MARKUS 3

1Doḵ/e a’di cic̱ki gu’b gi montul is mo dhali wathi/ diki’d jin ḵu’thkina me’d guŋkuru/ mo be. 2Dhali uni timki a’di mo mmop̱ar a’di e mo waḵki/ a’di midi ’taki wac̱ a’di ka cim ma pesu/ mo, wakan ki uni mini ’taki ta gi gwo mmoyer a’di is ki gway mo be. 3Dhali a’di ki o wathi/ jin ḵutha me’d guŋkuru/ gwo mo ki: Yayu/ ise mo ma. 4Dhali a’di ki o uni gwo mo ki: A’di ta mii jin dhala gwoŋḵan bway mo mmomii mii jin ’boro’d ka cim ma pesu/ mo ’taa? walla mii jin ta jin thus minu mii mo? mmowoṯẖa/ woṯẖ mo ’taa? walla mmo’kosha ’kosh mo? Hili uni ’kon ki shwam mo be. 5Dhali a’di ki hil mo mo mmo’kar mo ki e mo ka nyor e uni mo mmoḵal bwa diṯ mo goma dum buni kun ’bitha’bi’th mo. Dhali a’di ki o wathi/ gwo mo ki: Hethi me’d pini mo ma. Dhali a’di he’thki a’di mo dhali me’d piti wac̱kunu mo be. 6Dhali ’Kwani P̱arisiyiin iikin ka pije/ mo dhali ki jahanne/ uni ki gam ’twa/ ’kup nyaḵki ’Kwani Hirodusiyiin ap̱o/ a’di mo mmo’ce’d a’di sho’k mo be. 7Yesus a’di yaki’d mo nyaḵki imanciḵ a’di gwo mo e shemen ma al mo dhala dhana buhany wathimpa ’peni Pany Jaliil baṯẖki a’di nsho’k mo. Dhali ’peni Pa Yahuudiyya si’da/ mo be 8dhali ’peni Pa Urushaliim mo dhali ’peni Pa Adumiyya mo dhali ’peni bampa/ jin di’d e bwamp̱o/ Yi’deŋ Ḵumma/ Uurdun mo dhali ’peni Pan Sur mo dhali ’peni Pa Saydaa/ mo, dhana waambuhany ’kwani mmociḵa uni gwo mo goma ris mii kun miikina a’di mo tani, uni p̱u’dkini a’di mo be. 9Dhali a’di ṯorki imanciḵ a’di gwo gwo mo mmothosona ḵur gom a’di mo goma waambuhany ’kwani mo, isi ciki/ ki uni mini ’koki ’taki yap̱ a’di ki is mo. 10Haali/ a’di wac̱ki’da wac̱ ka ris mo, wakan ki aris uni kun ’koshkina ’ba’th ka ris mo gac̱kina gac̱ mo mmota a’di is ki me’d mo. 11Dhali ka rum thus kun nyo/on p̱arki a’di e mo tani uni ṯa’kkina ’cesh mbwambori a’di mo dhali cuu gwo ki dhan ’twa/ kun caaca ki: /E ta Ya/ ma Arumgimis mo be. 12Dhali a’di ki ḵan uni gwo ki ’bi’th mo mmodhalku/ ki dhal a’di ki a’di minu mish mo. 13Dhali a’di yaki’d ka gagamis e moŋ’kuwosh mo dhali a’di ki yuḵ uni gwansan nyaḵki a’di mo, uni kun ona bwa a’di ki sus mo. Dhali uni p̱u’dkini a’di mo be. 14Dhali a’di ki dhu uni kun ’koni ’kume’d i’ce’dka su/ mo mmonyaḵ ’ko ki a’di mo dhali mmohash uni mmoc̱i gwo mo 15dhali mmota gi moshirr mo mmo/ura ruma ’cesh ka pije/ mo. 16Simaan, a’di jin yuḵkunu gway ka Buṯerus mo, 17dhala Yakuub jin ta ya/ ma Sabadi mo dhala Yohaan jin ta’da kam ma Yakuub mo, uni kun yuḵkina a’di gway ka Buwanarjis mo jin ta ’pemen gwo jin onu ki iya/ ma wara sho’k mo. 