MARKUS 12

1Dhali a’di ṯelki mii ’pen mo mmoṯor uni gwo mo ki gwom ’bi’th/e mo mmo/o gwo mo ki: Wathi/ diki’d mo jin siki’da mura’th mo dhali a’di ki nyaŋa goŋ mo mmo’kam a’di is mo dhali a’di ki c̱wany jis gom yimana mura’th mo dhali a’di ki nyaŋ ’kuḵuma/ isi mis mo, dhali a’di ki dhal a’di e imanmii to ka guurush mo dhali a’di ki ya bampaŋ kamu/ jin si’dasi’d mo be. 2Dhali ki mo p̱u’dki’d mo tani a’di ki hash c̱iŋkinaŋ kamu/ e imanmii to ka guurush mo mmo’taki ḵali maman cwan tiya ’peni monsinu mo be. 3Dhali uni bu’thki a’di mo dhali dor a’di mo dhali uni ki hash a’di me’d ’te/ mo be. 4Doḵ/e a’di ki hash ki uni c̱iŋkinaŋ kamu/ i uni mo dhali uni waki a’di ’kup̱ ki jama/ mo dhali uni ki mii a’di ka jin thus ki mon’the is mo be. 5Dhali a’di ki hashki uni jaŋ kamu/ mo dhali a’di si’da/ ’koshkina uni jwa mo. Dhali wakan si’da/ kun tiya ka ris ’koshkina uni mo dhali kun tiya dorkina uni mo dhali kun tiya ’koshkina uni jwa mo be. 6A’di ta’d gi jasi jin ṯal ’deŋ gana/ mo jin di’di a’di mo, a’di jin ta ya/m piti jin ena a’di ki en gana/ mo. Ŋ’ko’d a’di ki uṯẖki uni ya/m piti mo mmohashki a’di e uni mo mmo/o gwo mo ki: Uni mini taḵ ya/m pem mo be. 7Hili uni gwansan kun miiki to ka guurush mo o gwo mo ka rem ’kup̱ mo ki: Amanḵal mala c̱aan p̱u’dki’d mo. Dhalki ana ’kosha a’di jwa mo dhali mal midi ta jim bana mo be. 8Dhali uni bu’thki a’di mo dhali ’kosh a’di mo dhali kar a’di ’pen ka pije/ mo ’peni bwam monsinu mo be. 9Ata mina com gi mo ma mura’th i mii mo sa/? A’di midi p̱u’du/ mo dhali ’ce’d uni gwansan sho’k mo kun miiki to ka guurush mo dhali c̱i mo ma mura’th ki ’kwanin tiya mo be. 10’Kona um ki deŋ Gwo e mo ’taa? Gwo jin ’kwarkunu mo. Ka dhan wosha caaga/ yansan jin waḵkina imannyaŋ gu’b mo tani warki’d ki dhan wosh gi ’kup̱an ma rukun gu’b mo. 11Yansan ta mii gi Tap̱a mo be. Dhali a’di ta dhan mii jin meru em bana mo be. 12Dhali uni palki mii mo mmo’taki cesh a’di mo tani hili uni ḵo/kina waambuhany ’kwani mo haali/ uni nyiṯẖkin ki a’di ṯorki gwom ’bi’th/e yansan ap̱o/ uni mo. Wakan uni dhalki a’di mo dhali ii mo be. 13Dhali uni hashki a’di ’kwanin tiya ’peni ’Kwani P̱arisiyiin mo dhali ’kwanin tiya ’peni ’Kwani ma Hirodusiyiin mo mmo’taki cesh a’di ki gwo jin ona a’di mo. 14Dhali uni p̱u’dkin mo dhali o a’di gwo mo ki: Amanṯor Gwowa, aman misha ki /e ta a’diŋ gana/ mo dhali /e diki mii mii ka gwar ’de/ mo gom wathiŋ kamu/ mo, haali e diki taḵ ’kwani gom monycam buni mo hili ka jiŋ gana e ṯori gwo gi bway ma Arumgimis mo be. A/a’di ta gwoŋḵan jin minu c̱ika Kaysara thulp̱a/ mowa? walla minu dhalku/ mo? 15Mina aman ’taki c̱iya thulp̱a/ mo ’taa? walla mina aman ’taki dhal ’pen mo? Hili mmonyiṯẖa a’di ahe’k em buni mo tani a’di ki o uni gwo mo ki: Atinta palkina um aha/ kan