MAṮṮA 11

1Dhali ka Yesus ’baarki gwo yansan mmoye’thkina a’di kum piti kun ’koni ’kume’d i’ce’dka su/ sho’k ki gwo mo kun ta imanciḵ a’di gwo mo tani a’di yaki’d mo ’peni mun mo dhali ṯor gwo mo dhali c̱i gwo mo e ’peŋkuman bampam buni mo be. 2Dhali ka Yohaan ciḵki gwo mo ki a’di di’d eya sijin mo gom mii kun miikin ma Ḵrisṯẖos mo tani a’di hashki gwo mo ki imanciḵ a’di gwo mo 3dhali o a’di gwo mo ki: A/e ta a’di jin midi pu’du/ mo ’taa? walla aman mina hil jaŋ kamu/ mo? 4Dhala Yesus ki thoḵ uni gwo mo ki: Iiku/ mo ma dhali ṯora Yohaan gwo mo gom to jin ciḵa um mo dhali jin p̱arkina um e mo be 5ki uni gun tana ja’da/ mo tani bu’thki momish mo mo dhali uni gun ta ŋwol mo tani iin ki sho’k mo, dhali uni gun ’kosha monthus mo tani dhelelkunu is mo dhali uni gun tana ’diye/ mo tani ciḵki gwo mo dhali uni gun wukin mo tani cukunu mis mo dhali uni gun hatha’ko’d mo tani uni c̱ikunu gwom ’boro’d mo be. 6Dhali mom’bor mii gom a’diyin, a’di jin midi diki bu’th moŋkol e aha/ mo be. 7Me’d jin iikina uni e bway mo tani Yesus ṯelki mii ’pen mo mmoṯora waambuhany ’kwani gwo mo isi gwo goma Yohaan mo ki: Atinta iikina um ka pije/ mo mmop̱ar e mo e mombwaasho mo? Apil jin yiḵinkina ’tham is mo ’taa? 8Atinta iikina um ka pije/ mo mmop̱ar e mo? Mmop̱ar wathi/ jin hithi burrinyen na’bulka/ e mo ’taa? Hili uni gwansan kun hithi burrinyen na’bulka/ mo tani uni ’kon e gu’b gi imaliḵ mo be. 9Dhali atinta iikina um ka pije/ mo mmop̱ar e mo? Amanc̱i gwo ma Arumgimis kadhamo/ mo ’taa? Nye. Aha/ ṯora um gwo mo dhali a’di jin bolo’da manc̱i gwo e mo. 10A’di yansan ita a’di jin ’kwarkunu gwo mo ki: Hili mo mo ma, aha/ mina hasha gum bway pem mbwambori jis /em pini mo, a’di jin midi thoson /e bway pini nṯwa/a/ mo be. 11Ka jiŋ gana/ aha/ ona um gwo mo e bwaman uni gwansan kun dhodha up̱ mo tani jaŋ kamu/ yisa di’da jin ca’d ka Yohaan jin ta’da manmiiya mii ki yi’de/ mo. Hili a’di jin p̱isap̱is mo e Bampa/ gi Momis mo tani a’di nyca’d ki a’di mo be. 12’Pena tee ma Yohaan jin ta’da manmii ki yi’de/ mo ntagi shwane/ mo tani Bampa/ gi Momis ’koshu ki mombujur mo dhali ’kwani kun bujurki a’di mo tani bu’thki a’di ki mom’bi’th mo be. 13Haali/ aris imanc̱i gwo ma Arumgimis kadhamo/ mo dhali gwoŋḵan jin c̱inu mo tani di’d mo mmo/o gwo is mo ntaga Yohaan mo be. 14Dhali waḵki/ um ona bwa ki bu’th a’di mo tani a’di ta’da Iliyya jin midi p̱u’du/ mo be. 15Dhali a’diyin jin ta’d gi gu’ban’ce mo tani dhalki a’di ciḵ gwo mo ma. 16’Kwani ma nyaḵum yil gwansan mo tani miga/ dhu uni ka p̱ar ’ban kata mo? Uni wana e ki uc̱i kun ’kon mo e mo ma suug mo dhali mmoyuḵa yuḵ mo ki uni gun nyaḵ uniya lo’b buni mo ki: 17Aman p̱ina athele/ mo gom um mo