LUUKA 5

1Ki ’kwani yap̱ a’di ki is mo mmociḵ gwo ma Arumgimis mo tani a’di doshki’d ki mis mo eya al yi’de/ gi Pa Jannisaaraṯ mo. 2Dhali a’di p̱arki’da ḵur yi’de/ e isu/ mo eya al mo. Hili imancesh to yi’de/ uni iikin ka pije/ mo ’peni uni mo dhali uni ’kokin mo mmolama ’thim buni mo be. 3Dhali a’di seki’di bwam ma ḵur ’de/ mo a’di jin ta jim ma Simaan mo. A’di ki doṯ a’di mo mmokar a’di ’pen ka pije/ mo ari is ’pena gap̱ mo. Dhali a’di c̱a’bki’da ’cesh mo dhali ṯor ’kwani gwo mo ’peni bwam ma ḵur mo be. 4Dhali ki a’di daḵki gwo ṯor mo tani a’di ki owa Simaan gwo mo ki: Shorka ḵur e moŋ’kulu’d mo ma dhali dhala ’thim pini me’d ka ’cesh mo mmobu’th to mo. 5Dhala Simaan thoḵ a’di gwo mo ki: Tap̱a, aman miikina ṯu’c ki mon’thiny ilu/ ’baar mo tani dhali am ’konaki bu’th toŋ kamu/ mo be. Dhali hili ki gwom pini mo tani aha/ mina dhala ’thi/ me’d ka ’cesh mo be. 6Dhali ki uni miiki a’di yansan mo tani uni mushki to yi’de/ kun tana ris ka ris kagahara mo, dhali a’thim buni ’kokin mo mmodher bwa mo, 7dhali uni wuḵki uni e ki me’d mo uni gun miina ṯu’c eya ḵura kamu/ mo mmo/iiyu/ mo dhali mmowoṯẖ uni mo. Dhali uni p̱u’dkin mo dhali uni ’tu’dkina ḵuri su/ mo. Wakan aḵur murkina yi’de/ ilos mo be. 8Hili ka Simaan Buṯerus p̱arki a’di e mo tani a’di biṯki’d e ’kup̱a’dup̱un ma Yesus mo mmo/o gwo mo ki: Yaku/ mo ’peni aha/ mo ma haali/ aha/ tana wathi/ gi miinthus mo, ayy Tap̱a. 9Haali/ a’di merki’d mo dhali aris uni gwahan kun nyaḵ ’ko ki a’di mo mmobu’th to yi’de/ kun ḵalkina uni mo. 10Dhali wakan si’da/ aYakuub diki’d mo dhala Yohaan mo uni gun ta iya/ ma Sabadi uni gun nyaḵ to mii ka Simaan mo. Dhala Yesus ki owa Simaan gwo mo ki: Dhalku/ is ki ḵo/ mo ma. ’Peni shwane e mini ta amancesh ’kwani ki gwo mo be. 11Dhali ki uni ḵalkina ḵur buni ka pije/ mo eya ’cesh mo tani uni dhalkina ris tom buni ’peni ’baar mo dhali baṯẖ a’di nsho’k mo be. 12Ki a’di diki’d mo e ’peŋkuman bampaŋ kamu/ mo tani wathiŋ kamu/ diki’di mun jin tashkina monthus mo. Dhali ki a’di p̱arki’da Yesus e mo tani a’di biṯki bwam/em piti a’cesh mo dhali ŋap̱ a’di ki gwo mo ki: Tap̱a, waḵki e ona bwa mo tani /e mishi aha/ dhelel mo be. 13Dhali a’di he’thki me’d piti mo dhali ta a’di is ki me’d mo mmo/o gwo mo ki: Aha/ ona bwa mo be. Dheleli mo ma. Dhali ki jahanne/ monthus dhalki a’di ’pen mo be. 14Dhali a’di ḵanki a’di gwo mo ki dhalku/ ki ṯor wathin ’deŋ kamu/ gwo mo. Hili yayi mo ma dhali ṯor is pini ka gasiis mo dhali c̱i to mo gom buŋgwar is pini jin dhelelki’d mo me’d gwoŋḵan jin ḵankin ma Musa mo haali/ a’di ta gwo jin nyo/a ’kwani mo be. 15Dhali hili gwo yaki’d mo kagahara ka pije/ ki lala’th isi gom a’di mo, dhali awaambuhany ’kwani ka ris tulki is mo mmociḵ gwo ’peni a’di mo dhali ki uni minu wac̱ mo ’peni ’ba’th buni ki she/ ki she/ mo. 16Hili a’di sere’thki’d bway bwaasho mo dhali ’tho mo be. 17Dhali ’peni bwam ma cim ’de/ gwansan mo tani me’d jin c̱ikina a’di gwo mo tani ’Kwani P̱arisiyiin ’kokin mo dhali imanṯor gwoŋḵan jin c̱inu mo ’kokin ki ’dishe/ mo, uni gun p̱u’dkin mo ’peni aris bampa/ ’baar mo ka ’deṯe/ ’deṯe/ mo ’peni Pany Jaliil mo dhali ’peni Pa Yahuudiyya mo dhali ’peni Pa Urushaliim mo dhali mom’bi’th gi Tap̱a diki’da p̱o/ a’di mo mmowac̱a wac̱ mo be. 18Dhali hili mo mo ma, ’kwani ’kokin mo mmohan wathiŋ kamu/ ka ci i e mo, a’di jin muṯṯa/ is mo. Dhali uni ŋap̱ki bway mo mmoḵal a’di bway bwaŋ gu’b mo dhali mmo’thi a’di mbwambor ma Yesus mo tani 19hili uni ’koki gam bway mo mmoḵal a’di mo haali/ abuhany ’kwani caaca mo tani uni seki ’kuŋgu’b mo dhali