MARKUS 11

1Dhali ki uni ’dishki Pa Urushaliim is mo e Pam Beeṯp̱aji mo dhali e Pam Beeṯaniya mo e ’Kuwosh Seṯuun mo tani a’di ki hash imanciḵ a’di gwo isu/ mo be 2dhali o uni gwo mo ki: Iiku/ i bampa/ jin di’d ka p̱ar ’twa/ i um mo, dhali ki jahanne/ ki um mini cic̱ a’di mo tani um mini gam ari thuluny jin shi’du/ mo. A’di yisa merkina wathiŋ kamu/ ap̱owa. ’Cuḵi a’di mo dhali guyu/ a’di mo. 3Waḵki/ wathin ’deŋ kamu/ midi o um gwo mo ki: Atinta mina um kan mo tani ṯori a’di gwo mo ki: Tap̱a a’di midi mii ta gi a’di mo dhali midi hashu/ a’di ka nyaŋ’ko’d ki jahanne/ mo imahan mo. 4Dhali uni iikin mo dhali gam ari thuluny jin shi’dkunu mo e ’twaŋkal bway tura beega/ mo. Dhali uni ’cuḵki a’di mo be. 5Dhali uni gwansan kun doshkin mo tani o uni gwo mo ki: Atinta imina um kan mo sa/? Um ’cuḵi ari thuluny gomata? 6Dhali uni ki ṯor uni gwo mo gom gwo jin okin ma Yesus mo, dhali uni ki dhal uni bway mo mmo/ii mo be. 7Dhali uni ki susi ari thulunya Yesus mo dhali uni ki p̱a’d burrinyem buni ap̱o/ a’di mo dhali a’di ki mer a’di ap̱o/ mo be. 8Dhali ’kwani ka ris uni p̱a’dki burrinyem buni e bway tur mo be. Dhali kun tiya p̱a’dkina biny cwa kun ḵwa/kina uni ’peni bwam bunto mo be. 9Dhali uni gwansan kun iikini ṯwa/a/ mo dhali uni gwansan kun baṯẖki uni nsho’k mo tani uni ḵumki cuuwa/ mo ki ’twa/ kun caaca mo ki: Hosanna. Mom’bor mii midi di mo gom a’di jin p̱u’dki’d ki gway gi Tap̱a mo be. 10Mom’bor mii midi di mo gom Bampa/ ma ababam bana ka Dawuu’d a’di jin p̱u’dki’d mo. Hosanna jin di’di mis mo. 11Dhali a’di cic̱ki’d mo e Pa Urushaliim mo dhali a’di seki gu’b gi mondheleladhelel mo be. Dhali ki a’di hilki mo mo dhali ’kara ris to ’baar mo ki e mo tani dhali ŋ’ko’d a’di ki doḵ Pam Beeṯaniya nyaḵki uni gun ’koni ’kume’d i’ce’dka su/ mo haala tente/ yulu’d mo be. 12Dhali ka cim jin baṯẖa’di ’ko’d mo tani ki uni p̱u’dkin mo e Pam Beeṯaniya mo tani a’di ’koshkina ṯe/ mo be. 13Dhali a’di mishki’da p̱u/ ’pena dhana/ mo jin lu/u’d mo. A’di ki ya mo mmop̱ar e mo waḵki/ a’di midi ’taki gam maman ’peni a’di mo. Ki a’di p̱u’dki’di a’di mo tani a’di diki gam toŋ kamu/ mo hili jasi ’cemen gana/ mo haali/ a’di diki ta yil ma p̱u/ mmodho’th mo be. 14Dhali a’di ki o a’di gwo mo ki: Wathin ṯal ’deŋ kamu/ midi diki shwa maman ’peni /e doḵ/e mo ki sule/. Dhali imanciḵ a’di gwo ciḵki gwo yansan mo be. 15Dhali uni p̱u’dkin mo e Pa Urushaliim mo. Dhali ki a’di cic̱ki gu’b gi mondheleladhelel mo tani dhali a’di ṯelki mii ’pen mo mmo/ur uni gwansan ka pije/ kun yoli to mo, dhali uni gwansan kun yolki to mo e gu’b gi mondheleladhelel mo. Dhali a’di ki kuma tharabeesa ’twa/ a’cesh mo gun ta ku gi uni gwansan kun wanki emena guurush mo dhali a’di ki kum to ’twa/ a’cesh mo kun ’kona imanyol gurko/ mo be. 16Dhali a’di diki dhal uni bway mo mmo’do ton tiya mmo’ciṯẖ ki tur mo e gu’b gi mondheleladhelel mo be. 17Dhali a’di ṯorki gwo mo dhali o uni gwo mo ki: A’di diki ta gwo