18Dhala Andaraawus mo dhala P̱ilibbus mo dhala Barṯulamaawus mo dhala Maṯṯa mo dhala Ṯuuma mo dhala Yakuub jin ta ya/ ma Halp̱a mo dhala Ṯaddaawus mo dhala Simaan gi Paŋ Kaana mo, 19dhala Yahuusa Iskariyuuṯi jin ’ciṯẖi/ a’di is ki gwo mo be. Dhali yan’ko’d a’di yaki bway pa mo be. 20Dhala waambuhany ’kwani p̱u’dkin mo dhali tuli isi monṯal ’de/ doḵ/e mo. Wakan uni ’koki ta gi mo mo mmoshwa to mo. 21Dhali ki imugum piti ciḵki gwo gom a’di mo tani uni p̱u’dkin mo dhali ŋap̱ a’di mo mmobu’th mo haali/ uni o gwo mo ki: A’di guski’da du mo be. 22Dhali iman’kwar to pu’dkin mo ka luŋgu’b ’peni Pa Urushaliim mo mmo/o gwo mo ki: A’di bu’thkin ma Baalsebuul mo dhali ki gway gi tap̱a ma ruma ’cesh mo tani a’di urkina a’di aruma ’cesh ka pije/ mo be. 23Dhali a’di ki yuḵ uni i a’di mo dhali ṯor uni gwo mo ki gwom ’bi’th/e mo ki: A/ka Seṯaan mishi is piti ur ka pije/ c̱e Seṯaan mo ’taa? 24Waḵki/ ’peŋkuman bampa/ ḵwa/u bwa mo e is piti mo tani ’peŋkuman bampa/ c̱aan midi mol dosh mo be. 25Dhali waḵki/ gu’b ḵwa/u bwa mo apo/ is piti mo tani gu’b c̱aan midi mol dosh mo be. 26Dhali waḵka Seṯaan midi cu mis ap̱o/ is pitiŋ gana/ mo wakan dhali ḵwa/ bwa mo tani a’di midi mol dosh mo, hili a’di midi daḵ ka bwa i’ba/ mo be. 27Hili wathin ’deŋ kamu/ yisa di’da jin midi mish cic̱ gu’b gi wathi/ jin ’bitha’bi’th mo dhali shi/ tom piti is mo, hili isi ciki/ a’di midi mii deḵ wathi/ jin ’bitha’bi’th ka shi/ nṯwa/a/ mo. Dhali yan’ko’d ka jiŋ gana/ mo tani a’di midi shi/ gu’b piti is mo be. 28Ka jiŋ gana/ aha/ ona um ki, aris miinthusi ’baar mo minu gwam ki iya/ gi ’kwani mo, dhala ris gwo sor gunn kun wala uni mo. 29Hili a’di jin wali gwo sor ap̱o/ Shi/in Dheleladhelel mo tani minu ’koki gwam miinthus piti ki sule/ mo, hili a’di dina mii m’ba/ ki sule/ sule/ e miinthus mo be. 30Haali/ uni oki gwo mo ki: A’di ta’d ga rum thus jin nyo/o’d mo be. 31Dhali kum dhali ikam piti p̱u’dkin mo dhali dosha pije/ mo. Uni ki hash a’di gwo mo dhali yuḵ a’di mo be. 32Dhala dhana waambuhany ’kwani ’kokini ’kam a’di is mo dhali uni ki o a’di gwo mo ki: Kwan dhali ikam pini dhali i’bwahan uni ’kona pije/ mmahan mo mmodoṯ /e mo be. 33Dhali a’di ki thoḵ gwo mo ki: Aja sa/ nta’da ta’dam pem dhali ikam pem mo? 34Dhali a’di ki hil mo mo mmo’kar mo ki e mo gom uni gwansan kun ’kon mmo’kam a’di is mo, dhali a’di ki o gwo mo ki: Ita’dam pem anan be dhali ikam pem anan mo be. 35A’diyin jin mii’d ki bwa ma Arumgimis mo tani a’di ita’da kam pem mo dhali ’bwah pem mo dhali ata’dam pem mo be.

will be added

X\