MAṮṮA 24

1Dhala Yesus dhalki gu’b gi mondheleladhelel ’pen mo dhali di’d mmoya ka pije/ mo ki imanciḵ a’di gwo p̱u’dkin mo dhali ṯor a’di gu’b gi mondheleladhelel mo be. 2Hili a’di ki thoḵ uni gwo mo ki: Um mishina ris to gwansani ’baar mo ’taa? Ka jiŋ gana/ aha/ ona um gwo mo ki wosha kamu/ yisa minu dhal ka maḵamp̱o/ ap̱owa kamu/ jin midi diki biṯa ’cesh mo. 3Me’d jin dikina a’di e ’Kuwosh Seṯuun mo tani imanciḵ a’di gwo p̱u’dkini a’di mo mmo/o gwo mo ka ḵwal is ki: Ṯor am gwo mo ma, kakasja sa/ mmina to yansani di mo? dhali ki jamas mii gi wakata mmina /e mp̱u’du/ mo dhali ki mii jin mina yil gi mony’ceshi di ’kup̱ mo? 4Dhala Yesus ki thoḵ uni gwo mo ki: Hili ki ’bore/ mo ma, ki wathin ’deŋ kamu/ midi diki sus umi dheres mo. 5Haali/ ’kwani tana ris kun mini iiyu/ ki gway pem mo mmo/o gwo mo ki: Aha/ tana Ḵrisṯẖos mo dhali uni mini sus tiya ka ris mmodheres mo. 6Dhali um mini ciḵ gwo gom mo/as mo dhali gwo gom mo/as jin ’ce’du ’te/ mo. Hili mo mo ma ki um mini dhalki is ki ḵo/ mo haali/ mii yansan a’di midi bu’th embul mo mo dhali hili ’pemen diki p̱u’d naskina/ mo be. 7Haali/ kala kamu/ midi cu mis ap̱o/ kala kamu/ mo dhali ’peŋkuman bampaŋ kamu/ midi cu mis ap̱o/ ’peŋkuman bampaŋ kamu/ mo, dhali ṯe/ midi di mo dhali mony’cesh midi yiḵin is ki mo ka ris mo be. 8Aris to gwansan uni ta jasi monṯel ’pen gi isa nyor mo be. 9Yan’ko’d uni mini c̱i um mo ki um minu ṯo’c bwa mo dhali dhu um mmowu mo. Dhali um minu shi/i e mo ka ris kal gi ’kwaniny’cesh mo gom gway pem mo be. 10Dhali yan’ko’d ’kwanin tiya ka ris mini ye gwo is mo dhali waṯ tiya gway ka rem ’kup̱ mo dhali shi/a ashim bwa i is ka rem ’kup̱ mo be. 11Dhali imanc̱i gwonthus mini cu mis mo dhali sus ’kwani ka ris mmodheres mo be. 12Dhali mo/en gi ’kwani ka ris mo tani mina isi mii ki dhadharmu’th mo haali/ aris tonthus kun ’coḵa’coḵ mo tani markunu is kagahara mo be. 13Hili a’di jin ’dimki ’kup̱ mo ntagi ’pemen mo tani a’di iminu woṯẖ mo be. 14Dhali gwom ’borga/ gi Bampa/ gi Momis mo tani minu mii c̱ika pije/ e mony’ceshi ’baar mo me’d gwo jin c̱inu gom kal gi ’kwaniny’ceshi ’baar mo, idhali yan’ko’d mo tani ’pemen midi p̱u’du/ mo be. 15Wakan ki um mini p̱ar a’di e mo mmodosha a’di e mo jin ḵogu mo a’di jin ta mii jin bulabul mo jin mina ’kwani ṯa’k is jwa mo tani a’di jin okin ma manc̱i gwo ma Arumgimis kadhamo/ mo jin ta’da Dani/aal mo (Dhalka mandeŋ gwo e mishi gwo ’ban mo). 