MAṮṮA 22

1Dhali doḵ/e Yesus oki gwom ’bi’th/e e uni mo mmo/o gwo mo ki: 2Bampa/ gi Momis miga/ kar ka p̱ar ’ban ka maliḵ mo, a’di jin yuḵki’da yuḵ mo gom miimash gi ya/m piti mo be. 3Dhali mmohasha a’di c̱iŋkinam piti mo mmoyuḵ uni gwansan kun yuḵkunu mo e momiimash jin yuḵuwa yuḵ mo tani hili uni ’koki iiyu/ mo be. 4Dhali a’di ki hash c̱iŋkinan tiya mo mmo/o gwo mo ki: Yuḵi uni gwansan kun yuḵu mo ma. Hili aha/ thosonkina tonṯem pem mo, dhali amorbip̱ pem mo dhali ushi bip̱ pem mo uni ’koshkunu mo dhali aris to ’baar mo thosonkunu mo. Iiyu/ mo ma e mo ma yuḵ jin yuḵu mo e momiimash mo be. 5Hili uni ’koki c̱iya hirdhe/ ki a’di mo dhali uni iikin mo dhali jan ’deŋ kamu/ e buntom piti mo dhali jaŋ kamu/ e mo ma ṯu’c piti mo be. 6Ki ’kwanin tiya ’kon mo mmojigiṯ c̱iŋkinam piti ’ba/ ki me’d mo tani kun tiya miikina uni ki mon’the is mo dhali ’kosh uni jwa mo be. 7Dhala maliḵ shwa’da nyor ka nyor mo dhali a’di ki hash ’kwani ma meem piti mo dhali ’ce’d uni gwansan sho’k mo kun ’koshkina mee mo dhali c̱i’th bampam buni ki o’d mo be. 8Dhali a’di ki o c̱iŋkinam piti gwo mo ki: Ayuḵ jin yuḵu mo gom moshwa to mo e momiimash mo tani a’di thosonkunu mo, hili uni gwansan kun yuḵkunu mo tani uni ta ’kwani kun ’koki ha me’d mo. 9Iiku/ mo wakan e bwaya beega/ mo dhali yuḵi ’kwani e momiimash ka ris mo me’d jin mina umi gam mo. 10Dhali c̱iŋkina/ gwansan uni iikin mo e bway tur mo dhali tula ris uni ’baar mo is kun gamkina uni mo nyaḵki uni kun shiyini lu/ mo dhali kun ’boron mo. Wakan momiimash jin yuḵa yuḵ mo tani a’di ’tu’dkunu mo ki yilkinaŋ ’kwani mo be. 11Hili ka maliḵ p̱u’dki’d mo dhali hil ’kwani yilkina/ mo tani a’di p̱arki wathin ’deŋ kamu/ e mo mmodara a’di gi burrinye/ gi momiimash mo be. 12Dhali a’di ki o a’di gwo mo ki: Akam pema, atinta iyayina /e mmahan ki dar gi burrinye/ gi momiimash kan mo? Dhali a’di diki thoḵ ’twaŋ kamu/ mo be. 13Dhali yan’ko’d amaliḵ ki o gwo mo e uni gun miina ṯu’c mo ki: Deḵi a’di ki me’di lu/ mo dhali ki shoki lu/ mo ma dhali biṯ a’di e jis jin ta’da ’tum ka ’tum mo, dhali e mun mo tani mo yan a’di ta mo jin mina ’kwani ko mo dhali ’pe’d shem buni mo be. 14Haali/ ’kwani ka ris yuḵkunu mo tani hili uni ’kokini daḵa/ mo kun kwanykunu mo be. 15Yan’ko’d ’Kwani P̱arisiyiin iikin mo dhali gam ’twa/ ’kup̱ mo mmocesh a’di ki gwo jin ona a’di mo be. 16Dhali uni ki hash imanciḵ a’di gwo i a’di mo nyaḵki ’Kwani Hirodusiyiin mo mmo/o gwo mo ki: Manṯor Gwo, am misha ki /e ta a’diŋ gana/ mo dhali /e ki ṯor gwo gi bway ma Arumgimis gana/ mo dhali /e diki ḵo/ ’kwani mo haali e diki mii mii ka gwar ’de/ gom buye/ jin nyiṯẖa /eya nyiṯẖ mo walla gom ’kwani kun ta tap̱a mo. 17Ṯori aman gwo mo ma, gwo kuluma /e mbwa katinta mo? A’di ta gwoŋḵan ’taa? jin minu c̱iya Kaysara thulp̱a/ mo walla minu dhalku/ mo? 18Hila Yesus mmonyiṯẖa a’di tonthus buni mo tani a’di ki o gwo mo ki: Atinta pala um aha/ ki gwo kan mo, um ’kwani kun tana he’k e ka he’k e mo? 19Ṯori aha/ nasa guurush jin c̱inuwa thulp̱a/ mo ma. Dhali uni ki guyu/ a’di nasa guurush mo be. 20Dhala Yesus ki o uni gwo mo ki: Jamas maja a’dan? dhali aja a’di i’kwara’di san mo? 21Uni ki thoḵ a’di gwo mo ka Kaysar mo be. Dhali yan’ko’d a’di ki thoḵ uni gwo mo ki: Wakan c̱ika Kaysar to jin ta jim ma Kaysar mo ma. Dhali c̱ika Arumgimis to jin ta ji ma Arumgimis mo ma. 