MAṮṮA 16

1Dhali ’Kwani P̱arisiyiin dhali ’Kwani Sadukiyiin p̱u’dkin mo dhali pal a’di ki gwo mo. Uni doṯki a’di mo mmoṯor uni jamas mii ’peni momis mo be. 2A’di ki thoḵ uni gwo mo ki: Ki mo ta mom’pimpili/ mo tani um ki o gwo mo ki: A’di midi ta a’di momp̱iriny mo shwane/ haali/ momis ’pera’per mo be. 3Dhali ka’thamo/ tani a’di midi ta mon’thama p̱unthar mo shwane/ mo haali/ momis ’pera’per mo dhali wuma wuma mo. Um mishina jo’da yir mii gi momis mo tani hili atinta ’kona um ki misha jo’d jamas mii ma tee mo? 4Um ’kwani gun tana nyaḵum yil kun ta thus ki thus kan mo dhali imanmii miinyc̱al mo tani ŋap̱ki jamas mii mo janta? bahili jamas mii minu c̱i um mo yisa hili isi ciki/ jamas mii ma Yuunaan mo. Wakan a’di ki dhal uni mo dhali ya mo be. 5Ki imanciḵ a’di gwo merkin e ’bana gap̱a kamu/ mo tani uni ŋaki maaŋḵuthu’d mo mmo’koki guyi jaŋ kamu/ mo be. 6Yesus ki o uni gwo mo ki: Hili ki ’bore/ mo ma dhali jiyi acumaṯ gi ’Kwani P̱arisiyiin mo dhali ’Kwani Sadukiyiin mo ma. 7Dhali uni su’kkin ki gwo mo, uni ’cena c̱em buni mo mmo/o gwo mo ki: Ana ’konaki guyu/ maa mo be. 8Hila Yesus mishki gwo yansan mo dhali o uni gwo mo ki: Ayy um ’kwani kun gwa’da moŋgam gwo is ki gwa’d mo. Atinta suka um ki gwo c̱em bum kan mo? mmodara um ki tonṯe/ mo. 9’Kona um ki nyiṯẖ mo ’taa? ’Kona um ki ka gwo e gom maaŋḵuthu’d kun shwana ’kwani alaap̱i mudhe’d mo dhali anura/ ekata i’tu’dkina um mo mmotul is mo? 10Walla maaŋḵuthu’di pesu/ kun shwana ’kwani alaap̱i doŋon mo dhali anura/ ekatinta i’tu’dkina um mmotul is mo? 11Atinta ’kona um ki nyiṯẖ mii mo ki aha/ dinaki o gwo mo gom tonṯe/ mo? Jiyi acumaṯ gi ’Kwani P̱arisiyiin mo dhali ’Kwani Sadukiyiin mo ma. 12Dhali yan’ko’d uni mishki gwo ’ban mo ki a’di diki ṯor uni gwo mo mmojiya cumaṯ gi tonṯe/ mo, hili gom gwonṯor gi ’Kwani P̱arisiyiin mo dhali ’Kwani Sadukiyiin mo be. 13Dhali ka Yesus p̱u’dki’d e bampa/ gi Paŋ Kaysariyya gi Pam P̱ilibbi mo tani a’di ki doṯ imanciḵ a’di gwo gwo mo ki: Ki ’kwani oki Ya/ gi ’Kwani jana a’dan mo? 14Dhali uni ki thoḵ a’di gwo mo ki: Kun tiya on ka Yohaan jin ta’da manmiiya mii ki yi’de/ mo. Dhali kun tiya on ki Iliyya mo. Dhali kun tiya on ka Irmiya mo walla jan ’de/ ’peni imanc̱i gwo ma Arumgimis kadhamo/ mo be. 15Dhali a’di ki o uni gwo mo ki: Hili ba um on ki aha/ tana aja mo? 16Simaan Buṯerus thoḵ a’di gwo mo ki: /E tana Ḵrisṯẖos mo, Ya/ ma Arumgimis jin di’d ki e mo be. 17Dhala Yesus ki thoḵ a’di gwo