LUUKA 20

1Ka cima kamu/ mo tani me’d jin ṯorkina a’di ’kwani gwo mo e gu’b gi mondheleladhelel mo dhali c̱i gwom ’borga/ mo tani igasiis kun can mo dhali iman’kwar to mo nyaḵki ’kwaniŋ gwanyjaḵa/ ilu/ mo tani uni p̱u’dkin mo 2dhali uni ki o a’di gwo mo ki: Ṯori aman gwo mo ma, ki moshirr ja imiikina /e to gwansan mo? walla aja ic̱i /e moshirr yansan mo? 3A’di ki thoḵ uni gwo mo ki: Aha/ si’da/ mina doṯ um gwondoṯ mo. Dhali um mini ṯoraa/ gwo mo. 4Mo jin miin ma Yohaana mii ki yi’de/ ’peni momis mo ’taa? walla ’peni ’kwani mo? 5Dhali uni cuki gwo ka rem ’kup̱ mo mmo/o gwo mo ki: Waḵki/ ana mina o gwo mo ki: ’Peni momis mo tani a’di midi o ana gwo mo ki: Atinta ’kona um ki gam a’di gwo is mo? 6Hili waḵki/ ana mina o gwo mo ki: ’Peni ’kwani mo tani aris ’kwani ’baar mo mini ṯugkun ana ki wosh mo, haali/ uni gamki gwo me’d mo ka Yohaan ta’da manc̱i gwo ma Arumgimis mo be. 7Wakan uni thoḵki a’di gwo mo ki uni ’koki mish mo mo jin yayina a’di ’peni nycine/ mo be. 8Dhala Yesus ki thoḵ uni gwo mo ki: Walla aha/ si’da/ yisa mina ṯor um gwo mo gom moshirr kun miikika/ to gwansan mo yisa. 9Dhali a’di ṯelki mii ’pen mo mmoṯor ’kwani gwo ki gwom ’bi’th/e mo ki: Wathi/ di’d jin siki’da mura’th mo dhali a’di ki dhal a’di mo e uni gun miina ṯu’c mo dhali a’di ki ya mo e bampa/ jin si’dasi’d mo ka cim ka ris mo. 10Dhali ki mo p̱u’dki’d mo tani a’di hashki c̱iŋkinaŋ kamu/ e imanhil mo mo ki uni mini ’taki c̱i a’di maman to ’peni bwam ma goŋ piti mo. Hili uni gun hili mo mo tani dorki a’di mo dhali uni ki hash a’di ka nyaŋ’ko’d me’d ’te/ mo be. 11Dhali a’di ki hash c̱iŋkinaŋ kamu/ mo. A’di si’da/ dorkina uni mo dhali uni ki kar a’di ki mon’the is ki shi/ shi/ mo dhali uni ki hash a’di ka nyaŋ’ko’d me’d ’te/ mo be. 12Dhali a’di hashki jiŋ ’kon ma p̱o/i kwara doḵ/e mo. Jan ’de/ yansan uni ki kar a’di jama/ i is mo dhali biṯ a’di ka pije/ mo be. 13Dhali yan’ko’d com gi monsinu o gwo mo ki: Aha/ mina miiya tinta mo? Aha/ mina hashki uni ya/m pem jin enka/ mo. A’di wari mmina uni itaḵ mo. 14Hili ki uni gun hilki mo mo p̱arki a’di e mo tani uni o gwo e is buni mo ki: A’di jin midi ḵal mal a’dan ti. Dhalki ana ’kosha a’di jwa mo ki mal piti midi ta jim bana mo be. 15Dhali uni ki biṯ a’di ka pije/ ’peni bwam monsinu mo dhali ’kosh a’di jwa mo. Dhali com monsinu midi miiya tinta ŋ’ko’d mo gom uni mo? 16A’di midi p̱u’du/ mo dhali ’ce’d uni gwansan sho’k mo kun hili mo mo dhali bwam monsinu minu c̱iki kun tiya mo. Ki uni ciḵki gwo gwansan mo tani uni oki gwo mo ki: Dhalku/ ki dhal a’di mmomii kan mo. 17Hili a’di ki hil uni mo dhali o uni gwo mo ki: Gwo yansan wakatinta jin ’kwarkunu mo ki: Wosh yan gana/ jin waḵkina imannyaŋ gu’b mo tani a’di warki’d ki ’kup̱an jin karu eya rukun mo. 18Aris ’kwani ’baar mo ka ’deṯe/ ’deṯe/ kun ṯa’kkin e ’kuwosh yansan mo tani minu ’ce’d bwa ka ’ci’cimi’th mo, hili waḵki/ a’di biṯi’d ap̱o/ jaŋ kamu/ mo tani a’di midi ṯushun a’di mo be. 19Dhali iman’kwar to dhali igasiis kun can uni palki mii mo mmodhu me’d buni ap̱o/ a’di ki mo yan gana/ mo tani hili uni ḵo/ki ’kwani mo, haali/ uni nyiṯẖkin ki a’di ṯorki gwom ’bi’th/e yan ap̱o/ uni mo be. 20Wakan uni timki a’di mo dhali hash iman’kar mo mo kun dhu is buni me’d ’kwanim paŋ gana/ mo ki uni mini ’taki bu’th gwo ’peni a’di jin okina a’di mo. Wakan ki uni mini c̱i a’di mo e mo gi shirru mo dhali e mom’bi’th ma mudhiir mo be. 21Uni doṯki a’di mo ki: Manṯor Gwo, am mishkina ki /e oki