22Ki uni ciḵki gwo gwansan mo tani uni merkin mo, dhali uni dhal a’di ’pen mo dhali ii mo be. 23Dhali ka tente/ c̱aan mo tani ’Kwani Sadukiyiin p̱u’dkini a’di mo mmo/o gwo mo ki: Mompinuŋ kamu/ yisa di’da. Dhali uni ki doṯ a’di gwondoṯ mo 24mmo/o gwo mo ki: Manṯor Gwo, aMusa a’di oki gwo mo ki: Waḵki/ wathi/ midi wu mo ki dar gi uc̱i mo tani akam piti midi mii masha ’bom jin dar ga kaṯẖ mo dhali c̱is uc̱i goma kam piti mo be. 25Dhali uni ikam ’kokini pesu/ mo gun ’koni bwam am mo. Jin ṯwa/a/ mashki’d mo dhali a’di wuki’d mo ki dar gi uc̱i mo, dhali a’di ki dhal ash ka kam piti mo be. 26Wakan si’da/ a’di jiŋ ’ko’d mo dhali jin ’kon ma p̱o/i kwara mo ntagi uni ’baar mo ’kokini pesu/ mo be. 27Dhali ’ko’di uni ’baar mo tani a’bom wuki’d si’da/ mo be. 28Dhali e mompinu mo tani wakan e uni gun ’koni pesu/ mo tani ayim midi ta asha ja mo? Haali/ uni ’baar mo mashkina yim mo be. 29Hila Yesus ki thoḵ uni gwo mo ki: Um ṯẖuthi mii mo haali/ um ’koki mish Gwo ma Arumgimis kun ’kwarkunu mo walla mom’bi’th ma Arumgimis mo be. 30Haali/ e mompinu mo tani uni mini mash mo yisa walla minu ’koki c̱i bway mo mmomash mo si’da/. Hili uni mina e waki iman’doyu gwo mo e momis mo be. 31Dhali gom gwo jin pinu ’peni mowu mo tani ’kona um ki deŋ gwo e mo, a’di jin okin ma Arumgimis um mo mmo/o gwo mo ki: 32Aha/ tana Arumgimis ma Ibrahiim mo dhali Arumgimis ma Is/hak mo dhali Arumgimis ma Yakuub mo. A’di diki ta Arumgimis gom uni gun wukin mo, hili gom uni gun ’kokin ki e mo be. 33Dhali ka waambuhany ’kwani ciḵki gwo yan mo tani uni ’kokin mo mmomer mo gom gwom piti jin ṯora a’di mo be. 34Dhali ki ’Kwani P̱arisiyiin ciḵki gwo yan ki a’di ’teki ’Kwani Sadukiyiin ’twa/ mo tani uni tulki is mo mmonṯal ’de/ mo be. 35Dhali jan ṯal ’deŋ kamu/ ’peni uni mo tani jin ta’da manmisha jo’d gwoŋḵan mo doṯki a’di gwondoṯ mo mmopal a’di mo be mmo/o gwo mo ki: 36Manṯor gwo, gwoŋḵan jana i/eḵa/ eḵ mo mbwaŋ gwoŋḵan jin ’kwarkunu mo? 37Dhali a’di ki thoḵ a’di gwo mo ki: /E mini mii en Tap̱a Arumgimis pini ka dum pini ’baar mo dhali ka ḵashiram pini ’baar mo dhali ki bwam pini ’baar mo be. 38Gwo yansan a’di ita gwoŋḵan jin ṯwa/a/ jin eḵa/ eḵ mo e gwoŋḵan jin ’kwarkunu mo be. 39Dhali jiŋ ’ko’d jin waki a’di mo tani a’dihe/ mo be. /E mini en amannyaḵ c̱a’b pini me’d is piniŋ gana/ mo be. 40Eya p̱o/ gwoŋḵan su/ gwansan kun ’kwarkunu mo tani uni i’dap̱kan ki gwoŋḵan jin c̱inu ’baar mo dhali gwo jin c̱ina imanc̱i gwo ma Arumgimis kadhamo/ mo be. 41Dhali ki ’Kwani P̱arisiyiin ’kokin mo mmotul is mo mmonṯal ’de/ mo tani Yesus ki doṯ uni gwondoṯ mo be 42mmo/o gwo mo ki: Atinta kuluma um gwo mbwa mo goma Ḵrisṯẖos mo? A’di ta ya/ maja mo? Uni thoḵ a’di gwo mo ki: Ya/ ma Dawuu’d mo be. 43Dhali a’di ki thoḵ uni gwo mo ki: Dhali waḵki/ a’di wakan mo tani atinta on ma Dawuu’d gwo ki Shi/in mo mmoyuḵ a’di ki Tap̱a mo mmo/o gwo mo ki: 44Tap̱a o’da Arumgimis pem gwo mo ki: C̱a’bi /e aha/ ki me’da bim poros pem mo ma, ntagi aha/ mina dhu uni gun ta ’kup̱ ki /e mo e bwaŋ’kwariny mom pini jin dhuna /e sho’k mo be. 45Dhali waḵka Dawuu’d ki yuḵ a’di ki Tap̱a mo tani ba/ata mmina a’di ita ya/m piti moyi? 46Dhali jan ṯal ’deŋ kamu/ yisa di’da jin mishi a’di gwo yansan thoḵ mo, walla ’pena tee c̱aan mo tani jaŋ kamu/ doḵ/e di’d ’de/ yisa jin doṯki a’di gwondoṯa kamu/ mo be.

will be added

X\