16Dhali yan’ko’d dhalki uni gwansan kun ’kon e Pa Yahuudiyya mini so ’kuwosh mo. 17Dhalki a’di jin di’d e ’kuŋgu’b midi diki thul ka ’cesh mo mmogu toŋ kamu/ ’peni gu’b piti mo. 18Dhali a’di jin di’d e bwam bunto mo midi diki doḵu/ ka nyaŋ’ko’d mmobu’th burrinyem p̱om piti mo be. 19Dhali ayy/ayy/ayy gom uni gwansan kun bwaa uc̱i mo dhali gom uni gwansan kun c̱i uc̱i ako mmop̱i ka tee gwansan mo. 20’Thoyi mo ma ki mosom bum mini ’taki ’koki ta mondiṯ mo walla ka cim ma pesu/ mo. 21Haali/ yan’ko’d adhan monṯo’c bwa midi di mo, gi ji wakan yisa di’da ’peni ka muŋ’kup̱ gi mony’cesh mo ntagi shwanesan mo, yisa, dhali midi diki di ki sule/ sule/ mo be. 22Dhali waḵki/ ka cim gwansan ’konuki ’taki ’koki ’ciṯẖ bwa mo tani wathimpaŋ kamu/ si’da/ minu ’taki ’koki woṯẖ mo be. Hili haali/ gom gway gi uni gwansan kun kwanykunu mo ka tee gwansan mo tani a’di i’ciṯẖkunuwa cim bwa mo be. 23Yan’ko’d waḵki/ jan ’deŋ kamu/ midi o um gwo mo ki: Hili mo mo ma, aḴrisṯẖos a’dan mo be tani walla, a’di ac̱iṯṯaan mo tani dhalku/ gwom piti ki gam is mo ma. 24Haali/ iḵrisṯẖos kun ’koki ta kuŋ gana/ walla imanc̱i gwo kun ’koki ta kuŋ gana/ mo tani mini cu mis mo dhali ṯora dhan jamas mii mo dhala dhan momer mo. Wakan uni mini susa susi dheres mo ntagi uni kun kwanyu ki she/ mo waḵki/ a’di mishu mii mo be. 25Hili mo mo ma, aha/ ṯora um gwo nṯwa/a/ mo be. 26Wakan waḵki/ uni mini o um gwo mo ki: Hili mo mo ma, a’di di’d e mombwaasho mo tani dhalku/ ki ii ka pije/ mo. Waḵki/ uni o um gwo mo ki: Hili mo mo ma, a’di di’d isi bwaman gu’b gana/ mo tani dhalku/ gwom piti ki gam is mo ma. 27Haali/ me’da wara sho’k jin p̱u’dki’d ’peni mom’pesho’k mo dhali dhwa/a’d mo mo ntaga bora luŋgu’b mo tani wakan a’di midi ta mo jin mina Ya/ gi ’Kwani ip̱u’du/ mo be. 28E mo yin jin mina buŋgwar isi di mo tani a’di mina korro/ itul ’kup̱ mmonṯal ’de/ mo be. 29Dhali ki jahanne/ ’ko’di monṯo’c bwa ka tee gwansan mo tani atente/ midi dhurum mo mo dhali appe midi diki c̱i moŋkush piti mo dhali arisa cul mini ṯa’k ’peni momis mo dhali aris mom’bi’th kun ’kon e momis mo tani minu yiḵin is mo be. 30Dhali yan’ko’d jamas mii gi Ya/ gi ’Kwani minu piyu/ mo ’peni momis mo, dhali yan’ko’d arisa waḵ gi ’kwaniny’cesh mini ko mo dhali uni mini p̱ar Ya/ gi ’Kwani e mo mmop̱u’du/ e bwaaraḵ ’peni momis mo ki mom’bi’th mo dhali ki monyca ilu/ mo be. 31Dhali a’di midi hash iman’doyu gwom piti ka dhana yuḵ gi cuuwa/ ma poome/ mo dhali uni mini tul unim piti is kun kwanykunu mo ’peni momis kun ’kona shem ’penabi idoŋon mo ’peni monṯel ’pen gi momis mo ntagi ’bana kamu/ mo be. 32Mishi gwo ’ban mo ma ’peni cwamp̱u/ mo. Ki jahanne/ me’d jin lu/kina a’di abinycwalman piti jin ’ta’dama’ta’dam mo tani dhali lu/ jip̱im piti mo tani um ki mish gwo ’ban mo ki moyurantee ’dishi’d mo be. 33Wakan si’dayi, ki um ki p̱ara ris to gwansan e mo tani um ki