MAṮṮA 20

1Haali/ Bampa/ gi Momis a’di wana e ki wathi/ jin cila gu’b mo, a’di jin ya’d mo mon’thamo/ ka’tum mo mmoŋap̱ imanmiiya ṯu’c mo gom bwaman monsinum piti mo be. 2’Ko’di gwo jin gama a’di me’d nyaḵki imanmiiya ṯu’c piti mo gom nasa guurush ka tee mo tani a’di ki hash uni e bwaman monsinum piti mo be. 3Dhali a’di yaki’d mo doḵ/e ka tente/ ta’da tente/ pedoŋon mo tani a’di p̱arki ’kwanin tiya e mo mmodosh mo ka wuny is e mo ma suug mo be. 4Dhali e uni mo tani a’di ki o uni gwo mo ki: Um mini ii e bwaman monsinum pem mo si’da/ dhali a’diyin jin ’boro’d mo tani aha/ mina c̱i um a’di mo. Wakan uni iikin mo be. 5Gom ya jin yana a’di doḵ/e ka tente/ di’di bwaŋ ’kup mo dhali ka tente/ kwara mo tani a’di ki mii mii jin nyaḵka’d kan mo si’da/. 6Dhali ka tente/ ta’da tente/ mudhe’d mo tani a’di yaki’d mo dhali gam kun tiya mmodosh mo dhali a’di ki o uni gwo ki: Atinta dosha um mmahan ka wuny is kan iyula tee mo? 7Uni ki thoḵ a’di gwo mo ki: Haali/ wathin ṯal ’de/ yisa di’da jin ŋap̱i aman mo. A’di ki o uni gwo mo ki: Um mini iiku/ mo e bwaman monsinum pem mo si’da/. 8Dhali ki mom’pimpili/ p̱u’dki’d mo tani com gi monsinu o’da mandhu tom piti gwo mo ki: Yuḵi imanmiiya ṯu’c mo dhali c̱i uni tom buni gun miina uniya ṯu’c mo mmoṯel ’pen nyaḵki uni gun ’ko’d mo ntagi uni kun ’koni ṯwa/a/ mo be. 9Dhali ki uni gwansan kun yuḵkunu mo ka tente/ mudhe’d p̱u’dkin mo tani uni ka ’deṯe/ ’deṯe/ bu’thki nasa guurush mo. 10Dhali ki uni kun ’koni ṯwa/a/ p̱u’dkin mo tani uni kulumki gwo i bwa mo ki uni mini ’taki bu’th ki nyanye/ mo. Hili uni ’baar mo ka ’deṯe/ ’deṯe/ si’da/ bu’thki nasa guurush si’da/ mo be. 11Dhali ki uni bu’thki uni mo tani uni miikina gumgum ap̱o/ com gu’b mo 12mmo/o gwo mo ki: Uni gwansan kun miikina ṯu’c ŋ’ko’d mo ka jasa tenten ’de/ mo tani dhali /e ki dhu uni mmonyaḵki aman mana, aman kun miikina ṯu’c kun diṯadiṯ ka tente/ jin ’batha’ba’th kan mo. 13Hili a’di thoḵ jan ṯal ’deŋ kamu/ gwo mo ’peni uni mo ki: Akam pema, aha/ dinaki mii /e ki shi/ mo. Dina /e ki gam gwo me’d ki aha/ mo gom nasa guurush mo ’taa? 14Buthi a’di jin ta jim pini mo ma dhali yaku/ mo. Aha/ kwanykina a’di jin c̱ika/ uni gwansan mo kun iiyini ’ko’d mo me’d jin c̱ikika e mo be. 15Aha/ dina bway ki ḵany mo be mmomii to jin oyaa/ bwa mo gom a’di jin ta jim pem mo be. Walla mina /e ta ham ’kus mo gom aha/ mmomiga/ mii ka ’the mo ki ’bore/ mo ’taa? 16Wakan uni gun ’koni ’ko’d mo tani minu dhu nṯwa/a/ mo dhali uni gun ’koni ṯwa/a/ mo tani minu dhu ŋ’ko’d mo be. 17Dhali ka Yesus yaki’d ka gagamis e Pa Urushaliim mo tani a’di suski imanciḵ a’di gwo i’kume’d i’ce’dka su/ mo uni ’cena mo dhali e bway mo tani a’di ki o uni gwo mo ki: 18Hili ana iina ii ka gagamis e Pa Urushaliim mo, dhali Ya/ gi ’Kwani minu c̱i ’kwaniŋ gasiis kun cani me’d mo dhali iman’kwar to mo, dhali uni mini waḵ a’di mo mmo’kosh a’di jwa mo be. 19Dhali uni mini c̱i a’di ki ’kwani kun ’koki ta ’Kwani Yahuuda/ mo mmomii a’di ka maḵ mo dhali mmodor a’di mo dhali ’kosh a’di mo ki cwany’ciṯẖan dhul mo, dhali a’di midi cu mis mo ka cim kwara mo be. 20Dhali yan’ko’d ata’da gi iya/ ma Sebadi p̱u’dkini a’di mo nyaḵki iya/m piti mo dhali ’ko ki jiŋ ’kup̱a’dup̱uni bwambori a’di mo, dhala yim ki doṯ a’di gwo mo gom to mo. 21Dhali a’di ki owa yim gwo mo ki: Atinta ŋap̱a /e mo? Ayim ki thoḵ a’di gwo mo ki: Ḵani iya/m pem su/ gwansan gwo mo ma mmo’ko mo, jan ’de/ midi c̱a’b /e ki me’da bim poros pini mo dhali jan ’de/ midi c̱a’b /e ki me’da biny cam pini mo e bampam pini mo be. 22Hila Yesus ki thoḵ a’di gwo mo ki: Um ’koki mish to jin doṯkina um mo be. Um mini mish p̱iya ḵubbaaya jin p̱ikika/ mo ’taa? Uni ki thoḵ a’di gwo mo ki: Aman mina mish mii mo be. 23A’di ki thoḵ uni gwo mo ki: Um mini p̱iya ḵubbaayam pem mo. Hili mmo’ko aha/ ki me’da bim poros pem mo dhali ki me’da cam pem mo tani a’di diki ta miim pem mmodhal um bway mo, haali/ a’di ta mo gom uni gwansan kun thosonkin ma Ababam pem mo gom uni mo be. 24Dhali ki uni gun ’koni ’kume’d ciḵki gwo yan mo tani uni ’kokin ka nyor mo ap̱o/ uni su/ gwansan mo kun ta ikam mo be. 25Hila Yesus yuḵki uni mo dhali o gwo mo ki: Um mishki mo mo ki tap̱a kun ’koki ta ’Kwani Yahuuda/ mo mii miin tap̱a ap̱o/ uni mo dhali ’kwanim buni gun can mo miiki moshirr ap̱o/ uni mo be. 26Mii yansan minu ’koki mii wakan e bwam um mo. Hili a’diyin jin midi ’taki ca mo mbwam um mo tani a’di midi mii ta amanmiiya ṯu’c bum mo. 27Dhali a’diyin jin midi ’taki di nṯwa/a/ mbwam um mo tani a’di midi mii ta c̱iŋkinam bum mo be. 28Wakansan me’d Ya/ gi ’Kwani p̱u’dki’d mo ki a’di minu ’koki mii to mo tani hili ki a’di midi mii to gom ’kwani mo dhali mmoc̱i mondiki/em piti mo mmota amangwam gom ’kwani ka ris mo be. 29Dhali me’d jin iikina uni ka pije/ mo ’peni Pa Ariiha mo tani adhana waambuhany ’kwani baṯẖki a’di nsho’k mo be. 30Dhali hili ’kwaniny ja’da/ isu/ ’kokin e shemen bway mo be. Ki uni ciḵki gwo ka Yesus yaki’d ki yampe mo tani uni cuu gwo kagahara ki: Miiyi mii ap̱o/ aman mo ma, Ya/ ma Dawuu’d mo. 31Dhali awaambuhany ’kwani ḵucurki uni ki gwo mo mmoṯor uni gwo mo mmo’ko ki shwam mo. Hili uni cuukin kagahara ki nyanye/ mo ki: Tap̱a, miiyi mii ap̱o/ aman mo ma, Ya/ ma Dawuu’d mo. 32Dhala Yesus doshki’d mo dhali yuḵ uni mo dhali o gwo mo ki: Atinta o um bwa jin miga/ mii gom um mo? 33Uni thoḵ a’di gwo mo ki: Tap̱a, dhalki em bam ḵa’du mo ma. 34Dhala Yesus ki ḵwo’c uni e i is mo dhali ta uni em buni ki me’d mo, dhali ki jahanne/ uni bu’thki momish mom buni mo dhali uni baṯẖki a’di nsho’k mo be.

will be added

X\