mo? Guyi aha/ nasa guurush mo ma dhali dhalki aha/ p̱ara a’di e mo. 16Dhali uni ki guyi a’di jan ’de/ mo. Dhali a’di ki o uni gwo mo ki: Ki jamas maja a’dan sa/? Dhali a’di ’kwar maja imahan mo? Dhali uni ki thoḵ a’di gwo mo ki: A’di ta jim ma Kaysar mo be. 17Yesus ki o uni gwo mo ki: C̱ika Kaysar to jin ta jim ma Kaysar mo ma dhali c̱ika Arumgimis to jin ta jim ma Arumgimis mo ma. Dhali uni merkin mo gom a’di mo be. 18Dhali ’Kwani Sadukiyiin p̱u’dkini a’di mo, uni gun o gwo mo ki mompinuŋ kamu/ yisa di’da. Dhali uni ki doṯ a’di gwondoṯ mo mmo/o gwo mo ki: 19Amanṯor Gwo, aMusa a’di ’kwarki aman gwo mo mmo/o gwo mo ki: Waḵka kam gi wathi/ midi wu mo dhali dhal ashim piti mo hili diki dhal a’di a’ci mme’d mo tani wathi/ midi mii mash asha kam piti mo dhali c̱is uc̱i goma kam piti mo be. 20Ikam uni ’kokini pesu/ mo be. Jin ṯwa/a/ bu’thki’da ’bom mo dhali ki a’di wuki’d mo tani a’di diki dhal a’di a’ci mo be. 21Dhali jin ’kon mo p̱o/i su/ mo bu’thki’da yim mo dhali wuki’d mo si’da/ mmodiki dhal a’di a’ci mo dhali jin ’kon ma p̱o/i kwara mo nyaḵkina mii gi wakansan mo be. 22Dhali unim pesu/ ’koki dhal a’di a’ci mo. Yan’ko’d mo tani a’bom si’da/ wuki’d mo. 23E mompinu mo tani a’bom midi ta asha ja mo? Haali/ gwaṯẖ ’kokini pesu/ kun bu’thki a’di mo mmota a’bom buni mo be. 24Yesus ki o uni gwo mo ki: A’di diki ta ’kup̱ gwo jin ṯẖu’thkina um mii mo ki um ’koki mish Gwo ma Arumgimis kun ’kwarkunu mo walla mom’bi’th ma Arumgimis mo? 25Haali/ ki uni mini piyu/ mo ’peni mowu mo tani uni mini mash doḵ/e yisa walla minu ’koki c̱i bway mo mmomash mo si’da/. Hili uni mina e waki iman’doyu gwo mo e momis mo be. 26Dhali gom gwo gi uni gun minu cuyi mis mo ’peni mowu mo tani ’kona um ki deŋ gwo e mo e gwo jin ’kwarkin ma Musa mo ’taa? e gwo gi ari cwa me’d jin on ma Arumgimis a’di gwo mo ki: Aha/ tana Arumgimis ma Ibrahiim mo dhali aha/ tana Arumgimis ma Is/hak mo dhali aha/ tana Arumgimis ma Yakuub mo? 27A’di diki ta Arumgimis gom uni gun wukin mo hili gom uni gun ’kon ki e mo. Um wani imanṯẖu’th mii mana? 28Dhali jan ṯal ’deŋ kamu/ ’peni iman’kwar to p̱u’dki’d mo dhali ciḵ gwo jin su’kkina uni ka rem ’kup̱ mo. Dhali mmonyiṯẖa a’di ki a’di thoḵki uni gwo ki ’bore/ mo tani a’di ki doṯ a’di gwo mo ki: Gwoŋḵan jana jin ’kwaru si’da/ jin ta jin ṯwa/a/ ki tiya ’baar mo? 29Yesus ki thoḵ a’di gwo mo ki: Jin ṯwa/a/ a’dihe/ be jin o gwo mo ki: Ciḵi um gwo mo ma. Ayy, um ’Kwani ma Israyiil mo. Tap̱a Arumgimis bana a’di ta Tap̱a Arumgimis jin ṯal ’de/ mo be. 30Dhali /e mini en Tap̱a Arumgimis pini ka dum pini ’baar mo dhali ka ḵashiram pini ’baar mo dhali ki bwam pini ’baar mo dhali ki ’bi’th pini ’baar mo. 31Dhali jiŋ ’ko’da ’dihe/ mo be: /E mini en amannyaḵ c̱a’b pini me’d is piniŋ gana/ mo be. Gwoŋḵana