gwo mo dhali ṯor gwo ki ’bore/ mo dhali /e diki ṯor mii jin miinu ka gwar ’de/ mo hili ka jiŋ gana e ṯorki gwo gi bway ma Arumgimis mo be. 22A’di ta gwoŋḵan mo ’taa ki am mina c̱ika Kaysara thulp̱a/ mo? walla minu dhalku/ mo? 23Hili a’di nyiṯẖki jim buni jin isha uni a’cesh mo dhali o uni gwo mo ki: 24Ṯori aha/ emena guurush mo ma. Jamas maja a’dan mo dhali a’di ’kwar maja mmahan mo? Uni ki thoḵ a’di gwo mo ki: A’di ta ji ma Kaysar mo be. 25A’di ki o uni gwo mo ki: Gom a’di gi wakan mo tani c̱ika Kaysar to jin ta ji ma Kaysar mo ma, dhali c̱ika Arumgimis to jin ta ji ma Arumgimis mo ma. 26Dhali uni mol a’di bu’th mo e bwambori ’kwani mo gom gwo jin okina a’di mo. Hili uni merkin mo gom gwom piti jin thoḵkina a’di uni mo tani uni ’kokin ki shwam mo be. 27Dhali ’Kwani Sadukiyiina tiya p̱u’dkini a’di mo, uni kun o gwo mo ki mompinuŋ kamu/ yisa di’da. 28Dhali uni ki doṯ a’di gwondoṯ mo mmo/o gwo mo ki: Amanṯor Gwo, aMusa a’di ki ’kwarki aman gwo mo ki waḵka kam gi wathi/ wuki’d mo ki a’di ta’d ga ’bom mo hili a’ci p̱iyi’d mo tani wathi/ midi mii budha ’bom mo dhali c̱is uc̱i mo goma kam mo. 29Dhali ikam ’kokini pesu/ mo. Jin ṯwa/a/ mashki’da ’bom mo dhali a’di wuki’d mo ki dar gi uc̱i mo be. 30Dhali jiŋ ’ko’d si’da/ mo be. 31Dhali jin ’kon ma p̱o/i kwara mashki’da yim mo, dhali wakan aris uni pesu/ ’baar mo uni ’koki dhal a’ciŋ kamu/ mo dhali uni wukin mo. 32Yan’ko’d a’bom si’da/ wuki’d mo be. 33E mompinu wakan mo tani a’bom midi ta jim maja mo? Haali/ unim pesu/ mashki a’di ka ’bom buni mo be. 34Dhala Yesus ki o uni gwo mo ki: Iya/ gi embul yil gwansan mo tani uni mashkin mo dhali uni c̱ikunu bway mo mmomash mo be. 35Hili uni gwansan kun dhunu ki ku gi ha me’d mo mmobumbur mo e she/ c̱aan mo dhali e mompinu ’peni mowu mo walla mmomash di’d yisa walla mo jin c̱inuwa c̱i mmomash mo. 36Haali/ uni moli wu mo doḵ/e haali/ uni nyaḵkina nyaḵ ki iman’doyu gwo mo dhali uni ta iya/ ma Arumgimis mo mmotakina uni iya/ gi mompinu mo be. 37Hili ki uni kun wukin mo minu cu mo tani a’di ṯor ma Musa gwo mo e gwo jin ’kwarkunu mo gom ari cwa mo, me’d jin yuḵkina a’di Tap̱a mo a’di jin ta’da Arumgimis ma Ibrahiim mo dhali Arumgimis ma Is/hak mo dhali Arumgimis ma Yakuub mo be. 38Dhali hili a’di diki ta Arumgimis gom uni gun wukin mo hili gom uni kun ’kokin mo, haali/ aris uni ’baar mo ’kokin e a’di mo be. 39Dhali iman’kwar ton tiya thoḵ a’di gwo mo ki: Manṯor Gwo, /e oki gwo ki ’bore/ m o be. 40Haali/ uni ḵo/ki a’di mo mmodoṯ a’di gwoŋ kamu/ mo be. 41Hili a’di o uni gwo mo ki: A/ki uni o gwo ka Ḵrisṯẖos ta ya/ ma Dawuu’da? 42Haala Dawuu’d ki is piti oki gwo eya warka/ ma Masamiir mo ki: Tap̱a ki o Tap̱am pem gwo mo ki: C̱a’bi aha/ ki me’da bim poros pem mo ma, 43ntagi aha/ mina dhu ’kup̱ pini mmota cwa jin dhuna /e sho’k pini mo. 44Dawuu’d wakan ki yuḵ a’di ki Tap̱a mo. Wakan kata yuḵa a’di a’di ki ya/m piti mo? 45Dhali e bwany’ce jin ciḵkin ma ris ’kwani gwo gwansani ’baar mo tani a’di ki o imanciḵ a’di gwo gwo mo ki: 46Jiyi iman’kwar to ki e ki ’bore/ mo ma, uni gun eni monyjaŋgal ki burrinyen turga/ i is mo dhali en monthe me’d kagahara mo e mo ma suug mo dhali kun eni moŋ’kom ’borga/ e gu’b gi montul is mo dhali mo gun taḵuwa taḵ mo e mo jin yuḵuwa yuḵ mo 47uni gun loski gu’b gi up̱ kun wuna ikaṯẖ mo dhali uni gun mii mii eya p̱or ma pije/ mo e eŋ ’kwani mo mmomii mon’tho ki rash rash mo. Uni mini bu’th momiiwaḵ kun eḵa/ eḵ mo be.

will be added

X\