MAṮṮA 23

1Dhali yan’ko’d Yesus ki owa waambuhany ’kwani gwo mo dhali imanciḵ a’di gwo mo be mmo/o gwo mo ki: 2Iman’kwar to dhali ’Kwani P̱arisiyiin uni ’kokin mo e monyc̱a’b ma Musa mo be. 3Wakan boṯi ki mii gi ma to gunn iniin dhali c̱iya hirdhe/ ki gwo jin ṯora uni um mo hili dhalku/ ki mii to kun miina uni mo, haali/ uni c̱iki gwo mo tani hili uni ’koki boṯki a’di mo be. 4Uni deḵki to jin diṯadiṯ mo kun shina ḵal ki shi/ mo dhali uni ki dhu uni e ’kup̱a biŋ ’kwani mo. Hili uni ki is buni mo tani uni ’koki joc̱ uni ki me’d buni mo be. 5Uni miina ris tom buni ’baar mo ki uni mina ’kwani mish mo. P̱ilaḵṯerim buni miina uni ki bee bee mo dhali burrinyen turgam buni nye’ba/ uni she/ ka yup̱en turga/ mo. 6Dhali uni eni montaḵ e mo jin yuḵkunuwa yuḵ mo dhali mom ’boron e gu’b gi montul is mo be 7dhali en monthe me’d kagahara e mo ma suug mo dhali uni eni mii jin yuḵa ’kwani uni ki gum pem jin caa e ki ca mo. 8Hili um mini ’koki ŋap̱ ’kwani mmoyuḵ um ki gum bam kun caa e ki ca mo haali/ um tan ga manṯor gwom bum jin ṯal ’de/ mo dhali um tana waḵa ṯal ’de/ mo be. 9Dhali um mini ’koki yuḵ wathiŋ kamu/ ka babam bum e mony’cesh yan mo haali/ um tan ga Babam bum jin ṯal ’de/ mo a’di jin di’d e momis mo be. 10Walla um yisa minu yuḵ ki itap̱a mo haali/ um tan gi tap̱am bum ṯal ’de/ mo a’di jin ta’da Ḵrisṯẖos mo be. 11A’di jin caaca e bwam um mo tani a’di midi ta c̱iŋkinam bum mo be. 12A’diyin jin kar is piti ki ca mo tani minu kar ki gwa’d mo dhali a’diyin jin kar is piti ki gwa’d mo tani minu kar ki ca mo be. 13Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um ’dap̱ki bway gi Bampa/ gi Momis ’twa/ mo ap̱o/ ’kwani mo. Haali/ um ki is bum ’koki cic̱ mo walla ’koki dhal uni gwansan bway mo kun mini ’taki cic̱ i a’di mo be. 14Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um loski gu’b gi up̱ gun wuna ikaṯẖ mo dhali eya por ma pije/ mo tani um ki mii mon’tho mo ki rash rash mo. Wakan um mini bu’th dhan miiwaḵ gun caaca mo be. 15Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um tani mo mo dhali dhan yi’de/ mo dhali a’cesh mo mmogam jan ṯal ’deŋ kamu/ jin dina e ki she/ mo mmobu’th gwom bum mo, dhali ki a’di warki’d ka manbu’th gwom bum mo tani um ki mii a’di ka ’ci ma al o’d me’di su/ ki nyanye/ mo mmobol is bum gana/ e mo be. 16Wayyi e um, ’kwani kun tana ja’da/ ka ja’da/ mo kun ṯoshki ta ashu/um bway mo, kun o gwo mo ki: Waḵki/ jan ṯal ’deŋ kamu/ midi thul me’da p̱o/ gu’b gi mondheleladhelel mo tani a’di mii mii ki p̱e’th mo be. Hili waḵki/ wathiŋ kamu/ midi thul me’da p̱o/ ’dolkon gana/ gi gu’b gi mondheleladhelel mo tani a’di deḵu ki gwom piti jin ona a’di is mo be. 17Um ’kwani kun tana ja’da/ kun ta p̱us mo. Haali/ to jin ca’d ita’da ta mo, ta ’dolkon ’taa? walla gu’b gi mondheleladhelel jin kar ’dolkon ki a’di jin ḵogu mo? 18Dhali um kun o gwo mo ki: Waḵki/ jan ’de/ midi thul me’da p̱owa gwaṯa/ jin miinuwa bas mo tani a’di mii’d ki p̱e’th mo be. Hili waḵki/ wathin ’deŋ kamu/ thul me’da p̱o/ to jin c̱inu ki me’d mo ap̱owa gwaṯa/ jin miinuwa bas mo tani a’di deḵa gwom piti jin ona a’di is mo be. 19Um ’kwani kun tana ja’da/ mo. Haali/ to jana ica’d mo, to jin c̱inu ki me’d mo ’taa? walla gwaṯa/ jin miinuwa bas a’di kar to jin c̱inu ki me’d ki jin ḵogu mo? 20Wakan a’di jin thuli me’da ap̱owa gwaṯa/ jin miinuwa bas mo tani a’di thulki me’di a’di mo dhali aris to ’baar kun ’koni a’di mo be. 21Dhali a’di jin thuli me’da p̱o/ gu’b gi mondheleladhelel mo tani a’di thulki me’di a’di