mo ki: Mom’bor mii gom /e mo, Simaan jin ta ya/ ma Yuuna mo. Haali/ buŋgwar is mo dhala bas mo tani uni ’koki ṯor a’di yan eya tente/ e /e mo, hili, Ababam pem a’di jin di’d e momis mo be. 18Dhali aha/ ṯora /e gwo mo, /e jin tana Buṯerus mo, dhali eya p̱o/ wosh yan mo tani aha/ mina nyaŋa ḵaniisam pem mo, dhali mom’bi’th gi mowu mo tani midi diki p̱i a’di jip̱i/ mo be. 19Aha/ mina c̱i /e amup̱tha/ gi Bampa/ gi Momis mo, dhali ma to yin jin mina /e nnon mo e mony’cesh mo tani a’di minu non mo e momis mo dhali ma to yin jin mina /e ndhal me’d e mony’cesh mo tani a’di minu dhal me’d e momis mo be. 20Yan’ko’d a’di ki ḵan imanciḵ a’di gwo gwo mo ki ’bi’th mo, mmodiki ṯor wathin ṯal ’deŋ kamu/ gwo mo ki a’di ta’da Ḵrisṯẖos mo be. 21’Peni mo c̱aan mo tani Yesus ṯelki mii ’pen mo mmoṯor imanciḵ a’di gwo gwo mo ki a’di midi mii ya mo e Pa Urushaliim mo dhali ’kosh is ka nyor ki to ka ris mo ’peni ’kwani gwanyjaḵa/ mo dhali ’peni igasiis mo dhali iman’kwar to mo, dhali a’di minu ’kosh jwa mo, dhali ka cim kwara mo tani a’di minu ’de’k mo be. 22Dhala Buṯerus ki bu’th a’di mo dhali ṯel mii ’pen mo mmoḵucur a’di ki gwo mo mmo/o gwo mo ki: Arumgimis diki ṯosh kan mo, Tap̱a. Mii yansan midi diki p̱u’di /e ki sule/ sule/ mo be. 23Hili a’di ki ṯu’k mo dhali owa Buṯerus gwo mo ki: Seṯaan, yaku/ i’ko’di aha/ mo ma. /E noni aha/ ’kup̱ mo. Haali e diki di ki ’ban ma Arumgimis mo, hili /e din ka ’ban gi ’kwani mo be. 24Yan’ko’d Yesus ki ṯor imanciḵ a’di gwo gwo mo ki: Waḵki/ wathiŋ kamu/ midi yayu/ ibaṯẖ aha/ nsho’k mo tani dhalki a’di non is piti mo ma dhali ’de’k cwany’ciṯẖan dhul piti mo dhali baṯẖ aha/ nsho’k mo. 25Haali/ a’diyin jin midi woṯẖ mondiki/em piti mo tani midi this a’di e mo dhali a’diyin jin midi this mondiki/em piti e mo gom gway pem mo tani midi gam a’di mo be. 26Haali/ mii jin nyo/a wathi/ mo wakata si’da/ waḵki/ a’di gama’da ris to ’baar mo e mony’cesh yan mo dhali this mondiki/em piti e mo? Walla wathi/ midi wan mondiki/em piti ’ba/ ka tinta mo? 27Haali/ Ya/ gi ’Kwani midi p̱u’du/ mo nyaḵki iman’doyu gwom piti ilu/ mo ki monyca gi com mo dhali yan’ko’d a’di midi c̱i aris ’kwani ’baar mo ka ’deṯe/ ’deṯe/ to jin wana e ki mii kun miikina uni mo be. 28Ka jiŋ gana/ aha/ ona um gwo mo ki ’kwanin tiya ’kon kun doshkini mahan mo shwane/ mo tani uni mini ’koki nyoḵ wu nṯwa/a/ mo ki uni ’koki p̱ar Ya/ gi ’Kwani e mo mmop̱u’du/ mo nyaḵki Bampam piti mo be.

will be added

X\