jin ’kwarkunu mo ’taa? ki: Gu’b pem minu yuḵ ki gu’b jin minu ’tho goma ris kal gi ’kwaniny’ceshi ’baar mo? Hili um ki mii a’di me’d gu’b gi ’kwani kun ta imandil to mo be. 18Dhali igasiis kun can dhali iman’kwar to mo uni ciḵki gwo yan mo dhali uni ŋap̱ki bway mo mmo’ce’d a’di sho’k mo haali/ uni ḵo/ki a’di mo haali/ awaambuhany ’kwani caaca kagahara mo merkin mo gom gwom piti jin ṯorkina a’di mo be. 19Dhali ki mom’pimpili/ p̱u’dki’d mo tani a’di dhali imanciḵ a’di gwo uni iikin ka pije/ mo ’peni ’peŋkuman bampa/ mo. 20Me’d jin iikina uni ki iimpe mo mon’thamo/ mo tani uni p̱arkina p̱u/ e mo mmoḵu’thkina a’di hila/ ka birman ilu/ mo be. 21Dhala Buṯerus kakina gwo e mo dhali o a’di gwo mo ki: Tap̱a. Hila p̱u/ mo ma, a’di jin jeekina /e mo tani a’di ḵu’thki’d mo be. 22Dhala Yesus ki thoḵ uni gwo mo ki: Tayi gi moŋgam gwo is mo eya Arumgimis mo. 23Ka jiŋ gana/ aha/ ona um gwo mo ki: A’diyin jin midi o wosh yansan gwo mo ki: Dhalki a’di gunu mo dhali biṯ mo e bwaŋ ḵumma/ yi’de/ mo dhali diki ta ga du jin shi/i gwo ’kup̱ mo tani, hili a’di gamki gwo is gom a’di jin okina a’di mo tani ki a’di midi p̱u’d mo tani a’di minu mii gom a’di mo be. 24Wakan aha/ ṯora um gwo mo ki a’diyin jin mina umi doṯ ki mon’tho mo tani gami gwo is mo ma, ki a’di mina umi bu’th mo dhali um mini bu’th a’di mo be. 25Dhali ma mo yin jin mina umi dosh mo mmo’tho mo tani dhalki a’di ’pen mo waḵki/ um ta gi gwo jin ona um is ap̱o/ cin tiya mo tani wakan si’da/ Ababam bum jin di’d e momis mo midi dhal um gwon dhaŋ bum ’pen mo be. 26Hili waḵki/ um ’koki dhal ’kwani amure/ miinthus buni ’pen mo tani wakan si’da/ Ababam bum jin di’d e momis mo midi diki dhal um amure/ miinthus gi gwon dhaŋ bum ’pen mo be. 27Dhali uni p̱u’dkin doḵ/e mo e Pa Urushaliim mo. Dhali ki a’di diki’d mmoya e gu’b gi mondheleladhelel mo tani igasiis kun can dhali iman’kwar to mo dhali ’kwaniŋ gwanyjaḵa/ mo uni pu’dkini a’di mo be. 28Dhali uni ki o a’di gwo mo ki: Ki moshirr jana sa/ imiikina /e aris to gwansani ’baar mo, walla kaja ic̱iki /e moshirr yansan mo mmomii uni mo? 29Yesus ki thoḵ uni gwo mo ki: Aha/ si’da/ mina doṯ um gwondoṯ mo. Thoḵi aha/ gwo mo ma dhali aha/ mina ṯor um a’di jin c̱iki aha/ moshirr mmomii aris to gwansan mo be. 30Mo jin miin ma Yohaana mii ki yi’de/ mo tani, a’di ’peni momis mo ’taa? walla ’peni ’kwani mo? Thoḵ aha/ gwo mo ma. 31Dhali uni garki gwo ’kusi ’twa/ ka rem ’kup̱ mo mmo/o gwo mo ki: Waḵki/ aman mina o gwo mo ki: ’Peni momis mo tani, a’di midi o am gwo mo ki: Batinta ’kona um ki gam a’di gwo is mo? 32Hili waḵki/ aman mina o ki: ’Peni ’kwani mo tani uni ḵo/ki ’kwani mo haali/ aris ’kwani ’baar mo karkina Yohaan ka manc̱i gwo ma Arumgimis gana/ mo be. 33Wakan uni thoḵkina Yesus gwo mo ki: Aman ’konaki mish mo mo. Dhala Yesus ki o uni gwo mo ki: Wakan si’da/ aha/ mina diki ṯor um gwo mo gom a’di jin c̱iki aha/ moshirr mo mmomii to gwansan mo be.

will be added

X\