha/ simma maman e mo ki a’di midi mar is mo mmoḵam gom um mo be. 18Hili aha/ bu’thkina to ’baar mo ki nyanye/ mo. Aha/ ’tu’dkunu mo mmobu’thkika/ to mo ’pena Abap̱rudiṯus mo, to gun p̱u’dkin mo ’peni um jin ta’da shim jin c̱inu jin ḵuyi mo ki ḵuy jin ta mo jin miikunuwa bas mo jin mishu bu’th mo mmo’bora Arumgimis bwa i is mo be. 19Dhali Arumgimis pem midi thip̱ um ka ris to gun mina umi mii ta mo isi to gun waki kun tana a’di pam piti mo e monyca eya Ḵrisṯẖos jin ta’da Yesus mo be. 20Shwane/ dhalki monyca a’di di’d eya Arumgimis bana jin ta’da Babam bana ki sule/ sule/ ya ye ’ba/ moonnii. Amen. 21Theka ris uni ’baar mo me’d kun dhunu ki she/ ki dhelel dhelel eya Ḵrisṯẖos jin ta’da Yesus mo ma. Dhala waḵ kun ’kon nyaḵki aha/ mo tani theki um me’d mo si’da/. 22Aris uni kun dhunu ki she/ ki dhelel dhelel mo tani theki um me’d mo uni gun mumki ’ko mo e gu’b ma Kaysar mo be. 23A’the ’peni Tap̱a Yesus Ḵrisṯẖos midi di e shi/in bum mo be.

will be added

X\