MARKUS 1

1Monṯel ’pen gi gwom ’borga/ ma Yesus Ḵrisṯẖos jin ta Ya/ ma Arumgimis mo be. 2Me’d gwo jin ’kwarkunu eya Ishaya jin ta’da manc̱i gwo ma Arumgimis kadhamo/ mo ki: Hili mo mo ma. Aha/ hashkina agum bway pem ibwambori jis/em pini mo. a’di jin midi thoson /e bway mo. 3’Twa/ gi wathin ’de/ mmocuu gwo em bwaasho ki: Thosoni bway gi Tap̱a mo ma, kari bway piti ka ji sho’k mo. 4Yohaan jin ta’da manmii ’kwani ki yi’de/ a’di piki’d mo e mombwaasho mo mmoc̱i gwo mo gom mo jin minu miiya mii ki yi’de/ mo mmorica du is mo gom gwo gi miinthus kun minu gwam ’kwani mo. 5Dhali aris ’kwani iikin ka pije/ e a’di mo ’peni aris bampa/ gi Pa Yahuudiyya mo dhali ’peni aris ’kwani gi Pa Urushaliim mo. Dhali uni ’kokunu mo mmomii ki yi’de/ ki a’di mo e Yi’deŋ Ḵumma/ Uurdun mo mmopikina uni gwo gom miinthus buni mo be. 6Dhala Yohaan si’da/ hi’thki’da mur kalman e isi a’di mo dhali a’di ta’d gi wac̱kan jin hi’thkina a’di e empa’d piti mo dhali a’di ’ka’da kuuyu/ dhali shwa’da dham eya ḵur mo be. 7Dhali a’di c̱iki gwo mo mmo/o gwo mo ki: Ŋ’ko’di aha/ mo tani jamu/ midi p̱u’du/ mo jin ca’d ki aha/ mo. Dhali wac̱kana p̱p̱am piti mo tani aha/ dinaki ha me’d mo mmoluŋ ki ji luŋ mo dhali ’cuḵ uni mo be. 8Aha/ miikina um ki yi’de/ tani hili a’di midi mii um ki Shi/in Dheleladhelel mo be. 9Dhali ka tee gwansan mo tani Yesus p̱u’dki’d mo ’peni Pa Naasira jin di’d e Pany Jaliil mo dhali a’di miikunu ki yi’de/ ka Yohaan mo e Yi’deŋ Ḵumma/ Uurdun mo be. 10Dhali ki a’di piki’d ka pije/ ’peni yi’de/ mo tani ise/ ki jahanne/ a’di p̱arki momis e mo mmodi ki ḵany dhali Shi/in di’d mmothulu/ i a’di mo me’d gurko/ mo be. 11Dhali ’twa/ ciḵkunu ’peni momis mo ki: /E ta Ya/m pem jin enka/ mo, dhali aha/ ’bora bwa ki ’bor ki /e mo. 12Dhali Shi/in Dheleladhelel a’di urki’da Yesus ka pije/ ise/ mo e mombwaasho mo. 13Dhali a’di diki’d e mombwaasho mo ka cim ma issu/ mo, dhali a’di palkunu ka Seṯaan mo. Dhali a’di nyaḵki di ki tombwaasho mo. Dhali iman’doyu gwo p̱u’dkin mo dhali mii a’di to mo be. 14Dhali ka Yohaan karkunu eya sijin mo tani Yesus p̱u’dki’d mo e Pany Jaliil mo mmoc̱i gwom ’borga/ ma Arumgimis mo 15dhali mmo/o gwo mo ki: Mo thimkunu mo, dhali Bampa/ ma Arumgimis p̱u’dki’d e me’d mo. Rici adu is mo ma dhali gam gwom ’borga/ is mo. 16Dhali me’d jin yakina a’di ki yampe e shemen ma gap̱ ma Al ma Jaliil mo tani a’di p̱arki’da Simaan e mo dhala Andaraawus jin ta’da kam ma Simaan mo mmobiṯkina a’di a’thi/ eya al mo haali/ uni ta ’kwani kun ta imancesh to yi’de/ mo be. 17Dhala Yesus ki o uni gwo mo ki: Baṯẖi aha/ nsho’k mo ma, dhali aha/ mina dhu um mmowar ki imanbu’th ’kwani ki gwo mo be. 18Dhali ki jahanne/ uni dhalkina ’thim buni ’pen mo dhali uni ki baṯẖ a’di nsho’k mo be. 19Dhali mmothoṯẖkina a’di is ari’ceenne/ mo tani a’di p̱arki’da Yakuub e mo jin ta ya/ ma Sabadi dhala Yohaan jin ta’da kam piti mo uni kun ’kokin eya ḵur buni mo mmoshowa ’thi/ mo be. 20Dhali ki jahanne/ a’di ki yuḵ uni mo. Dhali uni dhalkina babam buni ka Sabadi eya ḵur mo nyaḵki c̱iŋkina/ kun miina ṯu’c mo dhali baṯẖ a’di nsho’k mo be. 21Dhali ki uni p̱u’dkin mo e Paŋ Kap̱ranahuum mo tani dhali ki jahanne/ a’di seki gu’b gi montul is buni ka cim ma pesu/ mo dhali a’di ṯorki gwo mo be. 22Dhali uni merkin mo gom gwom piti jin ṯorkina a’di mo haali/ a’di ṯorki uni gwo mo me’d wathi/ jin ta gi moshirr mo dhali yisa me’d iman’kwar to mo. 23Dhali ki jahanne/ wathiŋ kamu/ diki’d e gu’b montul is buni mo a’di jin taki’d ga rum thus jin nyo/o’d mo be. 24Dhali a’di cuuki’d ki dhan ’twa/ caaca mo mmo/o gwo mo ki: Ki /e mini mii atinta ki aman mo, Yesus gi Pa Naasira mo? A/e p̱u’dkin mo mmo’ce’d aman sho’k mo? /E mishka/ ki /e ta a’din ṯal ’de/ ma Arumgimis jin ḵogu mo. 25Hila Yesus ḵucurki a’di ki gwo mo mmo/o gwo mo ki: C̱a’bi ki shwam. Piyu/ ka pije/ ’peni a’di mo. 26Dhala rum thus jin nyo/o’d ki tor a’di ’ko’da ’cesh mo dhali cuu gwo ki dhan ’twa/ jin caaca mo. Dhali a’di ki pi ka pije/ ’peni a’di mo. 27Dhali uni ’baar mo merkin mo. Dhali wakan, uni doṯki gwondoṯ e bwam uni mo mmo/o gwo mo ki: Mii yan ta’da taye? Gwon this jin ṯoru de. Ki moshirr maja sa/ iḵankina a’di arum thus kun nyo/on gwo mo dhali uni ha a’di gwo e mo? 28Dhali ki jahanne/ gwom piti yaki’d ki lala’th mo e mo ’baar mo ki tur mo eya ris bampa/ kun ’kon ki jiŋ ’kam mo e bampa/ gi Pany Jaliil mo be. 29Dhali ki jahanne/ a’di dhalki gu’b gi montul is buni ’pen mo dhali a’di cic̱ki’d mo e gu’b ma Simaan mo dhala Andaraawus mo nyaḵka Yakuub mo dhala Yohaan mo be. 30Dhala mar ma Simaana ’bomi, a’di ’ba’thki’d mo mmo/ish ’ko’da ’cesh ki ’batha thunya/ mo dhali ki jahanne/ uni ki ṯorki a’di ayim mo be. 31Dhali a’di p̱u’dki’d mo mmobutha yim mme’d mo dhali ’deka yim ki mis mo dhala thunya/ dhalki’da yim ’pen mo, dhala yim miiki uni to mo be. 32Dhali ki mo ta mom’pimpili/ mo jin yulkin ma tente/ mo tani uni ḵalki ’kwani e a’di mo, aris uni gun ’ba’thkin mo dhali uni kun bu’thkin ma ruma ’cesh mo be. 33Dhali aris ’kwani gi ’peŋkuman bampa/ ’baar mo tulki is mo mmonṯal ’de/ mo e shan’tamo/ mo be. 34Dhali a’di ki wac̱ uni ka ris mo, uni gun ’ba’thkin mo ki ’ba’th ki she/ ki she/ mo, dhali a’di ki ura ruma ’cesh ka pije/ mo, dhali a’di diki dhala ruma ’cesh bway mo mmowal ’twa/ mo haali/ uni nyiṯẖki a’di mo be. 35Dhali ki mo ta mon’thamo/ ka ’tum gana/ mo ki moŋkush nṯwa/a/ mo tani a’di cuki mis mo dhali ya mo e mo jin p̱ina ’kwani mo, dhali a’di ki ’tho mo be. 36Dhala Simaan dhali uni gwansan kun nyaḵki ’ko ki a’di mo tani baṯẖki a’di nsho’k mo be. 37Dhali uni gamki a’di mo dhali o a’di gwo mo ki: Aris ’kwani ’baar mo ŋap̱ki /e mo be. 38Dhali a’di ki o uni gwo mo ki: Dhalki ana iina mo e bampa/ kun ’dish yan is mo, ki aha/ mina c̱i gwo mmun si’da/ mo. Haali/ gom mii gi wakan mo tani a’di ip̱u’dkika/ mo be. 39Dhali a’di yaki’d ki tur mo e bampa/ gi Pany Jaliili ’baar mo mmoc̱i gwo mo e gu’b gi montul is buni mo dhali mmo/ura ruma ’cesh ka pije/ mo be. 40Dhali wathi/ jin ’kosha monthus p̱u’dki’di a’di mo mmoŋap̱ mowoṯẖ ’peni a’di mo, dhali c̱a’bki jiŋ ’kup̱a’dup̱un mo dhali o a’di gwo mo ki: Waḵki e ona bwa mo tani /e mishi aha/ dhelel mo. 41Mmogukina a’di a’di ki e ma ’thime/ ki mo/en mo tani a’di ki he’th me’d piti mo dhali ta a’di is ki me’d mo dhali o a’di gwo mo ki: Aha/ ona bwa mo be. Dheleli mo ma. 42Dhali ki jahanne/ monthus dhalki a’di ’pen mo dhali a’di dhelelkina is mo be. 43Dhali a’di ki ḵan a’di gwo ki ’bi’th mo dhali hash a’di mo mmoyaku/ mo ki jahanne/ mo 44dhali ṯor a’di gwo mo ki: Hili miim pini i e ki ’bore/ mo ki /e mini diki ṯor jan ṯal ’deŋ kamu/ gwo mo. Hili yaku/ mo dhali ṯora gasiis is pini i e mo dhali c̱i a’di to gom is pini jin dhelelkunu mo me’d gwoŋḵan jin ḵankin ma Musa mo haali/ a’di ta gwo jin nyo/a ’kwani mo. 45Hili a’di yaki’d ka pije/ mo dhali ṯel mii ’pen mo mmobah gwo gom a’di ’baḵany mo dhali mmoḵal gwo ki lala’th mo. Wakan a’di mol ma Yesus cic̱ bampa/ doḵ/e mo eya tente/, hili a’di di’d ka pije/ ’peni bampa/ mo, dhali ’kwani p̱u’dkini a’di mo ’peni aris shemen bampa/ mo be.

will be added

X\