mo dhali ki a’di jin c̱a’bki’d e a’di mo be. 22Dhali a’di jin thuli me’da p̱o/ momis mo tani thulki me’da p̱owa ḵursi ma Arumgimis mo dhali ki a’di jin c̱a’bki’da p̱o/ a’di mo be. 23Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo, haali/ um c̱ina nana/ ki to jin c̱inu Arumgimis mo dhali anuŋkure/ mo dhali toŋ kuyga/ jin miinuwa ’tash jin ta’da akammun mo dhali um ki ta p̱iny is e ton tiya kun ’bitha mii ’ba/ ki ’bi’th mo me’d gwoŋḵan jin c̱inu mo dhali momii ma ḵar/e mo dhali momiimii mo dhali moŋgam gwo is mo. Aris to gwansan ḵa ba/ mmina umi mii mii mo mmodar ga p̱iny isi cine/ ki miin tiya mo. 24Um kun ṯoshki ta ashu/um bway kun tana ja’da/ mo, um ki dhim e ka pije/ mo dhali um ki los kalman ki ’kolo’c mo be. 25Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo, haali/ um lamki ’ko’d gwar ma ḵubbaaya mo dhali asahan mo, hili e bwaman mo tani uni ’tu’dkunu mo ki mondil to mo dhali ki mii kun ’coḵa’coḵ mo. 26/E Wathim P̱arisi jin ta’da ja’da/ mo. Lami bwamana ḵubbaayam pini nṯwa/a/ mo ma dhali asahan mo, wakan ki ’ko’d gwar ma pije/ si’da/ midi dheleladhelel mo be. 27Wayyi e um ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo, haali/ um wana e ki moŋ’kup̱aje kun kushu mo ki bany bany mo e mis ’te/ mo. Dhali eya p̱or ma pije/ mo tani uni ki piyu/ monyjaro/ mo, hili e bwaman uni mo tani uni ’tu’dkunu mo ka simaŋ ’kwani kun wukin mo dhali aris to mo kun nyo/anyo/ mo. 28Wakan um si’da/ eya p̱or ma pije/ mo tani um ki pi moŋḵar/e gom ’kwani mo, hili e bwam um mo tani um ’tu’dkunu mo ka he’k e mo dhali ki mii kun ’coḵa’coḵ mo be. 29Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um nyaŋki moŋ’kup̱aje gi imanc̱i gwo ma Arumgimis kadhamo/ mo dhali um ki nyoŋ to mo ap̱o/ moŋ’kup̱ajeŋ ’kwaniŋ ḵar/e mo, 30mmo/o gwo mo ki: Waḵki/ ana mina ’taki ’ko ka tee gi ibabam bana mo tani ana mina ’taki ’koki nyaḵ to mii ki uni mo e mo jin woluwa bas gi imanc̱i gwo ma Arumgimis kadhamo/ mo be. 31Wakan um o gwo ap̱o/ is bum mo ki um ta iya/ gi uni gwansan kun ’koshkina mee gi imanc̱i gwo ma Arumgimis kadhamo/ mo be. 32’Tu’di ’te/ ma ki piny piny mo ki mombar gi ibabam bum mo. 33Um kun ta tasha/ mo, dhali um kun ta ushin tashan ’thi/ mo, um mini mish ye kata sa/, um kun ’dap̱a’dap̱ ki bway gi mo ma al o’d kan mo. 34Wakan aha/ hashkina um imanc̱i gwo ma Arumgimis kadhamo/ mo dhali ’kwani kun yuḵayuḵ mo dhali ’kwani kun ta iman’kwar to mo. Dhali kun tiya mina umi ’kosh mo dhali ’kosh ki cwany’ciṯẖan dhul mo dhali kun tiya mina umi dor mo e gu’b gi montul is bum mo dhali ṯo’c ’kus e bampa/ ki she/ ki she/ mo. 35Wakan eya p̱o/ um mo tani arisa bas gi ’kwaniŋ ḵar/e wolkina p̱o/ mony’cesh mo ’pena bas ma Habiil jin di’d ka p̱o/ mo ntaga bas ma Sakariyya jin ta ya/ ma Baraḵiyya mo a’di jin ’koshkina um mo e bwaman ma gwaṯa/ jin karu mo ki jiŋ ḵogu mo e mo jin miinuwa bas mo be. 36Ka jiŋ gana/ aha/ ṯora um gwo mo ki aris to gwansan mini p̱u’d ap̱o/ ’kwani gwansan kun tana nyaḵum yil mo be. 37Ayy Urushaliim Urushaliim jin ’koshki imanc̱i gwo ma Arumgimis kadhamo/ jwa mo dhali ’kosh uni gwansan ki wosh kun hashkunu e /e mo. Me’d wana risa kun oka/ ki tul uc̱im pini isi monṯal ’de/ mo me’d kumana ŋwa jin wup̱i ushan piti ka bi mo, dhali um ushkin mo be. 38Hili mo mo ma, gu’b pini dhalkunu ’pen mo dhali ta ma’du/ ki ma’du/ mo. 39Haali/ aha/ ṯora um gwo mo ki: Um mini ’koki p̱ar aha/ e doḵ/e mo ntagi um mini o gwo mo ki: Mom’bor mii gom a’di jin p̱u’dki’d ki gway gi Tap̱a mo be.

will be added

X\