tani dhali um ’koki sa mo be. Aman gwona mo mmomiiya c̱inthar mo tani dhali um ’koki ko mo ki kony jwa mo be. 18Haala Yohaan p̱u’dki’d mo dhali diki shwa to mo walla diki p̱i to mo dhali uni o gwo mo ki: A’di ta’d ga rum thus mo be. 19Dhali Ya/ gi ’Kwani p̱u’dki’d mo dhali shwa to mo dhali p̱i to mo dhali uni o gwo mo ki: Hili mo mo ma. Amanshwana ṯe/ anyor mo dhali aman’kosh ma su mo, a’di jin ta’da mugu gi imantera thulp̱a/ mo dhali ’kwani kun ta imanmii miinthus mo. Hili moyuḵ a’di karu ka ḵar/e e mo ki mii ma yimi ’baar mo be. 20Dhali yan’ko’d a’di ṯelki mii ’pen mo mmoṯor ’kwani gi ’peŋkuman bampa/ gwo mo ki ’bi’th mo e mo jin miikunu miiny caagam piti nycine/ mo haali/ uni ’koki rica du is mo be. 21Wayyi e um, ’Kwani gi Pa Kurasiin mo. Dhali wayyi e um, ’Kwani gi Pam Beeṯsayda mo. Haali/ waḵki/ adhan miiny caaga/ kun miikunu mo e um mo tani minu ’taki mii mo e Pan Sur mo dhali e Pan Saydaa/ mo tani uni mini ’taki rica du is mo kadhamo/ mo nnii mmohi’th burrinyen shawaal mo dhali ’kosh ’piny mo be. 22Hili aha/ ṯora um gwo mo ki a’di mina ’twa/ si’d mo yisa ka tee gi gwon dwall mo gom Pan Sur mo dhali Pan Saydaa/ mo mmobol um e mo yisa. 23Dhali um ’Kwani gi Paŋ Kap̱ranahuum mo a/um minu ’de’k me’d momis mo ’taa? Um minu ’doyu/ ka ’cesh eya Haawiya mo. Haali/ waḵka dhana ṯuca ’bi’thga/ kun miikunu mo e um mo tani minu ’taki mii mo gom Pan Saduum mo tani a’di midi ’taki di ntaga tee yansan mo be. 24Hili aha/ ṯora um gwo mo ki a’di mina ’twa/ si’d mo yisa goma tee gi gwon dwall mo gom Pan Saduum mo mmobol um e mo yisa. 25Dhali ki mo c̱aan mo tani Yesus ki ṯor gwo mo eya tente/ mo ki: Aha/ ’bora /e bwa i is mo. Ababa jin ta Tap̱a gi momis mo dhali mony’cesh mo, ki /e bagki to gwansan ’peni ’kwani kun yuḵayuḵ mo dhali kun mishi gwo ’ban mo mmoṯor a’di eya tente/ ki uni gun tana ’pereny mo be. 26Nye, Ababa, gom ku gi wakan mo tani a’them pini ona bwa mo be. 27Aris to ’baar mo c̱ikunu aha/ mo ka Ababam pem mo dhali jan ’deŋ kamu/ yisa di’da jin mishki Ya/ mo hili isi ciki/ Ababa mo, dhali jan ’deŋ kamu/ yisa di’da jin mishki’da Ababa mo hili isi ciki/ a’di jin ta Ya/ mo dhali ma a’din ’de/ yin jin mina Ya/ ikwany mo tani mina a’di iṯor eya tente/ mo be. 28Iiyu/ i aha/ mo ma, aris ’kwani ’baar mo kun miina ṯu’c mo dhali kun ’thira ton diṯi’d mo, dhali aha/ mina c̱i um mosi/is mo. 29Buthi dhaŋḵa’b tom ’bam pem ap̱o/ um mo ma dhali da/ari ’peni aha/ mo haali/ aha/ tana man’thup̱ e mo dhali amankar is ki gwa’d eya du mo dhali um mini gam mosi/is goma ḵashiram bum mo be. 30Haali/ dhaŋḵa’b tom ’bam pem mo tani a’di ’disha’dish mo dhali tom pem jin ḵalka/ mo tani a’di p̱o’dap̱o’d mo be.

will be added

X\