MAṮṮA 17

1Dhali ’ko’da cim pe’de/ mo tani Yesus ki susa Buṯerus nyaḵki a’di mo dhala Yakuub dhala Yohaan jin ta’da kam piti mo, dhali sus uni bway ’kuwosh jin turatur uni ’cena mo. 2Dhali a’di ki war is piti mbwambori uni mo, dhali bwam/em piti ’twaḵki mo mo me’da tente/ mo dhali burrinyem piti warki’d ki bany bany me’d moŋkush mo be. 3Dhali hili aMusa dhali Iliyya piki uni i is mo mmoṯora/ ṯor nyaḵki a’di mo be. 4Dhala Buṯerus ki owa Yesus gwo mo ki: Tap̱a a’di ’boro’d gom aman mmo’kona aman mmahan mo. Waḵki e ona bwa mo tani aha/ mina nyaŋ c̱iŋŋa/ ikwara mmahan mo, jan ṯal ’de/ gom /e mo dhali jaŋ kamu/ goma Musa mo dhali jaŋ kamu/ gom Iliyya mo be. 5Ki a’di di’d mmo/o gwo mo tani hili araḵ jin kushu mo mo ’kamki uni is mo dhali ’twa/ ’pena raḵ yan mo tani o gwo mo ki: Yansan ta Ya/m pem jin enka/ mo, a’di jin ’borka/ bwa i is mo. Ciḵi a’di gwo mo ma. 6Ki imanciḵ a’di gwo ciḵki gwo yan mo tani uni ṯa’kki bwam/em buni a’cesh mo dhali uni ’tu’dkunu mo ki moŋḵo/ is mo be. 7Hila Yesus p̱u’dki’d mo dhali ta uni is ki me’d mo mmo/o gwo mo ki: Cuyi mis mo ma. Dhalku/ is ki ḵo/ mo ma. 8Dhali ki uni ’de’kki em buni ki mis mo tani uni ’koki p̱ar wathiŋ kamu/ e mo, hili jasa Yesus a’di ’de/ mo be. 9Dhali me’d jin p̱u’dkina uni ka ’cesh ’peni ’kuwosh mo tani Yesus ḵan uni gwo mo ki: Dhalku/ wathin ṯal ’deŋ kamu/ ki ṯor tonyjan yan mo ntagi Ya/ gi ’Kwani minu ’de’k mo ’peni mowu mo be. 10Dhali imanciḵ a’di gwo doṯ a’di gwo mo ki: Atinta i/ona iman’kwar to gwo mo ki Iliyya midi mii pu’du/ nṯwa/a/ mo? 11A’di ki thoḵ uni gwo mo ki: Iliyya pu’dki’d mo dhali a’di midi thoson aris to ’baar mo be. 12Hili aha/ ṯora um gwo mo ki Iliyya a’di p̱u’dki’d hila/ mo dhali uni ’koki mish a’di mo, hili uni ki mii a’diyin jin ’bor uni bwa mo. Wakan si’da/ Ya/ gi ’Kwani mina isi ’kosh ka nyor mo e me’d buni mo be. 13Dhali yan’ko’d imanciḵ a’di gwo mishki gwo ’ban mo ki a’di ṯorki uni gwo mo goma Yohaan jin ta’da manmiiya mii ki yi’de/ mo be. 14Dhali ki uni p̱u’dkin eya waambuhany ’kwani mo tani wathiŋ kamu/ p̱u’dki’d e a’di mo dhali c̱a’bki jiŋ ’kup̱a’dup̱uni bwambori a’di mo dhali o gwo mo ki: 15Tap̱a, miiyi mii ap̱o/ ya/m pem mo ma. Haali/ a’di wu gamp̱aŋ mo dhali a’di ’kosha is ka nyor kagahara mo. Haali/ me’d ka ris a’di biṯki’d e bwam o’d mo dhali me’d ka ris a’di biṯki’d e bwam yi’de/ mo be. 16Dhali aha/ suskina a’di e imanciḵ /e gwo mo tani dhali uni ’koki mish a’di wac̱ mo be. 17Dhala Yesus ki thoḵ uni gwo mo ki: Ayy, um ’kwani kun aṯẖa moŋgam gwo is ki aṯẖ kan mo dhali kun c̱aca ii ki c̱aca mo eya nyaḵum yil bum mo, aha/ mina di i um ki mo gi wakata mo? Dhali ki mo gi wakata imiga/ i’dim ’kup̱ e um mo sa/? Susi a’di mmahan i aha/ mo ma. 18Dhala Yesus ki ḵucur a’di ki gwo mo dhali aruma ’cesh p̱u’dki’d ka pije/ ’peni a’di mo dhali a’ci a’di wac̱kunu ki jahanne/ mo be. 19Dhali yan’ko’d imanciḵ a’di gwo p̱u’dkina Yesus mo uni ’cena mo dhali o a’di gwo mo ki: Atinta ’kona aman ki mish a’di ur ka pije/ mo sa/? 20A’di ki thoḵ uni gwo mo ki: Haali/ moŋgam gwo is bum gwa’dagwa’d mo. Haali/ ka jiŋ gana/ aha/ ona um gwo mo ki, waḵki/ um mini ta gi moŋgam gwo is me’d emen to jin miinuwa ’tash mo tani um mini o wosha turga/ yansan gwo mo ki: Dhalki a’di joc̱u/ mo ’peni mo yansan is ’ko’di mun mo ma tani dhali a’di minu joc̱ mo dhali toŋ kamu/ yisa di’da jin minu mol mii gom um mo be. 21Hili mii yansan midi diki piyu/ ’kup̱ ka pije/ mo hili isi ciki/ ki mon’tho mo dhali ki moŋga/ to mo be. 22Me’d jin tulkina uni is mo mmonṯal ’de/ mo e Pany Jaliil mo tani Yesus ki o uni gwo mo ki: Ya/ gi ’Kwani minu c̱i ’kwanin thusi me’d mo be. 23Dhali uni mini ’kosh a’di jwa mo dhali a’di minu ’de’k ka cim kwara mo. Dhali uni butha ’tham kagahara mo be. 24Dhali ki uni p̱u’dkin e Paŋ Kap̱ranahuum mo tani imantera tulp̱a/ gom gu’b gi mondheleladhelel mo p̱u’dkina Buṯerus mo dhali o a’di gwo mo ki: Din ma manṯor gwom bum ki c̱iya thulp̱a/ mo ’taa? 25A’di ki o a’di gwo mo ki: Nye. Dhali ki a’di p̱u’dki bway pa mo tani Yesus ki ṯora ṯor ki a’di nṯwa/a/ mo mmo/o gwo mo ki: Atinta kuluma /e mbwa mo, Simaan? ’Peni mana iḵal ma maliḵ kun ’kon e mony’cesha thulp̱a/ mo dhali to gun woṯẖu/ ’kup̱ mo? ’Peni iya/m buni mo ’taa? Walla ’peni kun tiya mo? 26Dhali a’di o a’di gwo mo ki: ’Peni kun tiya mo tani Yesus ki o a’di gwo mo ki: Wakan iya/ ’kon ki ’kus mo. 27Bahili mmomina ana ’koki kol uni mo tani yaku/ mo e yi’de/ mo ma dhali biṯa bi’c mo dhali bu’th wa’c jin yayi’di ṯwa/a/ ka pije/ mo dhali ki /e mini ḵa’d a’di ’twa/ mo tani /e mini gama guurush e ’twam piti mo. Buthi c̱aan mo dhali c̱i a’di ki uni mo gom aha/ mo dhali gom is pini mo.

will be added

X\