kamu/ jin ’kwarkunu mo yisa di’da jin ca’d mmobol yansan e mo. 32Dhali aman’kwar to mo a’di ki o a’di gwo mo ki: /E o gwoŋ gana/ mo, Amanṯor Gwo. /E ṯori gwo ki ṯor gana/ ki a’di ṯal ’de/ mo, haali/ jaŋ kamu/ yisa di’da, hili a’di ’de/ mo be. 33Mmo/en a’di ka du ’baar mo dhali ka du jin mishi gwo ’bani ’baar mo dhali ki mom’bithi ’baar mo dhali mmo/en amannyaḵ c̱a’b pini me’d is piniŋ gana/ mo tani a’di boli to ’baar mo e gun c̱inu mo mmoc̱i’th ki o’d mo dhali kun ’donu mo mmomiiya bas mo be. 34Dhali ka Yesus mishki’d ki a’di thoḵki a’di gwo ki ’bore/ mo tani a’di ki o a’di gwo mo ki: /E yisa si’dkina ’peni Bampa/ ma Arumgimis mo. Dhali ’peni mo yan mo tani wathin ’deŋ kamu/ yisa di’da jin ro’dki mii mo mmodoṯ a’di gwondoṯa kamu/ mo be. 35Dhali ka Yesus di’d mo mmoṯor uni gwo mo e gu’b gi mondheleladhelel mo tani a’di ki o uni gwo mo ki: Kata i/ona iman’kwar to mo ka Ḵrisṯẖos ta Ya/ ma Dawuu’d moye? 36Haala Dawuu’d ki is piti mmoshi/irrkunu a’di ki Shi/in Dheleladhelel mo tani a’di o gwo eya tente/ mo ki: Tap̱a o Tap̱am pem gwo mo ki: ’C̱a’bi /e aha/ ki me’da bim poros pem mo ntagi aha/ mina dhu ’kup̱ pini mo e bwaŋ ’kwariny cwa jin dhuna /e sho’k mo. 37Dawuu’d ki is piti ki yuḵ a’di ki Tap̱a mo. Wakan a’di midi ta ya/m piti kata mo doḵ/e? Dhali adhana waambuhany ’kwani ciḵki gwo ’peni a’di ki bwaŋ ’kunyga/ mo be. 38Dhali e gwom piti jin ṯora a’di uni mo tani a’di ki o uni gwo mo ki: Jiyi iman’kwar to ki e ki ’bore/ mo uni gun eni momaŋas ki burrinyen turga/ i is mo dhali kun eni mo jin taḵuwa taḵ ka rem ’kup̱ e mo ma suug mo 39dhali mmobu’th mo kun ’boron e gu’b gi montul is mo dhali mo kun taḵuwa taḵ mo e mo jin yuḵuwa yuḵ mo, 40uni gun loski gu’b gi up̱ gun wuna ikaṯẖ ki ’kolo’c mo dhali uni gun miiki mon’tho mo eya p̱or ma pije/ mo ki rash rash mo. Uni mini bu’th dhan miiwaḵ jin bol kun tiya e mo be. 41Dhali a’di c̱a’bki’da ’cesh ka p̱ar ’twa/ e mo jin dhunuwa guurush mo dhali a’di p̱arki’da waambuhany ’kwani e mo mmodhuna uni aguurush e mo jin dhunuwa guurush mo. ’Kwani tana ris ka ris kun ta pa ki pa mo kun dhukina dhana guurush mo. 42Dhala ’bom jin wukin ma kaṯẖim piti mo p̱u’dki’d mo dhali a’di ki dhu ushi emena guurushi su/ mo kun ta gi ’per mo, uni gun wana e ka ṯariip̱an ’de/ mo be. 43Dhali a’di ki yuḵ imanciḵ a’di gwo e a’di mo dhali o uni gwo mo ki: Ka jiŋ gana/ aha/ ona um gwo mo ki, a’boma ha’th’ko’d yansan jin wun ma kaṯẖim piti mo tani a’di dhuki’da ris tom piti ’baar mo mmobol uni gwansan e mo kun ṯa’kki to mo e mo jin dhunuwa guurush mo be. 44Haali/ uni ’baar mo ṯa’kki to mo ’peni tom buni gun ishkin ka enthus mo. Hili ayim ’pena ha’th’ko’d piti mo tani a’di dhuki’da ris to ’baar mo kun tana a’di mo gun mini ’taki kar a’di mo be.

will be added

X\