uni ki thul a’di ka ’cesh ka cim piti i e mo ki embul shu’d e ’kuŋgu’b mo eya galany ’kwani mbwambor ma Yesus mo. 20Dhali ki a’di p̱arki moŋgam gwo is buni e mo tani a’di o uni gwo mo ki: Wathi/, miinthus pini dhalkunu /e ’pen mo be. 21Dhali iman’kwar to dhali ’Kwani P̱arisiyiin ṯelki gwo ’pen mo mmodoṯ gwo mo ki: Wathi/ yan ta’da ja sa/ jin walki gwo sor kan mo? Kaja a’di mishi dhal ’kwani miinthus buni ’pen mo? Hili jasi Arumgimis a’di ’de/ mo be. 22Ka Yesus nyiṯẖki’d e gwondoṯ buni mo tani a’di thoḵki uni gwo mo ki: Atinta idoṯkina um gwo eya dum bum kan mo? 23Mii jana i’ka’da mii mo, mmo/o gwo mo ki: Miinthus pini dhalkunu /e ’pen mo, walla mmo/o ki: Cuyi mis mo dhali ya ki sho’k mo? 24Hili ki um mini mish mo mo ki Ya/ gi ’Kwani ta gi moshirr mo e mony’cesh mo mmogwam miinthus gi ’kwani mo be — a’di ki o wathi/ jin muṯṯa/ is gwo mo ki: Aha/ ona /e ki: Cuyi mis mo ma dhali ’deka cim pini dhali yayi bway pa mo. 25Dhali ki jahanne/ a’di cuki mis mo mbwambori uni mo dhali a’di ki bu’th a’di jin ishkina a’di ’ko’di cine/ mo dhali ya bway pa mo mmokara Arumgimis ki ca mo be. 26Dhali momer bu’th uni ’baar mo dhali uni karkina Arumgimis ki ca mo dhali uni ’tu’dkunu mo ki moŋḵo/ is mo mmo/o gwo mo ki: Ana mishkina to gun daḵa uli is mo shwane/. 27’Ko’di mii yansan mo tani a’di yaki’d ka pije/ mo dhali p̱ara mantera thulp̱a/ e mo. Gway piti yuḵu ka Lawi mo. A’di c̱a’bki’d mo e mo jin tera a’diya thulp̱a/ mo. Dhali a’di ki o a’di gwo mo ki: Baṯẖi aha/ m’pen mo ma. 28Dhali a’di dhalki’da aris tom piti ’peni ’baar mo dhali cu mis mo dhali baṯẖ a’di isho’k mo be. 29Dhali Lawi ki miiya dhana yuḵ caaca gom a’di e gu’b piti mo be. Dhali a’di nyaḵki c̱a’b ki imantera thulp̱a/ ka ris mo dhali kun tiya si’da/ kun nyaḵki ’kowa tharabeesa nyaḵki uni mo be. 30Dhali ’Kwani P̱arisiyiin dhali iman’kwar tom buni miikina gumgum ap̱o/ imanciḵ a’di gwo mo mmo/o gwo mo ki: Atinta shwana /e to nyaḵki ’kwani gun ta imantera thulp̱a/ mo dhali nyaḵki ’kwani gun ta imanmii miinthus kan mo? 31Dhala Yesus thoḵki uni gwo mo ki: Uni gwansan kun ’bora is mo tani uni mini mii ’koki mii ta ga hakiim mo, hili uni gwansan kun ’ba’thkin mo be. 32Aha/ dinaki yayu/ mo mmoyuḵ ’kwani gun mii miiŋḵar/e mo hili mmoyuḵ uni gun mii miinthus mo mmorica du is mo be. 33Dhali uni thoḵ a’di gwo mo ki: Imanciḵa Yohaan gwo uni ga/i to mo me’d ka ris mo dhali uni ’thokin mo dhali wakan miina imanciḵ ’Kwani P̱arisiyiin gwo mo si’da/. Hili kum pini uni shwaki to mo dhali p̱i to mo. 34Dhala Yesus ki thoḵ uni gwo mo ki: Mina umi dhu yilkina/ kun yuḵu mo e momiimash ga/ to mo ka yiha/ ki wathinyaŋa’b di’d e bwam uni mo ’taa? 35Atee midi p̱u’du/ mo ki wathinyaŋa’b susu mo ka pije/ ’peni uni mo tani dhali yan’ko’d uni ki ga/ to mo ka tee yansan mo be. 36A’di ki ṯor uni gwo mo ki gwom ’bi’th/e si’da/ ki: Wathin ’deŋ kamu/ diki dher burrinyen this mo dhali ’dap̱ a’di ap̱o/ burrinyen dhamo/ mo. Waḵki/ a’di mii’d kan mo tani a’di midi dher jin this bwa mo dhali sharkin burrinyen this midi diki gam me’d ki jin dhamo/ mo be. 37Dhali wathin ’deŋ kamu/ si’da/ diki kar yimana mura’th this ap̱o/ yimana mura’th ḵucaŋa dhamo/ mo. Waḵki/ a’di mii’d kan mo tani yimana mura’th this midi ’twaḵ ḵucaŋ i e mo dhali a’di midi gac̱a sho mo dhali ḵucaŋ minu ’ce’d sho’k mo be. 38Hili yimana mura’th this minu mii kar mo e ḵucaŋ this mo be. 39Dhali wathiŋ kamu/ yisa di’da jin ona bwa mmop̱i yimana mura’th this mo ’ko’di a’di ki p̱i jin dhamo/ mo, haali/ a’di o gwo mo ki: Jin dhamo/ a’di ’bora’bor mo be.

will be added

X\