mish mo mo ki a’di ’disha’dish mo dhali a’di ’dishki’d hila/ mo e ’twaŋkal mo be. 34Ka jiŋ gana/ aha/ ona um gwo mo ki ’kwani ma nyaḵum yil gwansan mini ’koki pe mo ntagi aris to gwansan mini bu’th mo mo be. 35Momis dhali mony’cesh mini pe mo tani hili gwom pem mini ’koki pe mo be. 36Hili ka tee c̱aan mo dhali mo mo tani dina wathin ’de/ ki mish mo dhali iman’doyu gwo si’da/ kun ’kon e momis mo ’koki mish mo mo walla Ya/ si’da/, hili Ababa a’di ’de/ mo be. 37Me’da tee ma Nuuh mo tani wakan si’da/ mina Ya/ gi ’Kwani p̱u’du/ mo be. 38Haali/ ka tee gwansan iṯwa/a/ ka gannu/ yi’de/ mo tani uni ’kokin mo mmoshwa to mo dhali mmop̱i to mo dhali mmomash mo dhali mmoc̱iya c̱i mmomash mo ntaga tee ma Nuuh jin jithirkina a’di mo e bwam ma ḵur mo be. 39Dhali uni ’koki mish mo mo ntaga gannu/ yi’de/ p̱u’dki’d mo dhali dhi’th uni ’baar sho’k mo. Dhali wakan mina Ya/ gi ’Kwani p̱u’du/ mo be. 40Dhali yan’ko’d ’kwaniŋ gwasi su/ mini ’ko mo e bwam bunto mo. Dhali jan ’de/ minu bu’th mo be dhali jaŋ kamu/ minu dhalku/ mo be. 41Up̱ mini ’ko isu/ mo si’da/ kun mini yor to ayo mo. Dhali jan ’de/ minu bu’th mo be dhali jaŋ kamu/ minu dhalku/ mo be. 42Timi mo mo ma wakan, haali/ um ’koki mish mo mo atee jin mina Tap̱am bumi yayu/ mo be. 43Hili mishi yaase mo ma, waḵki/ com gu’b midi ’taki misha cim jin mina wathin ’di/ ’taki yayu/ mon’thiny mo dhali ḵwal to mo tani a’di midi ’taki tim mo mo dhali midi ’taki diki dhal gu’b piti mo ki a’di minu ’taki ’koki ’ce’d mo be. 44Wakan um si’da/ mini mii thoson is mo haali/ Ya/ gi ’Kwani midi p̱u’du/ ki mo jin mina umi ’taki ’koki ṯosh mo. 45Kaja a’di jin ta isiŋ gana/ mo dhali jin ta c̱iŋkina/ jin yuḵayuḵ moye? A’di, jin mina tap̱am piti kar a’di tap̱a ap̱o/ gu’b piti mo mmoc̱i unim piti tonṯe/ ka tenteŋ gana/ mo? 46Mom’bor mii ’te/ ba/ gom c̱iŋkina/ c̱aan, a’di jin mina tap̱am piti p̱u’du/ mo mmogam mo ki a’di di’d mmomii kan mo be. 47Ka jiŋ gana/ aha/ ona um gwo mo ki a’di midi kar a’di ari tap̱a ap̱o/ aris tom piti jin tana a’di mo be. 48Hili waḵki/ c̱iŋkina/ c̱aan jin ta thus ki thus mo o gwo mo e is piti mo ki: Tap̱am pem tayi’da diiṯe/ mo be 49dhali yan’ko’d a’di ki ṯel mii ’pen mo mmodor igarr piti kun nyaḵka a’di aṯu’c mii mo dhali shwa to mo dhali p̱i to mo nyaḵki uni gun ’kosh ma su mo tani 50dhali tap̱a gi c̱iŋkina/ midi p̱u’du/ mo ka tee jin dina a’di ki ṯosh ki a’di midi ’taki p̱u’du/ mo dhali ki mo jin dina a’di ki mish mo mo be. 51Dhali a’di midi c̱i a’diya jisa mo dhali a’di midi kar a’di nyaḵki uni gun tana he’k e ka he’k e mo. Dhali e mun mo tani a’di ta mo jin mina ’kwani ’pe’d shem buni mo be.

will be added

X\