P̱ILIBBI 2

1Wakan waḵki/ mo jin roc̱uwa du sho’k mo eya Ḵrisṯẖos di’d mo dhali mo gi lalu sho’k mo ki gwo gi mo/en mo dhali mo gi nyaḵu to mii ka dun ’de/ gi Shi/in mo dhali waḵki/ adu jin gama gam mo dhali mii jin miinu ki mo/en mo tani 2’tu’daa/ mo ki mom’bor bwa mo mmota ga du jin nyaḵka’d mo mmo’tu’d ki mo/en ’de/ mo dhali mmo’tu’d ki bwan ’de/ mo dhali ka dun ’de/ mo be. 3Dhalka aŋkirre/ ki mii mo mmota ham ’kus mo walla mmodhu is ki ’kwanim pa mo. Hili mmodhu is ki gwa’d mo mmohil ci i e ki ’bore/ mmobol is bumi e mo. 4Dhalka ris um ka ’deṯe/ ’deṯe/ hil to gi cin tiya i e mo mmo’koki hil jasi tom bum gana/ i e mo. 5Tayi gi bwa yan e bwaman is bum um ’cena mo ma, a’di jin takina um eya Ḵrisṯẖos jin ta’da Yesus mo, 6a’di ba/ a’di jin ta jamas ma Arumgimis mo tani a’di diki o ki mo gi nyaḵa nyaḵ ka Arumgimis midi ta to jin minu bu’th ki wup̱ mo. 7Hili a’di karki is piti bwa ’te/ mo mmobu’th jamas gi c̱iŋkina/ mo mmodhodhu a’di ki dho’th jin dho’thkunu ’kwani kansan mo be. 8Dhali mmogamu a’di kan ki is gi wathiny’cesh mo tani a’di karki isi is piti ki gwa’d mo dhali mmowar ka manha gwo e mo mmowu mo isi wu gi cwany’ciṯẖan dhul mo be. 9Wakan Arumgimis karki a’di ki caŋ gana/ mo dhali c̱i a’di gway jin di’d eya p̱owa ris gwayi ’baar mo. 10Dhali ki gway ma Yesus mo tani aris ’kup̱a’dup̱uni ’baar mo mini mii luŋ mo ki ’beles e momis mo dhali e mony’cesh mo dhali e bwaŋ’kwariny mony’cesh mo 11dhala risa le’di ’baar mo mini pi gwo mo ka Yesus Ḵrisṯẖos ta Tap̱a mo gom monyca ma Arumgimis jin ta Com mo be. 12Dhali wakan, um pem gun enka/ mo, me’d jin hana um gwo e isa yempa/ mo tani wakan shwane/, yisa jasi mmodika/ um e buŋ’kus mo hili ki nyanye/ mmop̱ika/ mo, miiyi mowoṯẖ bum gana/ mo ki moŋko/ is mo dhali ki mondee mo. 13Haali/ Arumgimis umki mii mo e um mo dhali ki bwa jin ta bwa mo dhali ki bwa ma ṯu’c jin ta bwam pitiŋ gana/ mo be. 14Miiyi aris to ’baar mo ki dar ga gumgum mo ma walla ki gwo jin doṯuwa doṯ mo. 15Ki um mini dar gi mii ’ba/ mo dhali dar ga maḵ mo mmota uc̱i ma Arumgimis mo mmodar gi thalkin mo e bwaman ’kwani ma nyaḵum yil mo kun burusha ii ki burush mo dhali kun c̱aca ii ki c̱aca mo e bwam uni mo, uni kun kusha um mo me’d moŋkush eya ’cesh mo. 16Mmolana um gwo gi mondiki/e bu’th mo wakan ka tee ma Ḵrisṯẖos mo tani aha/ mina kar is ki ca mo ki aha/ dinaki gus mo ka wuny is walla miiya ṯu’c ka wuny is mo be. 17Me’d waḵki/ aha/ ’thinu mo e mo jin miinuwa basa ’cesh mo gom moŋgam gwo is bum mo tani aha/ ’bora bwa mo dhali ’kunya bwa mo nyaḵki umi ’baar mo be. 18Wakan si’da/ um mina bwa ’bor mo dhali ’kuny bwa mo nyaḵki aha/ mo be. 19Aha/ ṯosha e Tap̱a Yesus mo mmohashka/ Ṯimuṯẖawuus e um mo ki ’dishe/ mo. Wakan ki aha/ minu malas mo ki gwo ’peni um mo. 20Aha/ dara gi jan ’de/ jin waki a’di mo jin midi ta gi bwaŋ gana/ mo mmo/anan is gom mmo’kona um ki ’kom pa mo. 21Uni ’baar mo hili jasi ’kup̱ki tom buni mo, yisa gom to ma Yesus Ḵrisṯẖos mo. 22Hili Ṯimuṯẖawuus ta a’dim pa jin misha um mo mmomii to me’d ya/ jin mii to gom com mo tani a’di miiki to nyaḵki aha/ mo gom gwom ’borga/ mo be. 23Aha/ ṯosha wakan mmohashki a’di i um mo ki ’dishe/ me’d jin miga/ mish ki a’di midi ya kata gom aha/ mo. 24Dhali aha/ gama gwo is e Tap̱a mo ki aha/ ki ’dishe/ ki is pem mina yaku/ si’da/ mo be. 25Aha/ kuluma gwo ibwa ki kulum gana/ mo ki a’di minu mii mii mmohash ki uma Abap̱rudiṯus a’di jin ta’da kam pem mo dhali agarr jin nyaḵa’da ṯu’c mii mo dhali agarr jin ta’da askar mo dhali amanyam bum mo dhali amanmii to jin miga/ mii ta mo. 26Haali/ a’di ’kosha ṯe/ umi ’baar kagahara mo dhali a’di butha ’tham mo haali/ um ciḵ gwo mo gom a’di ki a’di ’ba’thki’d mo be. 27Ka jiŋ gana/ a’di ’ba’thki’d mo mmo’dish ’twa/ mmowu mo be. Hili Arumgimis miimii ap̱o/ a’di mo dhali yisa jasi e a’di, hili ap̱o/ aha/ si’da/ isi ciki/ aha/ mina ’taki ta gi bwan diṯi’d jin ta jin diṯadiṯ mo. 28Aha/ tup̱a bwa kagahara mo mmohash ki um a’di wakan mo ki um mina bwa ’kuny mo mmop̱ar a’di e mo doḵ/e dhali kan mo ki aha/ mina mo/anan is pem idinin is mo be. 29Wakan buthi a’di e Tap̱a ki bwaŋ ’kunyga/ ’baar mo ma dhali taḵi ’kwani kun wakan mo. 30Haali/ a’di muru’di wu mo goma ṯu’c ma Ḵrisṯẖos mo, a’di c̱i mondiki/em piti mmothima ṯu’c bum gom aha/ mo be.

will be added

X\